Thursday, April 18, 2024

ပန်ဆိုင်းမြို့ လဝက မှတ်ပုံတင် လုပ်ရန် ပိုက်ဆံ ကျပ်သိန်းချီ တောင်းယူနေ

Must read

သျှမ်းပြည် မူဆယ်ခရိုင် ပန်ဆိုင်းမြို့ (ကြူကုတ်) တွင် ဒေသခံများ မှတ်ပုံတင် လုပ်ဆောင်ရန်အတွက် လူဝင်မှု ကြီးကြပ်ရေးမှူးရုံး (လဝက) မှ ပိုက်ဆံ ကျပ်သိန်းချီ တောင်းယူနေကြောင်း သတင်းသိရသည်။

ပန်ဆိုင်း လဝက ရုံး

ယခင်အချိန်များတွင် ဒေသခံများအနေဖြင့် မှတ်ပုံတင် လုပ်ပါက ငွေကျပ် တစ်သောင်းခန့်သာ ကုန်ကျ သော်လည်း လက်ရှိ အချိန်တွင် ၃ သောင်းကျပ်မှ ၁ သိန်းကျပ် အထိ ကုန်ကျစားရိတ်ရှိနေကြောင်း ဒေသခံများက သျှမ်းသံတော်ဆင့်ကို ပြောသည်။

“အရင်တုန်းက မှတ်ပုံတင်လုပ်မယ်ဆိုရင် ၅ ထောင်ကနေ တစ်သောင်းကျပ်လောက်ပဲ ကုန်တာ၊ ဒါပေမဲ့ အခုက သုံးသောင်းကျပ်ကနေ တစ်သိန်းကျပ် အထိ တောင်းနေကြတာ။ သူတို့ ပြောတာက စာရွက်စာတမ်းဖိုး ၊ လားရှိုး ကို တင်ပြဖိုးတွေ ပါတယ်လို့ ပြောပြီးတောင်းတယ်” ဟု ပန်ဆိုင်းမြို့မှ မှတ်ပုံတင် လုပ်သည့် အမျိုးသား တစ်ဦး က သျှမ်းသံတော်ဆင့်ကို ပြောသည်။

ပန်ဆိုင်း လဝက ရုံး

ထို့အပြင် ဒေသခံအချို့သည် ဗမာစကား မကျွမ်းကျင်ကြသည့်အတွက် ပွဲစားကို ငှားရမ်းပြီး မှတ်ပုံတင်ကို လုပ်ဆောင်နေရသည်။

“တချို့ဒေသခံတွေက သျှမ်းလိုပဲ တတ်ကြတယ်၊ ဗမာစကားကို မကျွမ်းကြဘူး၊ ပြီးတော့ ရုံးလုပ်ငန်းတွေ ဘာတွေ လည်း နားမလည်တော့ ပွဲစားငှားပြီး လုပ်ကြတာ ရှိတယ်၊ နောက်ပြီးတော့ တရုတ်ဘက် အလုပ် သွားလုပ်တဲ့ သူတွေပေါ့၊ သူတို့က အဲ့ဘက်မှာ အိမ်ထောင်ကျ ကလေးတွေရပြီး သူတို့ ကလေးတွေကို ဒီဘက် မှတ်ပုံတင်လုပ်ဖို့ ခေါ်လာတဲ့ အချိန်ကြလည်း အရမ်းခက်ခဲတာ၊ အဲ့လိုမျိုးတွေဆို ပိုက်ဆံပိုကုန်တယ်” ဟု အထက်ပါ ပုဂ္ဂိုလ်က သျှမ်းသံတော်ဆင့်ကို ပြောသည်။

ယင်းကဲ့သို့ တရုတ်ပြည်ဘက် အလုပ်သွားလုပ်ပြီး ပြန်လာသူများကို တရုတ်ငွေ ယွမ် ၁၀၀၀ မှ ၂၀၀၀ ထိ တောင်းခံနေကြောင်း ဒေသခံများက သျှမ်းသံတော်ဆင့်ကို ပြောသည်။

ပန်ဆိုင်း

တောင်ပေါ်ဒေသရှိ ရွာများတွင် တိုင်းရင်းသား လက်နက်ကိုင်တပ်ဖွဲ့တို့၏ တပ်သားသစ် စုဆောင်းမှုကြောင့် မြို့ပေါ် ပြောင်းရွှေ့လာသည့် ဒေသခံများလည်း အိမ်ထောင်စုစားရင်းများ၊ မှတ်ပုံတင်များ ကျန်ခဲ့မှုတွေကြောင့် အသစ် ပြန်လည် လုပ်ဆောင်ရခြင်းဖြစ်ကြောင်းလည်း သိရသည်။

လက်ရှိအချိန်တွင် မှတ်ပုံတင် လုပ်ရန်အတွက် ပေးဆောင်ရသည့် ကုန်ကျ စားရိတ်သည် များပြားလွန်းသည့် အတွက် အခက်တွေ့နေရကြောင်းလည်း ဒေသခံများက ဆက်ပြောသည်။

“တောင်းတဲ့ ပမာဏက များတော့လည်း ပေးဖို့အတွက် အခက်အခဲ ရှိနေတာပေါ့။ ပုံမှန်တောင်းရင် ဘာမှ မဖြစ်ဘူး။ အခုကတော့ သိန်းနဲ့ချီပြီး တောင်းကြတာ။ တရုတ်ငွေ ယွမ် တစ်ထောင် နှစ်ထောင် ဆိုလည်း နည်းတာ မဟုတ်ဘူး” ဟု ဒေသခံများက ဆက်ပြောသည်။

ပန်ဆိုင်းမြို့နယ်သည် ဝမ်းတိန်ဘက်မှ တရုတ်လူမျိုးများ နှင့် ဆက်စပ်ပတ်သက်နေသည့် လောင်းကစားဝိုင်းများ ရှိနေပြီး သွားရောက် ဆော့ကစားလိုသူများကို လောင်းကစားရုံမှ ကြို၊ ပို့မှသာ သွားရောက်နိုင်ကြောင်းလည်း သိရသည်။

Leave a Comments

- Advertisement -spot_img

Latest article