သျှမ်းပြည် တောင်ကြီးခရိုင် ညောင်ရွှေမြို့နယ် အင်းလေးဒေသခံများကို ပြည်သူ့ကာကွယ်ရေးတပ်ဖွဲ့ (PDF) နှင့်ဆက်စပ်မှု ရှိ၊ မရှိ စစ်ကောင်စီက အပြင်းအထန် လိုက်လံရှာဖွေပြီး ဖမ်းဆီးနေကြောင်း စုံစမ်းသိရသည်။
ပြီးခဲ့သည့် မေလ ၂၁ ရက် ည ၈ နာရီကျော်တွင် မိုးချုပ်ပြီး လူသံများ တိတ်တဆိတ် ဖြစ်နေသည့်အချိန် အင်းလေးဒေသရှိ နေအိမ်တစ်လုံးကို လူအင်အား ၂၀ ခန့်ရှိသည့် စစ်ကောင်စီတပ်ဖွဲ့ဝင်က ဝင်ရောက် စစ်ဆေးပြီး ပစ္စည်းများကို မွှေနှောက်ခဲ့သည်။
ရွာထဲသို့ စတင်ဝင်ရောက်လာချိန်တွင် လင်းထိန်နေသည့် မီးများကို ဖြတ်ချပြီး လမ်းကြောင်းတစ်လျှောက်၌ ကင်းများချထားကာ ထိုနေအိမ်တစ်လုံးထဲကို စတင်ဝင်ရောက် စစ်ဆေးခဲ့ကြောင်း အိမ်ရှင်ဖြစ်သူ ဒေသခံတစ်ဦးက ပြန်လည်ပြောပြသည်။
“ ရွာကို မီးဖြတ်လိုက်တယ်။ အကွက်ကျကျ လမ်းကြောင်းတွေ ကင်းချပြီးမှ ကျနော်တို့ အိမ်ကို စဝင်လာတယ်။ ပထမ ရဲ ၃ ယောက်၊ နောက်တော့ စစ်သား၊ ပြည်သူ့စစ်၊ ရဲတွေက စက်လှေ နဲ့ ၅ စီး ရောက်လာတယ်။ စစ်အင်အား ၂၀ လောက်ရှိတယ် “ ဟု ၎င်းက ပြောသည်။
စစ်သားအဝတ် အပြည့်အစုံ နှင့် လက်ထဲတွင် သေနတ်များ ကိုယ်စီကိုင်ဆောင်လာပြီး ၎င်း၏ နေအိမ်ထဲရှိ အိပ်ခန်း၊ စာအုပ်စဉ်၊ ဗီဒိုများအား တစ်ခုမကျန် PDF နှင့် ဆက်စပ်မိ ခဲယမ်းပစ္စည်းများကို အသည်းအသန် လိုက်ရှာဖွေနေသည်။
“ အဲ့ချိန် ကြောက်စိတ်က မရှိနေဘူး။ နည်းနည်းတော့ ကြောင်သွားတာပေါ့နော်။ ထွက်ပြေးဖို့လည်း မစဉ်းစားဘူး။ ကျနော်က ကျွမ်းကျင်တဲ့ ဘာသာရပ် မဟုတ်သလို ဘာမှ လုပ်ထားတာ မရှိဘူး။ မွှေတာမှ ရစရာရှိလို့ မွှေတာနဲ့တူလိုက်တာ။ အလွန်အကျွံပဲ “ ဟု ၎င်းက ဖြစ်ပျက်ခဲ့သည့် အကြောင်းကို ပြန်လည်ပြောပြနေသည်။
ထို့နောက် PDF နှင့် ဆက်စပ်မိ ခဲယမ်းပစ္စည်းများကို ရှာမတွေ့ခဲ့သဖြင့် ၎င်း၏ လက်ကိုင်ဖုန်းအား စစ်ဆေးရန် မေးမြန်းခဲ့သည်။
“ သူတို့ လိုချင်နေတဲ့ ဖုန်းနဲ့ အဆက်သွယ်လုပ်သလား စစ်တယ်။ ၂၀၂၂ တစ်လပိုင်းကနေ ၂၀၂၃ ခုနှစ် ၃ လပိုင်းထိ ရောက်ရှိတဲ့နေရာ၊ လုပ်ခဲ့တဲ့ အရာကို ဖြေရှင်းခိုင်းတယ်။ PDF အဖွဲ့ထဲမှာ ကျနော် ဓာတ်ပုံတွေ့ လို့ဆိုပြီး လာဝိုင်းဖမ်းကြတာဗျ။ ပြီးခဲ့တဲ့ ၂၀၁၉ ကတည်းက ကျနော်အသိ တစ်ယောက်နဲ့ ရိုက်ထားတဲ့ ဓာတ်ပုံပါ။ အခုအဲ့ဒါကို သူတို့ဖက်က စွပ်စွဲပြီး ဖမ်းဖို့ လုပ်တာဗျ။ ဖုန်းထဲက ဓာတ်ပုံတွေက ရက်စွဲပါတော့ ဖြေရှင်းလို့ လွယ်သွားတာ “ ဟု ၎င်းက ထပ်လောင်းပြောသည်။
အဆိုပါ လက်ကိုင်ဖုန်းအား စစ်ဆေးမှု ပြုလုပ်နေစဉ်တွင် စစ်ကောင်စီဖက်မှ ဒေတာ အချက်အလက် မှတ်တမ်းစုစည်းပြီး ရထားသည့် ဖုန်းနံပါတ် စုစုပေါင်း ၂၇၀ ကျော်အရ ၎င်း၏ လက်ကိုင်ဖုန်းထဲရှိ ဖုန်းနံပါတ်များနှင့် တိုက်ဆိုင်မှု ရှိ၊ မရှိ စစ်ဆေးမှု ပြုလုပ်ခဲ့ကြောင်း ဆိုသည်။
စစ်ကောင်စီသည် ၎င်းတို့ကို ခုခံတော်လှန်တိုက်ခိုက်နေသည့် တပ်ဖွဲ့များကို အပြင်းအထန် နှိမ်နင်းလာမှုကြောင့် PDF နှင့် ဆက်စပ်သည်ဟုစွပ်စွဲပြီး အင်းလေးဒေသမှ ပြည်သူကို ယခုနှစ်အတွင်း ၂၀ ကျော် ဖမ်းဆီးချုပ်နှောင်ထားကြောင်း သိရသည်။
