သျှမ်းပြည် လွိုင်လင်ခရိုင် လဲချားမြို့တွင် ယနေ့ (ဇွန် ၁၅) ရက် နံနက် ၉ နာရီကျော်၌ အမျိုးသား တစ်ဦး သေနတ်ဖြင့် ပစ်ခတ်ခံရပြီး ပွဲချင်းပြီး သေဆုံးသွားကြောင်း စုံစမ်းသိရသည်။
ယနေ့ ဇွန်လ ၁၅ ရက်နေ့ မနက်ပိုင်း ၉ နာရီ ၁၅ မိနစ်တွင် လဲချားမြို့ လယ်ခေါင်ရှိ ဈေး အရှေ့ဘက်၌ ကားလမ်းကူးနေသည့် အမျိုးသားတစ်ဦးကို ကားတစ်စီးဖြင့်လာရောက်သည့် အမည်မသိ လူတစ်စုက သေနတ်ဖြင့် ပစ်ခတ်သွားကြောင်း ဒေသခံများက သျှမ်းသံတော်ဆင့်ကို ပြောသည်။
“အဲ့ပစ်ခံရတဲ့အမျိုးသားက ဈေးဘက်ကနေ တဘက်ကို လမ်းကူးနေတဲ့ အချိန်မှာ ပစ်သတ်ခံရတာပါ။ သေနတ်သံ ၃ ချက်ကြားလိုက်ရတယ်၊ သူ့ကို လာပစ်တဲ့ အဖွဲ့က ဘယ်ကနေ လာလဲ၊ ဘယ်သူလဲ ဆိုတာတော့ မသိရဘူး။ ကားနဲ့လာတယ်ပဲ သိရတယ်၊ သူ့ နံရိုးမှာ သေနတ်မှန်သွားတယ်” ဟု ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
လက်ရှိတွင် သေဆုံးသူ အမျိုးသား၏ ရုပ်အလောင်းကို သက်ဆိုင်ရာ နှင့် စစ်ကောင်စီ လက်အောက်ခံ ရဲတပ်ဖွဲ့က လာရောက်စစ်ဆေးပြီး သယ်ဆောင်သွားကြောင်း သိရသည်။
အဆိုပါ ပစ်ခတ်ခံရပြီး သေဆုံးသွားသည့် အမျိုးသားသည် မည်သည့်ဒေသက မည်သူဖြစ်သည်ကိုလည်း မသိရကြောင်း နှင့် ၎င်း၏ ကျောပိုးအိတ်အတွင်းမှာလည်း လောက်လေးဂွ နှင့် ရေဗူး တစ်ဗူးသာ ပါရှိကြောင်း အထက်ပါ အမျိုးသားဆက်က ဆက်ပြောသည်။
“သေဆုံးသူကလည်း ဘယ်သူဘယ်ဝါဆိုတာ မသိရဘူး၊ ပြီးတော့ သူ့အိတ်ထဲမှာလည်း လေးဂွ နဲ့ ရေဗူးပဲ ရှိတယ်၊ အခုတော့ တာဝန်ရှိသူတွေက သယ်ဆောင်သွားပြီ၊ အသက် ၂၀ ကျော်ဝန်းကျင်လောက်ပဲ ရှိအုံးမယ်” ဟု အထက်ပါ ပုဂ္ဂိုလ်က သျှမ်းသံတော်ဆင့်ကိုပြောသည်။
ယင်းကဲ့သို့ ပစ်ခတ်သတ်ဖြတ်မှုသည် လဲချားမြို့အတွင်း ပထမဆုံး အကြိမ် ဖြစ်ပေါ်ခြင်း ဖြစ်ပြီး လက်ရှိအချိန်၌ ဈေးအတွင်းမှ ဈေးဆိုင်များ၊ ဒေသခံပြည်သူများက စိုးရိမ်ထိတ်လန့်ရကြောင်းလည်း သိရသည်။
“လဲချားမြို့မှာ တခါမှ ဒီလိုမဖြစ်ဖူးသေးဘူး၊ မြို့လယ်လည်းဖြစ် နေ့လည်နေ့ခင်းလည်း ဖြစ်နေတော့ ပိုပြီးတော့ ကြောက်ရတာပေါ့။ တော်တော်များများက ထိတ်လန့်သွားကြတယ်၊ လုံခြုံရေးပိုင်းအတွက် ပိုပြီးတော့ စိုးရိမ်ရတော့မယ့် အနေအထားဖြစ်တယ်” ဟု လဲချားမြို့နေ အသက် ၃၀ ကျော် အမျိုးသားတစ်ဦးက သျှမ်းသံတော်ဆင့်ကိုပြောသည်။
လဲချားမြို့နယ်အတွင်း လှုပ်ရှားသည့် လက်နက်ကိုင် တပ်ဖွဲ့များအနေဖြင့် အာဏာသိမ်း စစ်ကောင်စီ တပ်ဖွဲ့ အပြင် တိုင်းရင်းသား လက်နက်ကိုင် တပ်ဖွဲ့များ ဖြစ်ကြသည့် သျှမ်းတပ်မတော် SSPP နှင့် RCSS တို့က သွားလာလှုပ်ရှားနေလျက်ရှိကြောင်း သိရသည်။
Leave a Comments