သျှမ်းပြည် လင်းခေး ခရိုင် အတွင်းရှိ သံလွင်မြစ်ကူး တာဆွပ်တိန်း တံတား တည်ဆောက်မှုကို စတင်လုပ်ဆောင်နေကြောင်း စုံစမ်းသိရသည်။

၂၀၂၃ ခုနှစ် နှစ်ဆန်းပိုင်းကာလမှ စတင်ဆောက်လုပ်လာသည့် သံလွင်မြစ်ကူး တာဆွပ်တိန်းတံတားသည် လက်ရှိ အချိန်တွင် တိုင်လေးတိုင် ဆောက်လုပ်ပြီးစီးနေကြောင်း အဆိုပါ လမ်းကြောင်း တလျောက် သွားလာသည့် ဒေသခံ အမျိုးသားတစ်ဦးက သျှမ်းသံတော်ဆင့်ကိုပြောသည်။

“ဒီနှစ်ကနေ စတင်ပြီးတော့ တိုင်တွေ စတင်ဆောက်လုပ်လာတာ တွေ့ရတယ်၊ အခုဆိုရင်တော့ ဒီသံလွင်မြစ် အနောက်ဘက်ကနေ စလုပ်သွားနေတာပေါ့၊ အလုပ်သမားနေဖို့ တန်းလျား၊ လိုအပ်တဲ့ ပစ္စည်းကိရိယာတွေ အားလုံးကို သူတို့က စီစဥ်ထားပြီးပြီ၊ ဒီတံတားဆောက် စီမံကိန်းက ငါးနှစ်ထားတယ်လို့ သိရတယ်” ဟု အဆိုပါ လမ်းပိုင်း တစ်လျှောက် သွားလာလှုပ်ရှားသည့် ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

သံလွင်မြစ်တံတား တည်ဆောက်ရန်အတွက် ပြီးခဲ့သည့် NLD အစိုးရလက်ထက်တွင် လွှတ်တော်အတွင်း တင်ပြ တောင်းဆိုမှုကြောင့် အစိုးရမှ ဘက်ဂျက်များ ချပေးခြင်း ဖြစ်ကြောင်းလည်းသိရသည်။

လက်ရှိ တာဆွပ်တိန်း တံတား တည်ဆောက်နေသည့် သံလွင်မြစ်လမ်းကြောင်းသည် လင်းခေးမြို့နယ် – ဟိုမိန်းမြို့နယ် (ခွဲ) ကို ဆက်သွယ်ထားသည့် လမ်းကြောင်းဖြစ်နေပြီး ၁၂၉ ကီလိုရှိနေသည့် အကြောင်းနှင့် တာဝန်ယူတည်ဆောက်နေသည့် အင်ဂျင်နီယာ အဖွဲ့သည် မည်သည့် အဖွဲ့က ဖြစ်သည်ကို မသိရသေးသည့် အကြောင်းကို အထက်ပါ အမျိုးသားက ဆက်ပြောသည်။

“ကွန်ကရစ် တံတားဖြစ်မယ်လို့ ထင်တာပဲ၊ အခုတည်ဆောက်နေတဲ့ အဖွဲ့ကလည်း ဗမာစကားတွေပဲ ပြောကြတယ်၊ ဒါပေမဲ့ ဘယ်ဆောက်လုပ်ရေး အင်ဂျင်နီယာက လုပ်နေလဲ ဆိုတဲ့ ဆိုင်းဘုတ်တော့ မတွေ့ရသေးဘူး၊ ဒီလမ်းကြောင်းကသာ ပြီးသွားရင်တော့ သျှမ်းတောင် နဲ့ သျှမ်းရှေ့ ဆက်သွယ်ရေးလမ်းကြောင်းက ပိုပြီးတော့ ကောင်းသွားမှာပေါ့” ဟု ၎င်းက ဆက်ဆိုသည်။

သံလွင်မြစ်သည် သျှမ်းတောင် နှင့် သျှမ်းအရှေ့ကို ဆက်သွယ်ပေးသည့် လမ်းကြောင်း ဖြစ်သည့် အပြင် သျှမ်းပြည် နှင့် ထိုင်းနိုင်ငံကိုလည်း တိုက်ရိုက် သွယ်တန်းထားသည့် လမ်းကြောင်း ဖြစ်ကြောင်း ဒေသခံများက ဆက်ပြောသည်။

ထို့ကြောင့် အဆိုပါ သံလွင်မြစ်ကူး တာဆွပ်တိန်း တံတား တည်ဆောက်မှု ပြီးစီးပါက ထိုင်းနိုင်ငံ နှင့် ကုန်သွယ်ရေးလမ်းကြောင်းများလည်း ပိုမိုတိုးတက်လာနိုင်သည့် အကြောင်း သျှမ်းပြည်မှ ကုန်သွယ်ရေး လုပ်ငန်းရှင် တစ်ဦးက သျှမ်းသံတော်ဆင့်ကို ပြောသည်။

“သံလွင်မြစ်ကို ကူးဖို့ တံတား ရှိလာပြီဆိုရင် ထိုင်း နဲ့ ကုန်သွယ်ရေး၊ စီးပွားရေးလမ်းကြောင်းတွေ ပိုပြီးတော့ ကောင်းလာမှာပေါ့၊ ဒီကနေ ထိုင်းဘက်ကို ခြံထွက်ပစ္စည်းတွေ၊ ကျွဲ၊ နွားတွေ တင်ပို့ဖြစ်မှာပေါ့။ ထိုင်းကနေ စားသောက်ကုန်ပစ္စည်းတွေ၊ စက်သုံးဆီတွေကို အဓိက တင်သွင်းဖြစ်မှာပေါ့၊ စီးပွားရေး လမ်းကြောင်း ကောင်းလာမယ့် အလားအလာပါ” ဟု သျှမ်းပြည်မှ ကုန်သွယ်ရေး လုပ်ငန်းရှင် တစ်ဦးက သျှမ်းသံတော်ဆင့်ကို ပြောသည်။

လက်ရှိ သံလွင်မြစ်ကူးရန်အတွက် ဒေသခံများသည် လှေ ဖြင့် ကူးနေရပြီး လှေမရှိသည့်အချိန်၊ လှေထွက်ချိန် နှင့် မမှီမည့် အချိန် တို့ နှင့် ကြုံတွေ့မှုများနေသည့်အတွက် အချိန်ကာလ ကြန့်ကြာမှု အခက်အခဲ တစ်ခု ရှိနေကြောင်းလည်းသိရသည်။

အဆိုပါ လမ်းပိုင်းတစ်လျှောက် လှုပ်ရှားသည့် လက်နက်ကိုင်တပ်ဖွဲ့များ အနေဖြင့် စစ်ကောင်စီ တပ်ဖွဲ့ အပြင် SSS (S သုံးလုံး) ပြည်သူ့စစ်တို့လည်း ရှိနေကြောင်း စုံစမ်းသိရသည်။