သျှမ်းပြည် ကျောက်မဲခရိုင်၊ နောင်ချိုမြို့နယ်အတွင်းတွင် ထိတွေ့တိုက်ပွဲများ ငြိမ်သက်သွားသော်လည်း ဒေသခံများက တောင်ယာ အလုပ်သွားရန် ကြောက်ရွံ့နေရကြောင်း သတင်းသိရသည်။

ဧပြီလနှောင်းပိုင်းမှ စတင်ကာ နောင်ချိုမြို့နယ် ခေးနင်းကျေးရွာအုပ်စု (ဒိုးပင်) မှ ဒေသခံများသည် လယ်ယာ သွားလမ်းတစ်လျောက် နှင့် လုပ်ငန်းခွင် အနီးပတ်ဝန်းကျင်၌ မိုင်းထောင်ထားသည့် အနေအထားများ တွေ့နေရသဖြင့် တောင်ယာ၊ လုပ်ငန်းခွင်သို့ မသွားရဲကြောင်း ဒေသခံများက သျှမ်းသံတော်ဆင့်ကို ပြောသည်။

“ဝမ်းစာရှာဖွေ စားသောက်ရေး ဖြစ်တယ်ဆိုပေမယ့် အဲ့လို မိုင်းထောင်ထားတာတွေ တွေ့နေရတော့ ကြောက်တာပေါ့၊ မိုင်းနင်းမိမှာ ၊ ပေါက်ကွဲမှာကို ကြောက်တယ်၊ အကြောက်ဆုံးကတော့ အိမ်နား တစ်ဝိုက် မိုင်းတွေပေါက်ကွဲမှာကို ကြောက်တယ်၊ အခုလည်း မိုင်းထောင်ထားတာ တော်တော်များ တွေ့နေရတယ်”ဟု ခေးနင်းကျေးရွာအုပ်စုမှ ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။

ယင်းကဲ့သို့ မိုင်းများထောင်ထားမှုကြောင့် လုပ်ငန်းခွင် မသွားနိုင်ကြသည့်အတွက် ဒေသခံများအနေဖြင့် နောက်နှစ်အတွက် စားဝတ်နေရေး မလုံလောက်မှာကို စိုးရိမ်ရကြောင်းလည်း ဒေသခံများထံမှ သိရသည်။

ထို့အပြင် ရက်သတ္တပတ်အတွင်း ခေးနင်းကျေးရွာအုပ်စု (ဒိုးပင်) မှ တစ်နေ့လျှင် ဗုံး ၂ လုံး ၃ လုံးထက်မနည်း နေ့စဥ်နီးပါး ပေါက်ကွဲမှု ရှိနေကြောင်းလည်း ဒေသခံများက ဆက်ပြောသည်။

“နေ့စဥ်နီးပါး မိုင်းပေါက်ကွဲတဲ့ အသံတွေက ၂ – ၃ကြိမ်လောက် ကြားနေရတယ်၊ ကျွဲတွေ နွားတွေက သွားနင်းမိပြီး တော့ ပေါက်ကွဲတာလို့ထင်တယ်၊ အခုချိန်မှာ စားကျက်ထဲ တောထဲကို လွတ်သွားတဲ့ ကျွဲ ၊ နွားတွေ သေဆုံးမှု ဘယ်လောက်ရှိနေမှန်း မသိနိုင်တော့ဘူး၊ ရွာသားတွေကလည်း မသွားကြည့်ရဲဘူး၊ ကိုယ်တိုင်က မိုင်းသွားနင်းမိမှာကြောက်လို့လေ” ဟု အထက်ပါ အမျိုးသားက ဆက်ပြောသည်။

မိုင်းနင်းမိပေါက်ကွဲမှုကြောင့် ဒဏ်ရာရသည့် ဒေသခံများ၏ ကျွဲ၊ နွား များတချို့သည် ကုသမှု ခံယူရပြီး ဒဏ်ရာပျောက်ကင်းမှု ရှိသော်လည်း တချို့က တောထဲမှာပင် သေဆုံးမှုလည်း အများအပြား ရှိလာကြောင်း ဒေသခံများက ပြောသည်။

ခေးနင်းကျေးရွာ အုပ်စုမှ ခေးနင်းကျေးရွာ (ဒိုးပင်) ၊ ကုန်းစံရွာ၊ ပိန်းအွယ်ရွာ၊ ခိုင်းမွန်ရွာ၊ လုံခန်ကျေးရွာ နှင့် ပန်ကိတ် (ဝၢၼ်ႈပၢင်ၵိုတ်ႈ) စသဖြင့် ရွာပေါင်း ၆ ရွာရှိနေပြီး ခေးနင်းရွာသား ၂ ဦးက မိုင်းနင်းမိ ဒဏ်ရာရထားကြောင်း သိရသည်။

ယင်းကဲ့သို့ မိုင်းထောင်ထားမှု၊ မိုင်းနင်းမိ ပေါက်ကွဲမှု များပြားနေသဖြင့် ဒေသခံများက လက်နက်ကိုင် တပ်ဖွဲ့များ လာဖြုတ်ပေးရန် တောင်းဆိုသာ်လည်း မည်သည့်လက်နက်ကိုင် တပ်ဖွဲ့မှ လာရောက်ကူညီ လုပ်ဆောင်ပေးခြင်း မရှိကြောင်း အသက် ၄၀ ကျော် အမျိုးသား တစ်ဦးက ပြောသည်။

“ဗမာစစ်တပ် (စစ်ကောင်စီ) က ရွာတွေထဲ ဝင်ထွက်သွားလာမှု ရှိနေတော့ မိုင်းတွေကို ဖြုတ်ပေးဖို့ ကျနော်တို့ ရွာသားတွေ တောင်းဆိုဖူးတယ်၊ ဒါပေမဲ့ သူတို့က မအားသေးဘူးတဲ့၊ PDF တွေကလည်း စစ်ကောင်စီတွေ ရှိနေရင် လာလို့ အဆင်မပြေဘူး၊ ထိတွေ့မှု ဖြစ်မှာစိုးလို့တဲ့” ဟု အသက် ၄၀ ကျော်အမျိုးသား တစ်ဦးက သျှမ်းသံတော်ဆင့်ကို ပြောသည်။

ပြီးခဲ့သည့် ဧပြီလ ၅ ရက်နေ့မှ ၁၂၂ ရက်နေ့အထိ ၁၈ ရက်တာ ကာလအတွင်းတွင် စစ်ကောင်စီ တပ်ဖွဲ့ နှင့် ပြည်သူ့ကာကွယ်ရေး ပူးပေါင်းတပ်ဖွဲ့ PDF တို့က နောင်ချိုမြို့နယ်အတွင်းတွင် ထိတွေ့တိုက်ပွဲ ပြင်းထန်စွာ ဖြစ်ပွားခဲ့သည်။

အဆိုပါ ထိတွေ့တိုက်ပွဲတွင် စစ်ကောင်စီတပ်ဖွဲ့သည် မြေပြင်စစ်အင်အား အများအပြားဖြင့် ၁၂၀ မမ လက်နက်ကြီးဖြင့်သော်လည်းကောင်း လေကြောင်းတိုက်ခိုက်မှု စစ်လေယာဥ်များဖြင့် သော်လည်းကောင်း PDF ပူးပေါင်းတပ်ဖွဲ့ကို ထိုးစစ်ဆင် တိုက်ခိုက်ခဲ့ခြင်း ဖြစ်သည်။

ယင်းတိုက်ပွဲကြားတွင် နေအိမ်ပေါ် လက်နက်ကြီး ကျရောက်ပေါက်ကွဲမှုကြောင့် ဧပြီလ ၅ ရက်နေ့တွင် အသက် ၁၁ လအရွယ် စိုင်းဝါဝါထွန်း ၊ အသက် ၁၄ နှစ်အရွယ် နန်းမအေး တို့ သေဆုံးခဲ့ရပြီး၊ ဧပြီလ ၁၁ ရက်နေ့တွင် အသက် ၇၀ ကျော်ရှိ လုင်းစန္ဒိမာလည်း လက်နက်ကြီး ထိမှန်သေဆုံးပြီး၊ ဧပြီ (၂၁) ရက်နေ့မှာ ကုလားကွဲကျေးရွာက နေအိမ်တစ်လုံးပေါ် လက်နက်ကြီးကျသဖြင့် အသက် ၅၂ နှစ်အရွယ် ဦးချစ်စိန် သေဆုံးခဲ့ရကြောင်း သိရှိရသည်။