သျှမ်းပြည် တောင်ကြီးခရိုင် ပင်လောင်းမြို့နယ် နမ့်နိန်းရွာတွင် တိုက်ပွဲဖြစ်ပွားစဉ်အတွင်း စစ်ကောင်စီမှ တိုက်လေယာဉ်ဖြင့် ဗုံးကြဲတိုက်ခိုက်ခဲ့မှုကြောင့် အရပ်သားနေအိမ် ၁၃၀ ခန့် မီးလောင်ပြာကျသွားကြောင်း စုံစမ်းသိရှိရသည်။

ပြီးခဲ့သည့် ဖေဖော်ဝါရီ ၂၄ ရက်မှ ယနေ့ မေလ ၁၇ ရက်ထိ သုံးလနီးပါးကြာ စစ်ကောင်စီ နှင့် ပြည်သူ့ကာကွယ်ရေး PDF ပူးပေါင်းတပ်ဖွဲ့တို့ တိုက်ပွဲဖြစ်ပွားခဲ့သည့် ဒေသအသီးသီး၌ စစ်ကောင်စီသည် လေကြောင်းအသုံးပြုပြီး ဆေးရုံ၊ ဆေးခန်း အပါအဝင် ဘုန်းကြီးကျောင်း၊ အရပ်သားနေအိမ်ကို ပစ်မှတ်ထားပြီး တိုက်ခိုက်နေလျက်ရှိကြောင်း ပြည်သူ့ကာကွယ်ရေးတပ်ဖွဲ့ထံမှ သိရသည်။

အလားတူ ပင်လောင်းမြို့နယ် နမ့်နိန်းကျေးရွာတွင်လည်း စစ်ကောင်စီမှ တိုက်လေယာဉ်ဖြင့် ဗုံးကြဲတိုက်ခိုက်ခြင်းကြောင့် သုံးလအတွင်း အရပ်သားနေအိမ် ၁၃၀ လုံးခန့် မီးလောင်ပြာကျသွားကြောင်း နေရပ်ပြန်သွားသည့် ဒေသခံတစ်ဦးက ပြောသည်။

“ အိမ်ခြေတော့ များတယ်၊ ၃၈၀ လောက်ရှိမယ်။ မီးထဲပါသွားတာ ၁၃၀ လုံးလောက်ရှိတယ်။ ကလေးတွေနဲ့ ရွာကိုစထွက်လာပြီးကတည်းက နောက်ပိုင်းအကြောင်းတွေ သိပ်မသိရတော့ဘူး။ အခုတော့ ပြန်မရနိုင်တော့မယ့် အတူတူ ပျော်ပျော်ဘဲ ရှေ့ဆက်အားတင်းထားရမှာပေါ့ “ ဟု ၎င်းက ပြောသည်။

အဆိုပါ နမ့်နိန်းရွာတွင် စုစုပေါင်း အိမ်ခြေ ၃၈၀ ခန့်ရှိပြီး လက်ရှိ မီးလောင်ပြာကျသွားသည့် အိမ်ခြေဟာ ၁၃၀ လုံးခန့်ရှိကြောင်း သိရသည်။

ထို့အပြင် စစ်ကောင်စီသည် သျှမ်း – ကယားနယ်စပ်ဒေသရှိ ဖယ်ခုံ၊ မိုးဗြဲ နှင့် ပင်လောင်း မြို့နယ်တွင် နေ့စဉ်နီးပါး စစ်ကောင်စီ၏ လေယာဉ်ပျံဝဲနေဆဲရှိပြီး စစ်ကောင်စီက ဆေးရုံ၊ ဆေးခန်း အပါအဝင် အရပ်သားနေအိမ်ကို ပစ်မှတ်ထားပြီး ဗုံးကြဲတိုက်ခိုက်နေလျက်ရှိသောကြောင့် နေရပ်သို့ မပြန်နိုင်သေးကြောင်း ဖယ်ခုံစစ်ဘေးရှောင်တစ်ဦးက ပြောသည်။

“ အခုက အိမ်ကို ပြန်သွားလို့ ရပေမယ့်လည်း စစ်ကောင်စီက ဖယ်ခုံမြို့ပေါ်ကနေ အရှေ့ဖက်ခြမ်းက ရွာတွေကို လက်နက်ကြီးနဲ့ထုတယ်။ အခုပြန်သွားရင် ကလေးငယ်တွေလည်း ပါတော့ စိုးရိမ်ရတယ်။ နေအိမ်ပေါ်ကို လက်နက်ကြီး ကျပေါက်ကွဲမလား စိုးရိမ်ရတယ်။ လက်နက်ငယ်တွေပဲ မဟုတ်ဘူး၊ လက်နက်ကြီးတွေပါတော့ စိုးရိမ်ရတာပေါ့ “ ဟု ၎င်း စစ်ဘေးရှောင်တစ်ဦးက ပြောသည်။

ပြီးခဲ့သည့် မတ်လ ၁၁ ရက်က စစ်ကောင်စီသည် နိမ့်နိန်းကျေးရွာဘုန်းကြီးကျောင်းတွင်
ခိုလှုံနေသည့် ဘုန်းကြီး ၃ ပါး နှင့် အရပ်သား ၁၈ ဦး သတ်ဖြတ်ခဲ့သည်။

စစ်တပ် အာဏာသိမ်းပြီးနောက်ပိုင်း သျှမ်း – ကယားနယ်စပ်ဒေသ တလျောက်ရှိ ပင်လောင်း၊ ဖယ်ခုံ နှင့် မိုးဗြဲ မြို့နယ်တွင် လက်နက်ကိုင် ခုခံမှုကို စစ်ကောင်စီတပ်ဖွဲ့မှ အပြင်းအထန် နှိမ်နင်းလာမှုကြောင့် ပြီးခဲ့သည့် ၂၆ လအတွင်း အရပ်သား ၄၅၂ ဦး သေဆုံးခဲ့ကြောင်း တိုးတက်သော ကရင်နီပြည်သူ့အင်အားစု PKPF က သတင်းထုတ်ပြန်ထားသည်။

အရပ်သားသေဆုံးမှု ဖြစ်စဉ်တွင် စစ်ကောင်စီမှ လက်နက်ကြီး နှင့် လေကြောင်းဖြင့်ပါ တိုက်ခိုက်မှုကြောင့် သေဆုံးရခြင်းဖြစ်ကြောင်း သိရသည်။

စစ်ကောင်စီ၏ လေကြောင်းတိုက်ခိုက်မှုကို PKPF ၏ စာရင်းမှတ်တမ်းအရ ၂၀၂၁ ခုနှစ်တွင် ၂ ကြိမ်၊ ၂၀၂၂ ခုနှစ်တွင် ၁၈၂ ကြိမ် နှင့် ယခု ၂၀၂၃ ခုနှစ် ပထမ (၄) လအတွင်းမှာ လေကြောင်းတိုက်ခိုက်မှု ၁၇၉ ကြိမ် မြင့်တက်လာကြောင်း သိရသည်။