သျှမ်းလက်နက်ကိုင် တပ်ဖွဲ့ (၂) ဖွဲ့ တိုက်ပွဲဖြစ်ပွားမှုကြောင့် သျှမ်းလူထုများသည် ထိုင်းနယ်စပ်သို့ ထွက်ပြေးလာရပြီး ကလေးများ ကိုရင်ဝတ်ကာ ပညာဆက်လက် သင်ကြားနေရကြောင်း စုံစမ်းသိရသည်။

သျှမ်းတပ် ၂ တပ်သည် သျှမ်းပြည်တောင်ပိုင်း ဆနင်းတောင်၊ လဲချား၊ မိုင်းကိုင်၊ မိုင်းနောင် နှင့် ကျေးသီး စသည့် ကျေးရွာများမှ ပြည်သူများသည် နေရပ်စွန့်ပြီး မြန်မာ – ထိုင်းနယ်စပ်ဒေသ ချင်းမိုင်ခရိုင် ဝိန်းဟဲန်မြို့နယ် ပိန်းလုံကျေးရွာအုပ်စုရှိ လတ်တိုင်ရွာမှ ဝပ်ဖှဝိန်းအင်းကျောင်းတိုက်သို့ လာရောက် ခိုလှုံကြသည်။

လက်ရှိမှာ ထိုကလေးငယ် စုစုပေါင်း (၆၀) ခန့်သည် ဝပ်ဖှဝိန်းအင်းကျောင်းတိုက်၌ ကိုရင်ဝတ်ပြီး ပညာဆက်လက် သင်ကြား နေကြောင်း ဆရာတော်က မိန့်ကြားသည်။

“ သျှမ်းတပ် ၂ တပ် တိုက်ပွဲကြောင့် ထွက်ပြေးလာရတဲ့ စစ်ဘေးရှောင်တွေပေါ့။ ဆနင်းတောင်၊ လဲချားဖက်က လာတာများတယ်။ သူတို့ ထွက်ပြေးလာတော့ ဘယ်နေရာကို ဆက်သွားရမှန်းမသိ၊ ပတ်စပို့ကလည်း မရှိဘူး။ သူများလည်း အလုပ်မခေါ်ဘူး။ ဆရာတော်တို့ ကျောင်းတိုက်ကျတော့ ကလေးငယ်တွေကို လက်ခံပြီး ကူညီတယ်။ ဖြစ်ချင်တော့ သူတို့ မိဘတွေကလည်း လာအပ်ထားတော့ ဆရာတော်တို့လည်း လက်ခံထားရတယ် “ ဟု ဆရာတော်က မိန့်ကြားသည်။

မြန်မာ -ထိုင်း နယ်စပ်ဒေသရှိ ဝပ်ဖှဝိန်းအင်းကျောင်းတိုက်သည် မိဘမဲ့ ကလေးငယ်များကို လက်ခံထားပြီး ပညာသင်ကြားပေးနေသည့် ပရဟိတကျောင်းတစ်ခုဖြစ်သော်လည်း တရားဝင် စစ်ဘေးရှောင် ကလေးငယ်များကို ကူညီထောက်ပံ့ပေးမည့် ပရဟိတကျောင်းအဖြင့် ထိုင်းအစိုးရ မသတ်မှတ်ထားကြောင်း သိရသည်။

အဆိုပါ တရားဝင် ပရတိတကျောင်း မသတ်မှတ်ထားသည့်အတွက် ထိုင်းနိုင်ငံ အစိုးရထံမှ ကူညီထောက်ပံ့မှုလည်း မရရှိကြောင်း ဆရာတော်မှ မိန့်ကြားသည်။

“ဆရာတော်တို့ ကျောင်းတိုက်က ထိုင်းနယ်မြေထဲမှာ ရှိတယ်ဆိုပေမယ့် တရားဝင်တော့ မဖြစ်သေးဘူး။ တခြားကျောင်းတွေလို ထိုင်း အစိုးရထံက ကူညီထောက်ပံ့မှုလည်း မရဘူး။ ပြီးတော့ ဒီကျောင်းတိုက်က ကလေးငယ်တွေကို ပညာသင်ကြားပေးစေချင်တယ်ဆိုတဲ့ ဆရာ၊ ဆရာမ တွေကလည်း အထောက်အထား၊ ပတ်စပို့တွေ မရှိရင် လာသင်ပေးလို့ မရပြန်ဘူး။ ဆရာတော်တို့ကလည်း ဒီက မြေဂရန်တွေ မရှိတော့ တရားဝင် အဖြစ် လုပ်ဖို့လည်း ခက်ခဲတယ် “ ဟု ဆရာတော်က မိန့်ကြားသည်။

ယခင်က မြန်မာ – ထိုင်း နယ်စပ်ဒေသရှိ ဝပ်ဖှဝိန်းအင်းကျောင်းတိုက် နှင့် ကုန်းကျော် သျှမ်းစစ်ဘေးရှောင်စခန်းသည် နိုင်ငံတကာ INGO၊ NGO မှ ကူညီထောက်ပံ့မှု ရရှိခဲ့သော်လည်း ၂၀၁၇ ခုနှစ်မှစပြီး ထောက်ပံ့မှု ရပ်ဆိုင်းသွားခဲ့ပြီးနောက် လှုမှုအခြေပြု အဖွဲ့အစည်းများမှ ကိုယ့်နည်းကိုယ်ဟန်ဖြင့် ရိက္ခာအလှူခံကာ စစ်ဘေးရှောင် ကလေးငယ်များကို ထောက်ပံ့ပေးကြောင်း သိရသည်။