သျှမ်းပြည် လားရှိုးခရိုင် သိန္နီမြို့ နှင့် ကွမ်လုံမြို့ လမ်းပိုင်းတွင် ကုန်တင်ကား တစ်စီး မီးရှို့ဖျက်ဆီးခံရကြောင်း ဒေသအတွင်း ကားသမားများထံမှ စုံစမ်းသိရသည်။

ပြီးခဲ့သည့် မေလ ၂၆ ရက်တွင် သိန္နီမြို့ နှင့် ကွမ်လုံမြို့ သွားသည့် ကားလမ်းတစ်နေရာ၌ ဘိလပ်မြေ တင်လာသည့် ၁၂ ဘီးကား တစ်စီးသည် မီးရှို့ဖျက်ဆီးခံထားရပြီး၊ မီးရှို့ခံရသည့် ကားသမား ပျောက်နေကြောင်း ဒေသတွင်း ကားသမား တစ်ဦးက သျှမ်းသံတော်ဆင့်ကို ပြောသည်။

“မန္တလေးဘက်က တက်လာတဲ့ ကားလို့ သိရပါတယ်၊ လောက်ကိုင်ဘက်ကို ဘိလပ်မြေ တင်ပို့ဖို့ တက်လာတာတဲ့၊ သူ့ကားရှေ့ကို လက်နက်ကိုင် တပ်ဖွဲ့ တစ်စုက လာတားပြီး ကားသမားကို ဆင်းခိုင်းတာ၊ ပြီးတော့ ကုန်တွေနဲ့ ကားကို မီးရှို့ဖျက်ဆီးလိုက်တာ၊ အခွန်မဆောင်လို့ ဆိုလားပဲ” ဟု လုံခြုံရေး အရ အမည်မဖော်လိုသူ ဒေသအတွင်းက ကားသမား တစ်ဦးက သျှမ်းသံတော်ဆင့်ကို ပြောသည်။

အဆိုပါ ကုန်တင်ကားကို မီးရှို့ဖျက်ဆီးသည့် လက်နက်ကိုင် တပ်ဖွဲ့သည် မည်သည့် အဖွဲ့အစည်းက ဖြစ်သည်ကို သျှမ်းသံတော်ဆင့် အနေဖြင့် သီးခြား အတည်ပြုနိုင်ခြင်း မရှိသေးပေ။

လားရှိုးခရိုင် မှ မူဆယ်ခရိုင် အထိ လမ်းပိုင်း တစ်လျှောက်တွင် ကားသမားများ၊ လမ်းသွားလမ်းလာများထံမှ အခွန်ကောက် ဆက်ကြေးတောင်းနေသည့် လက်နက်ကိုင် တပ်ဖွဲ့များပေါများလာကြောင်း ဒေသခံများက ဆက်ပြောသည်။

ထို့အပြင် အခွန်တောင်းသည့် ပမာဏလည်း များပြားသည့် အတွက် သတ်မှတ်ထားသည့် အချိန်အတွင်း အခွန် မဆောင်နိုင်သည့် ကားသမားများကိုလည်း ပေါ့ပါးသည့် ပြစ်ဒဏ်ကိုသာ လုပ်သင့်ကြောင်းလည်း အထက်ပါ ကားသမားက ဆက်ပြောသည်။

“အခွန်ကောက်တာ ဆိုလည်း သင့်တင့်တဲ့ ပမာဏ တောင်းသင့်ပါတယ်၊ ကားသမားတွေလည်း ကိုယ်စီအခက်အခဲ တွေ နဲ့မို့ ကိုယ်ချင်းစာသင့်ပါတယ်။ တကယ်လို့ အခွန်မဆောင်နိုင်တဲ့ သူဆိုလည်း ပေ့ါပါးတဲ့ အပြစ်လောက်ပေါ့။ အခုလို ကားကို မီးရှို့တာ၊ လူကို ဖျောက်ပစ်တာမျိုးတွေက ကားသမားတွေမကဘူး၊ သူ့မိသားစုဝင်တွေပါ ဘဝပျက်သွားနိုင်တယ်” ဟု ၎င်းက ဆိုသည်။

သျှမ်းပြည် မြောက်ပိုင်းတစ်လျှောက်တွင် အခွန်ကောက် ဆက်ကြေးတောင်းသည့် လက်နက်ကိုင် အဖွဲ့အစည်းများ စုံလင်ပေါများလှသော်လည်း ကုန်တင်ကားများ ပစ်ခတ်ခံရခြင်း၊ မီးရှို့ဖျက်ဆီးခံရခြင်းတို့က မကြာခဏ ဖြစ်လေ့ရှိကြောင်းလည်း သိရသည်။

ပြီးခဲ့သည့် မတ်လ ဆန်းပိုင်းမှာလည်း အဆိုပါလမ်းတွင် ၁၂ ဘီး ကုန်တင်ကား ၂ စီး မီးရှို့ ဖျက်ဆီးခံခဲ့ရပြီး ယနေ့အထိ မည်သည့် တပ်ဖွဲ့က လုပ်ဆောင်ခဲ့သည်ကို မသိရသေးပေ။

အဆိုပါ လမ်းပိုင်း တစ်လျှောက်တွင် တအောင်းအမျိုးသား လွတ်မြောက်ရေး တပ်မတော် (TNLA)၊ ကချင် လွတ်လပ်ရေး တပ်မတော် (KIA)၊ မြန်မာအမျိုးသား ဒီမိုကရက်တစ် မဟာမိတ် တပ်မတော် (MNDAA) တို့အပြင် စစ်ကောင်စီတပ်တွေနဲ့ သိန္နီ PDF တို့လည်း စစ်ရေးလှုပ်ရှားလျက်ရှိပြီး အခွန်တွေ ကောက်ခံနေကြောင်း သိရသည်။