မြန်မာ – ထိုင်း နယ်စပ် တာချီလိတ်မြို့တွင် ပျောက်ဆုံးနေသည့် မလေးရှားနိုင်ငံသား အမျိုးသမီးတစ်ဦး သည် တရုတ်ပိုင် ကာစီနို ရုံတွင် ပျောက်ဆုံးနေကြောင်း စုံစမ်းသိရှိရသည်။

ပြီးခဲ့သည့် မေလ ၂၉ ရက်တွင် အသက် ၂၂ အရွယ် မလေးရှားအမျိုးသမီး Chong Sum Yee ခေါ် (Angie) သည် ထိုင်းနိုင်ငံ ဘန်ကောက်မြို့မှတစ်ဆင့် မယ်ဆိုင် သို့ရောက်ရှိလာခဲ့ပြီး မေ ၃၀ ရက်တွင် မယ်ဆိုင်မှ ဆိုင်ကယ် တက္ကဆီဖြင့် တာချီလိတ်မြို့သို့ တရားမဝင် နည်းလမ်းဖြင့် ဝင်သွားခဲ့ကြောင်း သိရသည်။

ထို ဆိုင်ကယ် တက္ကဆီသည် မလေးရှား အမျိုးသမီးကို မယ်ဆိုင် – တာချီလိတ် နယ်စပ်သို့ မြစ်ချောင်း အနီးတွင် ပို့ဆောင်ပေးခဲ့ကြောင်း Bangkok Post တွင် ဖော်ပြထားသည်။

လက်ရှိတွင် ထို မလေးရှား အမျိုးသမီးသည် တာချီလိတ်မြို့နယ် တရုတ်နိုင်ငံသားပိုင် ကာစီနိုရုံတွင် ပျောက်ဆုံးနေကြောင်း Alliance Anti Trafi AAT စိုင်းဂွဏ်းက ပြောသည်။

“ အခုက တာချီလိတ် ရောက်နေတယ်။ သူက မလေးရှားမှာနေတဲ့ တရုတ်လူမျိုး ဖြစ်တယ်။ သူလည်း ဖေ့ဘုတ်ကနေ အလုပ်ရှာပြီးတော့ တာချီလိတ်ကို ရောက်လာတာ။ ဒါမဲ့ အခုတော့ သူဘယ်လိုနေထိုင်နေရလဲ ၊ အကြမ်းဖက်ခံနေရလားဆိုတာကိုတော့ မသိရသေးဘူး။ တရုတ်တွေ ပိုင်ဆိုင်တဲ့ ကာစီနိုရုံမှာရှိတယ်လို့ ကြားတယ်” ဟု စိုင်းဂွဏ်းက ပြောသည်။

သို့သော် လက်ရှိတွင် ထိုအမျိုးသမီးသည် မည်သည့်ကာစီနိုရုံတွင် ရောက်ရှိနေကြောင်းကို စုံစမ်းနေဆဲ ဖြစ်ကြောင်း စိုင်းဂွဏ်းက ထပ်လောင်းပြောသည်။

လက်ရှိ ထိုအမျိုးသမီး၏ ဖုန်းဆက်သွယ်လို့ မရသည့်အပြင် လူမှုကွန်ရက်စာမျက်နှာ (ဖေ့ဘုတ်)လည်း ပိတ်ခံထားရကြောင်း သိရသည်။

ထိုကြောင့် ထိုအမျိုးသမီး၏ မိခင်ဖြစ်သူက ထိုင်းနိုင်ငံ တာဝန်ရှိရဲများထံအမှုဖွင့် ထားပြီး ထိုင်းနိုင်ငံ မယ်ဆိုင်သို့ ရောက်ရှိနေပြီး ထိုအမှုကို ထိုင်းအစိုးရကလည်း လိုက်လံ စစ်ဆေးပေးနေကြောင်း သိရသည်။

တာချီလိတ် – မယ်ဆိုင် တံတားကို ဖွင့်ပြီးနောက်ပိုင်း ထိုင်းနိုင်ငံ အမျိုးသမီးများက တာချီလိတ်မြို့ အွန်လိုင်းဂိမ်းသို့ အလုပ်လာရောက် လုပ်ကိုင်နေကြောင်း စိုင်းဂွဏ်းက ပြောသည်။

“အခုဆိုရင် တံတားအနီးနားမှာ နေ့လည်ဆိုရင် ဆိုင်ကယ်တွေ တန်းစီပြီး ရပ်ထားတာ။ ဒီထိုင်းဘက်က လူတွေက နေ့လည်ဆိုရင် တာချီလိတ် အွန်လိုင်းဂိမ်းတွေမှာ အလုပ်သွားလုပ်ကြတာ။ ည ဆိုပြန်လာတယ်။ တာချီလိတ်မှာက အွန်လိုင်းဂိမ်းမှာ လုပ်တာရှိတယ်။ပြီးတော့ ကာစီနိုရုံတွေမှာ သွားလုပ်တာရှိတယ်” ဟု စိုင်းဂွဏ်းက ပြောသည်။

စစ်တပ်အာဏာသိမ်းပြီးနောက်ပိုင်း တာချီလိတ်မြို့ထဲတွင် ကာစီနိုရုံ ၊ အွန်လိုင်းဂိမ်း ၊ မူးယစ်ဆေးဝါးတွေ ပေါများလာသည့် ဒေသဖြစ်ပြီး တရုတ်နိုင်ငံသား နှင့် ထိုင်းနိုင်ငံသားတွေက တရားမဝင် နေထိုင်မှုလည်းရှိနေကြောင်း သိရသည်။