သျှမ်းပြည် လားရှိုးမြို့နယ်တွင် လက်ကြိုးတုတ်ပြီး သေနတ်ပစ်သတ်ခံရသည့် အမျိုးသား၏ ရုပ်အလောင်းကို တွေ့ရှိကြောင်း သတင်းရရှိသည်။

ယနေ့ (မေလ ၂၇) ရက် မွန်းလွဲ၂ နာရီဝန်းကျင်တွင် လားရှိုးမြို့နယ် ကောင်းကြဲ (အီ) ကျေးရွာအုပ်စုအတွင်းရှိ ခိုက်ချန်ရွာမှ ငါးပါးသီလသင်္ချိုင်းအနီးတွင် လက်ကြိုးတုတ်ပြီး သေနတ်ပစ်သတ်ခံထားရသည့် အမျိုးသားတစ်ဦး၏ ရုပ်အလောင်းကို တွေ့ရှိခဲ့ကြောင်း အမည်မဖော်လိုသူ ဒေသခံ တစ်ဦးက ပြောသည်။

“ ဒီနေ့လယ်ပိုင်းလောက်က တွေ့တာ။ ငါးပါးသီလ သင်္ချိုင်းနားမှာ ကြိုးတုပ်ပြီး သတ်ခံရတဲ့ အလောင်းတွေ့တာ။ လက်ကိုကြိုးတုတ်ထားပြီး ခေါင်းမှာ သေနတ်ပစ်ထားတဲ့ ဒဏ်ရာတွေ့တယ် “ ဟု ၎င်းက ပြောသည်။

အဆိုပါ အမျိုးသားတစ်ဦးကို မည်သည့် အဖွဲ့အစည်းမှ လုပ်ကြံသတ်ဖြတ်ခဲ့သည်ကို အသေးစိတ် မသိရှိရသေးပေ။

ထို့အပြင် သေဆုံးသွားသည့် အမျိုးသား၏ ရုပ်အလောင်းကို လားရှိုး လူမှုကူညီရေးအသင်းတစ်ခုမှ သွားရောက် သယ်ယူပြီး လားရှိုးဆေးရုံ ရင်ခွဲရုံသို့ ပို့ဆောင်ခဲ့ကြောင်း သိရသည်။

လက်ရှိအချိန်ထိ အသတ်ခံရသည့် အမျိုးသား၏ မိသားစုဝင်များနှင့် အဆက်အသွယ်မရသေးပေ။

အလားတူ ယမန်နေ့ (မေ၂၆) ရက် ညအချိန်၌ လားရှိုးမြို့ ဘူတာလမ်းမကြီးအနီးရှိ လားရှိုးတက္ကသိုလ်၊ ညောင်ပင်ကွေ့ အနီးတွင် အမျိုးသားတစ်ဦး ဓားခုတ်ခံရပြီး ထိခိုက်ဒဏ်ရာများစွာရရှိခဲ့သည်။

လားရှိုးမြို့နယ်တွင် စစ်ကောင်စီတပ်ဖွဲ့ အပါအဝင် မန့်နားပြည်သူ့စစ်၊ ကောင်းခါးပြည်သူ့စစ် (KDA)၊ တိုင်းရင်းသားလက်နက်ကိုင်များ ဖြစ်သည့် သျှမ်းပြည်တိုးတက်ရေးပါတီ၊ သျှမ်းပြည်တပ်မတော် (SSPP/SSA)၊ ကိုးကန့်တပ်မတော် (MNDAA)၊ တအာင်း (ပလောင်) အမျိုးသားလွတ်မြောက်ရေးတပ်မတော် (TNLA) စသည်ဖြင့် လက်နက်ကိုင်တပ်ဖွဲ့များ လှုပ်ရှားနေလျက်ရှိသည်။