ထိုင်းနိုင်ငံရောက် မြန်မာလုပ်သား အပါအဝင် လူအင်အား ၅၀၀ ကျော်က လယ်ယာမြေ လိမ်လည်ရောင်းဝယ်မှုကြောင့် နစ်နာ ဆုံးရှုံးရသည့်အပေါ် အမြန်ဆုံးစိစစ် ဖြေရှင်းပေးဖို့ ချင်းမိုင်မြို့ အမှတ် (၅) ရဲစခန်းမှာ ဆန္ဒပြတောင်းဆိုနေကြကြောင်း စုံစမ်းသိရသည်။
ယနေ့ (ဇွန်လ ၁၂) ရက် ချင်းမိုင်ခရိုင် မြို့တွင်း၊ မြို့နယ် နောင်ဟွယ်အုပ်စုရှိ ရဲစခန်းတွင် နစ်နာဆုံးရှုံးသူ ထိုင်း၊ မြန်မာ၊ သျှမ်း လူဦးရေ ၅၀၀ ကျော်က သွားရောက် ဆန္ဒပြ တောင်းဆိုခဲ့ခြင်း ဖြစ်သည်။
လယ်ယာမြေရောင်းသည့် ပွဲစားဖီ့ချမ်း ဆိုသူက ချင်းမိုင်ခရိုင် နှင့် လမ်းပွန်းခရိုင်ရှိ လယ်ယာမြေ စီမံကိန်း ၁၂ ခုအား ရောင်းချခဲ့ရာ လူဦးရေ ၁ ထောင်ကျော်က အရစ်ပေးချေမှုစနစ်ဖြင့် ဝယ်ယူခဲ့ခြင်း ဖြစ်သည်ဟု Chiang Mai News သတင်းဌာနက ဖော်ပြထားသည်။
“မြေဝယ်သူတွေကို အရစ်ကျ စနစ်ငွေပေးချေရင် ၄ နှစ်စာ အတိုးမယူဘူး။ ၃ လစာ အရစ်ကျပေးပြီးရင်တော့ အိမ်ဆောက်လို့ရတယ်။ မဟုတ်ရင် အပင်တွေ စိုက်လို့ရတယ်။ ရွှေ့ပြောင်းအလုပ်သမားတွေကိုလည်း မြေဂရမ်ရအောင် လုပ်ပေးမယ် “ ဟု ဖီ့ချမ်းက ပြောဆိုပြီး ရောင်းချခဲ့သည်ဟု ရေးသားဖော်ပြထားသည်။
အဆိုပါ လယ်မြေများအနက် အချို့မှာ ပိုင်ရှင်ရှိသည့် မြေများဖြစ်ပြီး တချို့မှာ ဘဏ်မှပိုင်ဆိုင်သည့် မြေများ ဖြစ်ကြောင်း ဖီ့ချမ်း တစ်ဦးတည်းပိုင်မြေများ မဟုတ်ကြောင်း ထို့အတွက်ကြောင့် လယ်ယာမြေ ဝယ်သူများက စရံငွေ၊ အရစ်ကျငွေများ ဆုံးရှုံးခဲ့ရခြင်းဖြစ်ကြောင်း ဆိုသည်။
အဆိုပါ လယ်ယာမြေ လိမ်လည်ရောင်းဝယ်မှုကြောင့် နစ်နာသူ လူဦးရေ ၁ ထောင်ကျော်မှ ဘတ်သန်းငွေ ၂၀၀ ခန့် ဆုံးရှုံးခဲ့ရကြောင်းလည်း ချင်းမိုင်ရဲတပ်ဖွဲ့မှ ထုတ်ပြန်ထားသည်။
Leave a Comments