သျှမ်းပြည် တောင်ကြီးမြို့နယ် ဖာမွန်းကျေးရွာအုပ်စုရှိ လယ်ယာမြေပေါ်တွင် ဆောက်လုပ်ထားသည့် နေအိမ်များနှင့် မြေဝယ်ပြီး ခြံစည်းရိုးခတ်ထားသူများကို ခွင့်ပြုချက်မရှိဘဲ ဆောက်လုပ်ထားသည်ဟုဆိုပြီး စစ်တပ်က ဖယ်ရှားခိုင်းနေကြောင်း စုံစမ်းသိရသည်။
ပြီးခဲ့သည့် ဇွန်လ ၂ ရက် စစ်ကောင်စီလက်အောက်ခံ ဖာမွန်းကျေးရွာ လယ်မြေစီမံခွန့်ခွဲမှုအဖွဲ့မှ လယ်ယာမြေပေါ်တွင် ခွင့်ပြုချက် မရှိဘဲ အဆောက်အဦး ဆောက်လုပ်ခြင်း နှင့် အုတ်တံတိုင်း ကာရံခြင်းကို ဇွန်လ ၉ ရက်မှစပြီး အပြီးဖယ်ရှားရမည်ဟု အိမ်တိုင်ရောက် စာပို့အကြောင်းကြားခဲ့သည်။
လက်ရှိ လယ်ယာမြေပေါ် အိမ်ဆောက်လုပ်ထားပြီး ဖယ်ရှားရမည့် စာရင်းထဲပါရှိသော အိမ်ခြေသည် စုစုပေါင်း ၂၀၀ ကျော်ရှိနေပြီး အခိုင်အမာ ဆောက်လုပ်ထားသည့် အိမ်ကြီးများလည်း ဖယ်ရှားရမည့် စားရင်းထဲ ပါရှိကြောင်း တောင်ကြီးမြို့နယ်ခံ တစ်ဦးက သျှမ်းသံတော်ဆင့်ကို ပြောသည်။
“ အိမ်တွေဆောက်ထားတဲ့လူရော အိမ်ဖျက်ခိုင်းထားတယ်။ လောလောဆယ် ဖျက်ခံရမယ့် စားရင်းထဲပါတာ အိမ်ခြေ ၂၀၀ ကျော်တယ်လို့ ကြားတယ်။ အခုရွာမြေ မဟုတ်တဲ့မြေတွေ အကုန်းနီးပါးလောက် ပါတယ်။ ရောင်းတဲ့လူတွေက ရောင်းလို့မရတာ သိရက်နဲ့ရောင်းကြတာ။ ဝယ်တဲ့လူတွေက မသိဘဲဝယ်ကြတယ် “ ဟု ၎င်းက ပြောသည်။
ဖယ်ရှားရမည့် အိမ်ခြေ ၂၀၀ ကျော်အနက် တချို့မှာ အခိုင်အခန့် ဆောက်လုပ်ထားသည့် အိမ်ကြီးများ၊ ဆောက်လုပ်စ နေအိမ်များ နှင့် မြေဝယ်ယူပြီး ခြံစည်းရိုးခတ်ထားသည့် လယ်ယာမြေများ ပါဝင်ပြီး အမှန်တကယ် ဖယ်ရှားရမည်ဆိုပါက ၎င်းတို့သည် နစ်နာဆုံးရှုံးမှု နှင့် အခက်ခဲများစွာ ကြုံတွေ့နိုင်ကြောင်း သိရသည်။
“အခုလောလောဆယ်တော့ သူတို့ မဖျက်သေးဘူး။ သတိပေးတဲ့ သဘောထင်တယ်။ ဒါပေမယ့် ပြောလို့တော့မရဘူး။ ဘယ်နေ့ ထလုပ်မလဲဆိုတာ ဘယ်သူမှ မပြောနိုင်တာ။ ပိုက်ဆံပေးပြီး ဝယ်ထားတဲ့သူတွေက သိမ်းသွားရင်တော့ ရှုံးမှာ “ ဟု ၎င်းက ထပ်လောင်းပြောသည်။
ထို့အပြင် အကြောင်းကြားစာအရ အပြီးဖယ်ရှားသည့် နေ့ရက်မှစ၍ လိုက်နာဆောင်ရွက်ခြင်းမရှိပါက လယ်ယာမြေဉပဒေအရ တရားစွဲဆို အရေးယူဆောင်ရွက်သွားမည်ဟုလည်း သိရသည်။
အလားတူ တောင်ကြီးမြို့ရှောင်လမ်း (လမ်းငါးဆုံ) အသစ်မှ တစ်မိုင်ပတ်လည်ရှိ မြေကွက်များကို အရောင်းဝယ်ပြုလုပ်လျှင် တရားစွဲဆိုမည် စာထုတ်ထားသောကြောင့် လယ်ယာမြေအရောင်းအဝယ် ပြုလုပ်သူများ မြေဝယ်ယူရန် မရဲတော့ကြောင်း လယ်ယာမြေပွဲစားထံမှ သိရသည်။
