သျှမ်းပြည် မူဆယ်ခရိုင်၊ နမ့်ခမ်းမြို့နယ် မိုင်းဝီးဒေသအတွင်းတွင် လယ်ယာသွားသည့် ဒေသခံများကို တအာင်း (ပလောင်) အမျိုးသား လွတ်မြောက်ရေး တပ်မတော် (TNLA) တပ်ဖွဲ့က ဖမ်းဆီးခေါ်ဆောင်သွားကြောင်း သတင်း သိရသည်။

ပြီးခဲ့သည့် မေလ ၂၃ ရက်နေ့တွင် လယ်ယာတဲ အတွင်း အိပ်နေသည့် ဒေသခံများ နှင့် လယ်ယာသွားနေသည့် ဒေသခံများကို TNLA တပ်ဖွဲ့မှ ဝင်ရောက်ဖမ်းဆီးပြီး ခေါ်ဆောင်သွားကြောင်း ဒေသခံများက သျှမ်းသံတော်ဆင့်ကို ပြောသည်။

“အခုချိန်က လယ်ယာထွန်တဲ့အချိန်လေ၊ တချို့ရွာသားကလည်း လယ်တဲတွေမှာ သွားအိပ်နေကြရတယ်၊ တချို့ကလည်း မနက်အစောကြီး လာကြတဲ့ သူတွေပေါ့၊ အဲ့ဒါ လယ်တဲတွေမှာ အိပ်တဲ့သူ၊ လယ်ခင်းကို လာနေတဲ့ ရွာသားတွေ စောင့်ဖမ်းသွားတာ၊ အမျိုးသား ၁၀ ယောက် ဖမ်းဆီးခံရသွားတယ်” ဟု မိုင်းဝီးဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။

လယ်ယာတဲအတွင်း အိပ်နေကြသည့် သူများကို မနက် ၄ နာရီဝန်းကျင်အချိန်တွင် TNLA စစ်သားတို့က ဝင်ရောက် ဖမ်းဆီးခြင်း ဖြစ်ကြောင်းလည်း သိရသည်။

လက်ရှိတွင် ဖမ်းဆီးခံရသူများကို နမ့်ခမ်းမြို့ နှင့် မိုင် (၃၀) ခန့် ကွာဝေးသည့် မိုင်းဝီးဒေသ တုန်ပုတ်ရွာတွင် ဖမ်းဆီး ခေါ်ထားလျက်ရှိကြောင်းလည်း ဒေသခံများက သျှမ်းသံတော်ဆင့်ကို ပြောသည်။

“ဘာကြောင့် ရွာသားတွေကို ဖမ်းသွားလဲဆိုတာ မပြောဘူး၊ ဖမ်းဆီးခံရတဲ့ သူတွေကလည်း သျှမ်းလူမျိုးတွေပဲ ဖြစ်ကြတယ်။ အဲ့ဒီ တုန်ပုပ် (ဝၢၼ်ႈတူၼ်ႈပူၵ်ႇ) ဖက်မှာ ချုပ်ထားတယ်လို့ ပြောတယ်။ မိသားစုဝင်တွေကိုလည်း တွေ့ခွင့် မပေးဘူး” ဟု အထက်ပါ အမျိုးသားက သျှမ်းသံတော်ဆင့်ကို ပြောသည်။

TNLA တပ်ဖွဲ့မှ လယ်ခင်းအထိ ရွာသားများကို လိုက်လံ ဖမ်းဆီးနေသည့်အတွက် ဒေသအတွင်း လူငယ်လူရွယ် များ၊ အမျိုးသား နေအိမ်တွင် မနေရဲကြတော့ဘဲ လယ်ယာ စိုက်ခင်းသွားရန်လည်း ကြောက်လန့်နေရကြောင်း ဒေသခံများက ဆက်ပြောသည်။

“လယ်ယာလုပ်ငန်းတွေ စလုပ်နေတဲ့ အချိန်ဖြစ်နေတော့ အလုပ်တွေကို လွတ်လွတ်လပ်လပ် လုပ်လို့ မရတော့ဘူး၊ လယ်ထွန်ဖို့ အမျိုးသားတွေက ရှောင်နေကြရတယ်၊ တချို့လည်း ဖမ်းခံသွားရတယ်၊ အဲ့ဒါတွေကြောင့် စားဝတ် နေရေးပိုင်းတွေကို ထိခိုက်လာတယ်ပေါ့” ဟု မိုင်းဝီးဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

ယင်းကိစ္စ နှင့် ပတ်သက်ပြီး တအာင်း (ပလောင်) အမျိုးသား လွတ်မြောက်ရေး တပ်မတော် TNLA ၏ ပြောရေး ဆိုခွင့် ရှိသူ ဒုတိယ ဗိုလ်မှူးကြီး တားအိုက်ကျော်ကို ဆက်သွယ်မေးမြန်းရာ ရွာသားများကို ဖမ်းဆီးခြင်း မရှိကြောင်း သျှမ်းသံတော်ဆင့်ကို ပြောသည်။

“ကျနော် မြေပြင် အောက်ခြေဘက်ကို မေးမြန်းကြည့်တော့ မရှိဘူးလို့ ပြောတယ်။ အဲ့ဒီဘက်က ရွာသားတွေကို ဖမ်းဆီးတာ မရှိဘူး။ တုန်ပုတ်ရွာဘက်မှာတော့ ကျနော်တို့ တပ်ဖွဲ့ လှုပ်ရှားမှုက ရှိပါတယ်” ဟု PSLF/TNLA ၏ ပြောရေးဆိုခွင့် ရှိသူ ဒုတိယ ဗိုလ်မှူးကြီး တားအိုက်ကျော်က သျှမ်းသံတော်ဆင့်ကို ပြောသည်။

ပြီးခဲ့သည့် ၂၀၂၂ ခုနှစ် နှောင်းပိုင်းကာလတွင်လည်း မိုင်းဝီးဒေသခံ အမျိုးသား ၁၅ ဦး ထက်မနည်း မူးယစ်ဆေးဝါး အကြောင်းပြချက်ဖြင့် ဖမ်းဆီးခေါ်ဆောင်သွားပြီး မိုင်းခက်ရွာ ဘက်ရှိ TNLA တပ်ဖွဲ့ပိုင် လယ်များမှ စပါးများကို ကောက်ရိတ်ခိုင်းကြောင်း သိရသည်။

ထို့အပြင် ယခုမေလ အစပိုင်းမှာလည်း မိုင်းဝီးဒေသမှ စစ်ဘေးရှောင်စခန်းအတွင်း (TNLA) တပ်သားများက ဝင်ရောက်နေထိုင်ပြီး စစ်ရှောင်များထံမှ ဆန် တောင်းယူမှု ရှိခဲ့သည်။