သျှမ်းပြည် လွိုင်လင်ခရိုင် မိုင်းပွန်မြို့နယ် မှ ခြေမြန်တပ်ရင်း ၅၁၇ (ခမရ) မှ ဗိုလ်ကြီး တစ်ဦးသည် ကရင်နီပြည် တိုက်ပွဲအတွင်းတွင် သေဆုံးခဲ့ပြီး အလောင်းပြန်မရကြောင်း စုံစမ်းသိရသည်။
ပြီးခဲ့သည့် မေလ ၂၀ ရက် မနက်ပိုင်း ၅ နာရီတွင် ကရင်နီပြည် တိုက်ပွဲ၌ ဗိုလ်ကြီး မျိုးသီဟသည် ရှေ့တန်းတိုက်ပွဲတွင် သေဆုံးသွားပြီး အလောင်း ပြန်မရကြောင်း မိသားစု နှင့် နီးစပ်သူ တစ်ဦးက သျှမ်းသံတော်ဆင့်ကို ပြောသည်။
“ရှေ့တန်းမှာကျတာ၊ ကရင်နီပြည်ဘက်မှာ ကျတယ်လို့ သတင်းသိရတယ်၊ အခုချိန်ထိ အလောင်းက ပြန်မရသေးဘူး။ သူက မင်္ဂလာဆောင်ထားတာလည်း မကြာသေးဘူး။ ၅ လ လောက်ပဲ ရှိအုံးမယ်” ဟု မိသားစုဝင် နှင့် နီးစပ်သူ အမျိုးသမီး တစ်ဦးက သျှမ်းသံတော်ဆင့် ကိုပြောသည်။
အဆိုပါ ဗိုလ်မှူးကြီး မျိုးသီဟသည် မင်္ဂလာဆောင်ပြီး ၅ လ အကြာတွင် ရှေ့တန်းထွက်ပြီး သေဆုံးခြင်း ဖြစ်ကြောင်း သိရသည်။
လက်ရှိတွင် သျှမ်းပြည်မှ စစ်ကောင်စီတပ် အများစုသည် သျှမ်း – ကယားနယ်စပ်၊ ကရင်နီပြည် ဒေသအတွင်း အင်အား အများအပြား ပို့ဆောင်ပြီး ပြည်သူ့ကာကွယ်ရေး ပူးပေါင်း တပ်ဖွဲ့ တို့ကို ထိုးစစ်ဆင် တိုက်ခိုက်နေ ကြောင်းလည်း သိရသည်။
