မြန်မာ – ထိုင်းနယ်စပ်ဒေသဖြစ်သည့် သျှမ်းပြည် တာချီလိတ်မြို့တွင် လိုင်စင်မဲ့ မော်တော်ယာဉ်များအတွက် လမ်းဘေး၌ ဖောင်းကြွနံပါတ်ပြားအတု ရောင်းချပေးမှုရှိနေကြောင်း စုံစမ်းသိရှိရသည်။

စစ်ကောင်စီလက်အောက်ခံ ကုန်းလမ်းပို့ဆောင်ရေး ညွှန်ကြားမှု ဦးစီးဌာန (ကညန) ၏ ထုတ်ပြန်ကြေညာချက် အရ မေလ ၈ ရက်နေ့မှ စ၍ ၁၅ ရက် ကာလအတွင်း ဖောင်းကြွနံပါတ်ပြား မလဲရသေးသည့် ယာဉ်များကို စတင်အရေးယူမည်ဟု ကြေညာထားသည်။

တာချီလိတ်မြို့တွင် မေလ ၁၆ ရက်မှ စတင်ပြီး ဖောင်းကြွမလဲရသေးသည့် မော်တော်ယာဉ်များကို စတင်စစ်ဆေး နေလျက်ရှိပြီး ယမန်နေ့ မေလ ၁၇ ရက်၌ တာချီလိတ်မြို့နယ် အမှတ် (၁) ချစ်ကြည်ရေးတံတားတွင် ကညန၊ ပို့ဆက်နှင့် ယာဉ်ထိန်းရဲတပ်ဖွဲ့တို့မှ ပူးပေါင်းပြီး စစ်ဆေးနေကြောင်း တာချီလိတ် ဒေသခံတစ်ဦးက ပြောသည်။

“ မနေ့ကတော့ တံတားမှာ စစ်ဆေးနေတာ တွေ့တယ်၊ မြို့ထဲမှာတော့ ဝင်မစစ်ဘူး။ လိုင်စင်ရှိတဲ့ကားမှ တံတားကို ဖြတ်လို့ရတာလေ။ အဲ့ကြောင့် သူတို့က အဲ့တံတားမှာ သွားစောင့်ပြီး စစ်ဆေးတာ။ မြို့ထဲ၊ လမ်းထဲမှာ ဖောင်းကြွနံပါတ်ပြားတွေ မလဲရသေးတဲ့ကားတွေ အများကြီးပဲ။ သူတို့က ဒါတွေ အကုန်လုံး လိုက်ပြီး မစစ်နိုင်ပါဘူး “ ဟု ၎င်းက ပြောသည်။

စစ်တပ် အာဏာသိမ်းပြီးနောက်ပိုင်း တာချီလိတ်မြို့သို့ ရွှေ့ပြောင်းပြီး အလုပ်လုပ်ကိုင်နေသော အလုပ်သမား၊ လူနေထူထပ် များလာသည်နှင့်အမျှ လိုင်စင်မဲ့မော်တော်ကား၊ ဆိုင်ကယ်များကို အသုံးပြုနေသူ ပျှမ်းမျှ ၈၀ ရာခိုင်နှုန်းရှိနေကြောင်းလည်း သိရသည်။

အဆိုပါ ဖောင်းကြွနံပါတ်ပြားအသစ် မလဲရသေးသည့် ယာဉ်များကို ဖမ်းဆီးအရေးယူမည်ဆိုသည့် သတင်းကြောင့် တာချီလိတ်မြို့တွင် လိုင်စင်မဲ့ယာဉ်များအတွက် လမ်းဘေး၌ ဖောင်းကြွနံပါတ်ပြားအတု ရောင်းချပေးမှု ရှိနေကြောင်း သိရသည်။

“ ဝစ်တောက် (လိုင်စင်မဲ့ကား) ကားတွေက အတုပေး လုပ်ပေးတာပေါ့။ အတုလုပ်ပြီး လမ်းဘေးမှာ ရောင်းနေတာလည်း ရှိတယ်။ တကယ်တော့ ဖောင်းကြွနံပါတ်ပြားတွေက လိုင်စင်ရှိတဲ့ကားတွေကို လုပ်ပေးတာ။ ဝစ်တောက် ကားတွေကို လုပ်ပေးမယ်ဆိုလည်း အတုတွေဘဲ လုပ်ပေးနိုင်မှာပေါ့။ တာချီလိတ်မှာ ဝစ်တောက် ကားတွေဘဲ စီးကြတာများတယ်။ တမြို့လုံးမှာ ဝစ်တောက် ကားတွေက ၈၀ ရာခိုင်နှုန်းလောက် ရှိတယ် “ ဟု ၎င်းက ထပ်လောင်းပြောသည်။

ယင်း ဖောင်းကြွနံပါတ်ပြားအတု ရောင်းချမှုသည် တာချီလိတ်မြို့အပြင် တောင်ကြီးမြို့နယ် အေးသာယာမြို့တွင်လည်း ဖောင်းကြွနံပါတ်ပြားအတု ရောင်းချမှုရှိနေပြီး ဖောင်းကြွနံပါတ်ပြား တစ်ချပ်ကို ကျပ်ငွေ ၅၀,၀၀၀ ကျပ်ဖြင့် လုပ်ပေးနေကြောင်း သိရသည်။

ထို့အပြင် ဖောင်းကြွနံပါတ်ပြား မလဲရသေးသည့် ယာဉ်များကို ဖမ်းမိပါက တစ်စီးကို ဒဏ်ငွေ ၅,၀၀၀ ကျပ် ပေးဆောင်ရမည်ဖြစ်ပြီး သတ်မှတ်ထားသည့် ၁၅ ရက်အတွင်း မလဲရသေးပါက ကား၏ သက်သေခံလက်မှတ် (ဝှီးတက်)ကို သိမ်းမည်ဟု ထုတ်ပြန်ကြေညာချက်တွင် ရေးသားဖော်ပြထားသည်။

အလားတူ တာချီလိတ်မြို့တွင် ဖောင်းကြွနံပါတ်ပြား မတပ်ရသေးသည့် ကားတွေကို လတ်တလော၌ ဖမ်းပြီး ဝှီးတက်တွေကို သိမ်းယူထားမိကြောင်း၊ ဖောင်းကြွနံပါတ်ပြား တပ်ဆင်ထားပြီးမှသာ ပြန်ပေးမည်ဖြစ်ကြောင်းလည်း စစ်ကောင်စီ လက်အောက်ခံ တာချီလိတ် မဏ္ဍိုင်သတင်းမှ ထုတ်ဖော်ရေးသားထားသည်။