သျှမ်းပြည် လားရှိုးမြို့နယ်တွင် တစ်ရက်အတွင်း အိမ်ခြေမဲ့အလောင်း ၃ လောင်းတွေ့ရှိထားသည့်အနက် တစ်လောင်းတွင် ကိုဗစ်ပိုး တွေ့ရှိကြောင်း စုံစမ်းသိရသည်။
ယမန်နေ့ (မေလ ၂၃) ရက်တွင် လားရှိုးမြို့ ရပ်ကွက် ၄ အတွင်းရှိ ပန်အုပ်ကျောင်းတွင် အသက် (၆၅) နှစ်အရွယ် အမျိုးသားတစ်ဦး၏ အလောင်း၊ ရပ်ကွက် ၁ အတွင်း မြို့ပတ်လမ်းနှင့် ရေကန်လမ်းထောင့်တွင် သေဆုံးနေလျက်ရှိ အမျိုးသားတစ်ဦး၏ အလောင်းနှင့် ရပ်ကွက် ၆ စိန်ပန်းလမ်းပေါ်၌ အင်္ကျီမပါ သေဆုံးနေလျက်ရှိ အမျိုးသားတစ်ဦး၏ အလောင်း စုစုပေါင်း (၃) လောင်းတွေ့ရှိထားသည်။
အဆိုပါ အိမ်ခြေမဲ့ အလောင်း ၃ လောင်းအနက် ရပ်ကွက် ၁ အတွင်း မြို့ပတ်လမ်းနှင့် ရေကန်လမ်းထောင့်မှ တွေ့ရှိထားသည့် အမျိုးသားတစ်ဦး၏ အလောင်းကို ဆေးရုံ၌ စစ်ဆေးမှုပြုလုပ်နေစဉ် ကိုဗစ်ကူးစက်မှုရောဂါ တွေ့ရှိထားကြောင်း ကမ္ဘောဇ နာရေးနှင့် လူမှုကူညီရေးအသင်းထံမှ သိရသည်။
“ ပန်အုပ်ဘုန်ကြီးကျောင်းထဲက တစ်ယောက်တော့ ပုံမှန်နေတိုင်း သူထမင်းလာလာစားတယ်။ မနေ့က ၁၀ နာရီခွဲလောက် လာတယ်။ ထမင်းစားဖို့လာတာလား မသိဘူး။ အဲ့မှာ ထိုင်စောင့်နေရင်းနဲ့ ရုတ်တရက် ဆုံးသွားတာ။ ရပ်ကွက် ၁ မြို့ပတ်လမ်းကတော့ တွေ့တဲ့တစ်ယောက်တော့ သူကအိမ်ခြေရာမဲ့နေရင်း ဆုံးသွားတာ။ ဆုံးသွားတော့ နယ်ထိန်းကိုအကြောင်းကြားပြီးဆေးရုံပို့တော့ ကိုဗစ်တွေ့တယ် “ ဟု ၎င်း လူမှုကူညီရေးအသင်းမှ တာဝန်ခံတစ်ဦးက ပြောသည်။
အလားတူ လားရှိုးမြို့ ရပ်ကွက် ၆ အတွင်း စိန်ပန်းလမ်းပေါ်မှ အင်္ကျီမပါ သေဆုံးနေလျက်ရှိသည့် အမျိုးသားတစ်ဦး၏ အလောင်းကိုထပ်တွေ့ရှိထားပြီး ၎င်းကိုလားရှိုးလူငယ်များ လူမှုကူညီရေးအသင်းမှ သွားရောက်ကူညီခဲ့သည်။
ထို့အပြင် လားရှိုးမြို့ ပြည်သူ့ဆေးရုံတွင် ယခုရက်တပတ်အတွင်း သေသွားသည့် အိမ်ခြေမဲ့ အမျိုးသားတစ်ဦး အပါအဝင် နေမကောင်း၊ မကျန်းမာသည့် ပြည်သူတစ်ဦးလည်း စစ်ဆေးမှုပြုလုပ်ရာမှာ ကိုဗစ်-၁၉ ကူးစက်မှု ရောဂါတွေ့ရှိထားကြောင်း သိရသည်။
စစ်တပ်က အာဏာသိမ်းပြီးနောက်ပိုင်း လားရှိုးမြို့တွင် ရွှေ့ပြောင်းအလုပ်သမားများ၊ လူနေထူထပ်မှု များလာသည်နှင့်အမျှ မူးယစ်ဆေးဝါးသုံးစွဲပြီး အိမ်ခြေမဲ့အဖြစ် နေထိုင်သူများလည်း ပေါများလာနေရာသည်။
