သျှမ်း-ကရင်နီ (ကယား) နယ်စပ်ဒေသရှိ မိုးဗြဲမြို့ လူနေအိမ်ရပ်ကွက်ကို စစ်ကောင်စီမှ လေကြောင်းဖြင့် ဗုံးကြဲသည့်အပြင် လက်နက်ကြီး ပစ်ခတ်တိုက်ခိုက်သဖြင့် အရပ်သားထိခိုက်မှုနှင့် နေအိမ်ပျက်စီးမှုများ ရှိခဲ့ကြောင်း စုံစမ်းသိရသည်။
ယနေ့ (မေလ ၂၇) ရက် နံနက် ၅ နာရီကျော် အချိန်မှစပြီး မိုးဗြဲမြို့နယ် လူနေအိမ်ရပ်ကွက်ကို စစ်ကောင်စီမှ လေကြောင်းအသုံးပြုပြီး ၉ ကြိမ်ထက်မနည်း ပစ်ခတ်တိုက်ခိုက်မှုပြုလုပ်ခဲ့ပြီး လက်နက်ကြီးဖြင့်ပါ ထပ်ဆင့် ပစ်ခတ်တိုက်ခိုက်ခဲ့ကြောင်း သိရသည်။
“ မနက်က လေကြောင်းကနေ ဗုံးလာကြဲတာ ၉ ကြိမ်လောက်ရှိတယ်ဗျ။ ညောင်းဝိုင်းရပ်ကွက်နဲ့ ဈေးကုန်းရပ်ကွက်တွေဖက်မှာ လာကြဲတာ။ ပြီးတော့ လက်နက်ကြီးတွေနဲ့ကော ပစ်တယ်။ အရပ်သား ထိခိုက်မှု ရှိတယ်လို့တော့ကြားတယ်။ သေချာတော့ မသိရသေးဘူး။ နေအိမ်၊ ဘုန်ကြီးကျောင်းတွေကော ပျက်စီးသွားတယ်” ဟု သတင်းရင်းမြစ်တစ်ဦးက သျှမ်းသံတော်ဆင့်ကို ပြောသည်။
အဆိုပါ တိုက်ခိုက်မှုအတွင်း စစ်ကောင်စီသည် လေကြောင်းအသုံးပြုပြီး ၉ ကြိမ်မနည်း တိုက်ခိုက်မှု ပြုလုပ်ခဲ့ပြီး လေယာဉ်စက်သေနတ်ဖြင့် (၇) ကြိမ်ပစ်ခတ်ခဲ့ပြီး (၃) ကြိမ်မှာ ပေါင် (၅၀၀) ဗုံးသီးများပါ ကြဲချခဲ့ကြောင်း ဒေသမီဒီယာဖြစ်သည့် Mobye News တွင်ရေးသားဖော်ပြထားသည်။
ပြီးခဲ့သည့် မေ ၂၂ ရက် မိုးဗြဲ ပီကင်းလမ်းမပေါ် ဖြတ်သန်းသွားသည့် သားဖနှစ်ဦးကို စစ်ကောင်စီမှ ပစ်ခတ်တိုက်ခိုက်ခဲ့ခြင်းကြောင့် အဖေဖြစ်သူ သေဆုံးသွားခဲ့ရသလို၊ မေလ ၂၃ ရက် ညအချိန်၌ မိုးဘေးစစ်ဘေးရှောင်စခန်းကို စစ်ကောင်စီမှ တိုက်လေယာဉ်ဖြင့် (၂) ကြိမ်တိုင် လာရေက် ဗုံးကြဲချခဲ့သဖြင့် လူနေအိမ် (၂) လုံးပျက်စီးခဲ့သည်။
