သျှမ်းပြည် တောင်ကြီးခရိုင် ပုံးအင်းဒေသတွင် အမည်မသိ လူ ၄ ဦးက ရေမွှေး လိုက်လံလိမ်ညာပြီး ရောင်းနေကြောင်း ဒေသခံများထံ စုံစမ်းသိရသည်။
ယမန်နေ့ (ဇွန်လ ၄) ရက် နေ့လယ်ပိုင်းတွင် ပုံးအင်းဒေသမှ ချောင်းအနောက်ခြမ်းရှိ ဝမ်ခွမ်ရွာကို တခြားဒေသမှလာသည့် အမည်မသိ လူ ၄ ဦးက ရေမွှေးကို လိမ်ညာရောင်းချနေသည်။
အဆိုပါ ရေမွှေးဗူးထဲ၌ ပေါက်မဲ ရှိသည်ဟုဆိုကာ (ငွေကြေးမကုန်) အထူးကံစမ်းမဲကို နိုက်ရန်လိမ်လည်ခဲ့ကြောင်း ကြုံတွေ့ခဲ့သူ ကာယကံရှင် အမျိုးသမီးတစ်ဦးက သျှမ်းသံတော်ဆင့်ကို ပြောသည်။
“ သူတို့ မဲနိုက်ဖို့ပြောတုန်းက ပိုက်ဆံမကုန်ဘူး၊ တကယ်လို့ မဲ မပေါက်ရင် ဖုန်းဘေ ၂ သောင်းထည့်ပေးမယ်။ ရေမွှေးလည်း ပေးမယ်ဆိုပြီး ကြေညာတာ။ ကျမလည်း ပိုက်ဆံမရှိဘူးနော်လို့ ပြောတာကို ပိုက်ဆံမရှိလည်း နိုက်လို့ရတယ်ဆိုပြီး ပြောတယ်။ မဲကို ၃ စောင်လောက် နိုက်လည်းနိုက်ပြီးရော မဲတစ်စောင်ကို ကျပ် ၂ သိန်းပေး ဆိုပြီး တောင်းတာ “ ဟု ကြုံတွေ့ခဲ့သူ ကာယကံရှင် အမျိုးသမီးတစ်ဦးက ပြောသည်။
အဆိုပါ ငွေကြေးမကုန် အထူးကံစမ်းမဲကို ကြေညာပြီး မဲနိုက်ခိုင်းခဲ့သောကြောင့် ၎င်းမှ မဲကို ၃ စောင် နိုက်ယူပြီးချင်း မဲ ၁ စောင်ကို ကျပ် ၂ သိန်း ပေးရန်နှင့် မပေးနိုင်ပါက မဲ ၃ သုံးစောင်လုံးကို ကျပ် ၂ သိန်းပေးရန် အမျိုးမျိုး ငွေတောင်းယူခဲ့ကြောင်း သိရသည်။
ယင်းကဲ့သို့ ငွေကြေးမကုန် အထူးကံစမ်းမဲဆိုပြီး လိမ်လည်မဲနိုက်ခိုင်းသောကြောင့် ပုံးအင်းဒေသမှ ဒေသခံ ၄ ဦးသည် ၎င်းတို့ အမည်မသိ လူ ၄ ဦးထံမှ တစ်ဦးလျှင် ကျပ် ၁၉၀,၀၀၀ (တစ်သိန်းကိုးသောင်း) မှ ကျပ် ၃၀၀,၀၀၀ (သုံးသိန်း) အထိ ပေးဆောင်ခဲ့ရပြီးဖြစ်ကြောင်း သိရသည်။
“တခြားရွာက လူတွေကော အလိမ်ခံရတယ်။ ဖတ်ကွန်ရွာက တစ်ယောက်ဆို ၃ သိန်းပေးရတယ်။ တချို့လည်း ၁ သိန်း ၉ သောင်း လောက်ပေးရတာလည်း ရှိတယ်။ သူတို့က ဘယ်ကနေလာမှန်း မသိဘူး။ သတိထားကြပါ “ ဟု ၎င်းအထက်ပါ အမျိုးသမီးတစ်ဦးက ထပ်လောင်းပြောသည်။
စစ်တပ်က အာဏာသိမ်းပြီးနောက်ပိုင်း မြန်မာနိုင်ငံတဝှမ်းတွင် အများစုသည် လိမ်ညာမှု လိမ်လည်မှု နည်းမျိုးစုံဖြင့် ငွေကြေးရှာဖွေလာကြသည်။
Leave a Comments