သျှမ်းပြည် တောင်ကြီးခရိုင် ဆီဆိုင်မြို့နယ်အတွင်းရှိ စစ်ဘေးရှောင်များသည် အလှူရှင်များထံမှ ကူညီထောက်ပံ့မှုများ မရရှိတော့သဖြင့် စားနပ်ရိက္ခာများ စတင်ပြတ်လပ်မှု ရင်ဆိုင်နေရကြောင်း စုံစမ်းသိရသည်။

ပြီးခဲ့သည့် မတ်လဆန်းပိုင်းမှစ၍ ဆီဆိုင်မြို့နယ်အတွင်းရှိ စစ်ဘေးရှောင်များသည် ဒေသခံများထံမှ ကူညီထောက်ပံ့မှု အပါအဝင် NGO၊ INGO များထံမှ စားနပ်ရိက္ခာ ကူညီထောက်ပံ့မှုကြောင့် တစ်လစာသာရရှိထားကြောင်း သိရသည်။

မတ်လကုန်ပိုင်းမှစပြီး ပုံမှန်လစဉ် ကူညီထောက်ပံ့ပေးနေသည့် အလှူရှင်များမှ ထောက်ပံ့မှု ရပ်တန့်သွား သောကြောင့် ဆီဆိုင်မြို့နယ်အတွင်းရှိ စစ်ဘေးရှောင်များ နေထိုင်ရာ စခန်း၊ ဘုန်းကြီးကျောင်း နှင့် ကျေးရွာမှ နေအိမ် စုစုပေါင်း နေရာ (၄၀) ကျော်မှ စစ်ရှောင်များသည် စားနပ်ရိက္ခာပြတ်လပ်မှု စတင်ရင်ဆိုင်ကြုံတွေ့ နေရကြောင်း စစ်ရှောင်များ ကူညီနေသည့် ကော်မတီဝင်တစ်ဦးက သျှမ်းသံတော်ဆင့်ကို ပြောသည်။

“ သင်္ကြန်မတိုင်ခင်ကတည်းက ဝေထားတယ်။ သင်္ကြန်ပြီး အခုချိန်ထိ မဝေရသေးဘူး။ အခုဆို စားနပ်ရိက္ခာပြတ် တာတော့ ၁ လကျော်၊ ၂ လ နီးပါးရှိနေပြီ။ စားနပ်ရိက္ခာပြတ်တာတော့ အလှူရှင်မရတာပေါ့။ တချို့ NGO တွေက သူတို့ ပရောဂျက် ကုန်သွားတာ။ တချို့ကျတော့လည်း ဒီဖက်က စီမံကိန်းကုန်သွားပြီလို့လည်း ပြောတယ်။ သူတို့လည်း တစ်နှစ်အတွက် ဘယ်နှစ်ကြိမ် ဝေရမယ်ဆိုတာ ရှိရင်ရှိကောင်းမှာပေါ့။ ကျနော်တို့လည်း သေချာမသိဘူး “ ဟု ၎င်း ကော်မတီဝင်တစ်ဦးက ပြောသည်။

ဆီဆိုင်မြို့နယ်တွင် စစ်ရှောင်များ နေထိုင်ရာဒေသ စုစုပေါင်း နေရာ (၄၀) ကျော်ရှိပြီး စစ်ရှောင်ဦးရေ စုစုပေါင်း (၈) ထောင်လေးရာကျော် တိုးမြင့်လာသဖြင့် စားနပ်ရိက္ခာ ပြတ်လပ်မှုကို စစ်ရှောင်စခန်းနီးပါးတိုင်းက ကြုံတွေ့နေရကြောင်း သိရသည်။

အလားတူ ဆီဆိုင်မြို့နှင့် အလှမ်းဝေးပြီး သွားလာရန် လမ်းပမ်းဆက်သွယ်ရေး ခက်ခဲသည့် အောင်ကလပ်၊ စလောင်းထောင် စသည့် ကျေးလက်ဒေသမှ စစ်ဘေးရှောင်စခန်းရှိ စစ်ရှောင်များသည် စားနပ်ရိက္ခာပြတ်လပ်မှုနှင့် ကြုံတွေ့နေရကြောင်း စစ်ဘေးရှောင် ကူညီနေသူ အမျိုးသားတစ်ဦးက သျှမ်းသံတော်ဆင့်ကို ပြောသည်။

“ တချို့လည်း စားစရာမရှိလို့ ဆန်ပြုတ်သောက်နေရတာ၊ ဟင်းသီးဟင်းရွက်ပဲ စားနေတာ ကြုံနေတယ်။ သူတို့နေရာက မြို့နဲ့ဝေးပြီး လမ်းပန်းဆက်သွယ်ရေး ခက်ခဲတဲ့နေရာ ရောက်နေလို့လေ။ အဲ့ဖက်က အလှူရှင် သိပ်မရောက်ဘူး။ အဲ့နေရာက စလောင်းထောင်၊ အောင်ကလပ်ရွာနားက စစ်ရှောင်တွေရှိတယ် “ ဟု ၎င်း ဒေသခံတစ်ဦးက ပြောသည်။

ပြီးခဲ့သည့် မေလ ၇ ရက်တွင် ဆီဆိုင်မြို့နယ်ရှိ စစ်ဘေးရှောင်များကို ကူညီထောက်ပံ့ရန် လာသည့် အာဆီယံ ယာဉ်တန်း ပစ်ခတ်ခံရမှုဖြစ်စဉ် ဖြစ်ပွားခဲ့ပြီးနောက် ပြည်တွင်း အလှူရှင်များသည် စစ်ရှောင်များကို လာရောက်ကူညီထောက်ပံ့ရန် ကြောက်လှန့်နေကြကြောင်း သိရသည်။

၎င်းအထက်ပါ အမျိုးသားတစ်ဦးက ဆက်လက်ပြီး “ စားနပ်ရိက္ခာက ဒီထက်ပြတ်လပ်သွားရင်တော့ ကျနော်တို့ စစ်ရှောင်တွေအတွက် လုံးဝ စားစရာမရှိတော့ဘူး။ နောက်ဆုံး ခိုးတဲ့အဆင့်ထိ၊ ဓားပြတိုက်တဲ့အဆင့်ထိ ဖြစ်သွားနိုင်တယ် “ ဟု ၎င်းက ထပ်လောင်းပြောသည်။

လက်ရှိ သျှမ်း – ကယားနယ်စပ်ဒေသရှိ စစ်ရှောင်များသည် နေ့စားမလိုက်ရသည့်အပြင် ကိုယ်တိုင် စိုက်ပျိုးရန် တောင်ယာက မရှိခဲ့သဖြင့် ယခုလို အလှူရှင် ပြတ်လပ်သည့်ကာလ၌ စားဝတ်နေရေးသည် ပိုပြီးခက်ခဲလာနေကြောင်း သိရသည်။

ထို့အပြင် မြန်မာနိုင်ငံတစ်ဝှမ်းလုံး စားနပ်ရိက္ခာအရေးပေါ် လိုအပ်နေသည့် လူဦးရေ ၂.၁ သန်းအတွက် နှစ်ကုန်အထိ အမေရိကန် ဒေါ်လာသန်း ၆၀ လှူရန် WFP ကမေတ္တာရပ်ခံထားသည်။

အဆိုပါ ရန်ပုံငွေများ မရရှိပါက WFP ၏ အစီအစဉ်များသည် ယခုနှစ် သြဂုတ်လတွင် ရပ်တန့်ရမည်ဖြစ်ကြောင်း သိရသည်။