သျှမ်းပြည် မိုးမိတ်ခရိုင် မဘိမ်းမြို့နယ်ရှိ ကျေးရွာအတွင်းသို့ စစ်ကောင်စီ စစ်ကြောင်းထိုး ဝင်ရောက်လာကြောင်း စုံစမ်းသိရသည်။

ပြီးခဲ့သည့် ဇွန်လ ၁၂ ရက်နေ့တွင် မဘိမ်းမြို့နယ် ချောင်းဝကျေးရွာအုပ်စုမှ ခွေးဟောင်းဒုံး ကျေးရွာသို့ စစ်ကောင်စီ တပ်မ ၇၇ နှင့် ၈၈ တပ်ဖွဲ့များ ဝင်ရောက်လာပြီး ကျေးရွာအတွင်း PDF များကို မေးမြန်းကာ ရွာကို မီးရှို့ ဖျက်ဆီး ခဲ့ကြောင်း လည်းသိရသည်။

“သူတို့ စစ်ကြောင်းက ရွာထဲဝင်လာပြီးတော့ ဒီရွာထဲမှာ PDF ရှိလား၊ PDF နဲ့ ဆက်သွယ်တဲ့သူ ရှိလား ဆိုပြီးတော့ လာမေးတယ်၊ ရွာသားတွေကလည်း မရှိကြောင်း ပြောတော့ ပထမသုတ်က ရွာထဲက ထွက်သွားပြီး၊ နောက် တစ်သုတ်က ရွာထဲကို ပတ်ကြည့်တယ်။ ပြီးတော့ သစ်တွေပုံပြီး မီးစရှို့တော့တာပဲ၊ မီးရှို့ပြီး ပြန်ထွက်သွားတယ်၊” ဟု မဘိမ်းမြို့နေ အမျိုးသားတစ်ဦးက သျှမ်းသံတော်ဆင့်ကို ပြောသည်။

ယင်းမီးရှို့မှုကြောင့် နေအိမ် ၂ လုံး မီးကူးစက် လောင်ကျွမ်းပြီး ရွာသားများက အချိန်မှီ မီးငြိမ်းသတ်နိုင်ခဲ့ ကြောင်းလည်း သိရသည်။

အဆိုပါ စစ်ကောင်စီတပ်ဖွဲ့မှ မီးရှို့သည့်အတွက် ရွာသားများ အချို့လည်း မြို့ပေါ် နှင့် တခြားဒေသသို့ စစ်ရှောင် ထွက်ပြေးရကြောင်းလည်း သိရသည်။

လက်ရှိတွင် မြေပြင် အခြေအနေများ တည်ငြိမ်နေသော်လည်း ကျေးရွာ အနီး စစ်ကောင်စီ စစ်ကြောင်း လှုပ်ရှားမှု ရှိနေသည့်အတွက် နောက်ထပ် တစ်ဖန် ကျေးရွာအတွင်း လာရောက်ဖျက်ဆီးမှာကို စိုးရိမ်ရသည့် အကြောင်းလည်း ဒေသခံများက သျှမ်းသံတော်ဆင့်ကို ဆက်ပြောသည်။

“အခုရွာထဲက စစ်ကောင်စီ တပ်တွေ မရှိတော့ပေမဲ့ ရွာနားမှာ ရှိနေတယ်။ ဒါကြောင့် စစ်ကောင်စီတွေ ရွာထဲ ပြန်ဝင်လာပြီး၊ ရွာသားတွေကို ဒုက္ခထပ်လာပေးမှာ ကြောက်ရတာပေါ့၊ အခုလည်း ရွာထဲကနေ ရှောင်တဲ့ သူတွေက ရှောင်နေပြီ” ဟု အထက်ပါ ဒေသခံက သျှမ်းသံတော်ဆင့်ကို ပြောသည်။

စစ်ကောင်စီမှ နိုင်ငံတော် အာဏာသိမ်းယူပြီးနောက်ပိုင်းတွင် ကျေးရွာများကို မတရား လက်နက်ကြီးငယ်များဖြင့် ပစ်ခတ်ခြင်း၊ ကျေးရွာနေ ဒေသခံများကို ဖမ်းဆီးနှိပ်စက်ခြင်း နှင့် ရွာကို မီးရှို့ဖျက်ဆီးခြင်း၊ အိမ်အတွင်း မွေနှောက်ဖျက်ဆီးခြင်းများ ဆက်တိုက်လုပ်ဆောင်လာကြောင်း သိရသည်။

ထို့အပြင် စစ်ကောင်စီ မှ နိုင်ငံတော် အာဏာသိမ်းပြီးနောက်ပိုင်းတွင် PDF တပ်ဖွဲ့များ အပြင် သျှမ်းပြည်အတွင်းမှ တိုင်းရင်းသားလက်နက်ကိုင်တပ်ဖွဲ့တို့နှင့်လည်း မကြာခဏ တိုက်ပွဲဖြစ်ပွားလေ့ရှိကြောင်း သိရသည်။