သျှမ်းပြည် တာချီလိတ်မြို့ ပါလျှံ ၁ ရပ်ကွက်တွင် စိတ်ကျန်းမာရေး ချို့တဲ့နေသည့် အမျိုးသမီးတစ်ဦး ဆေးအလွန်အကျွံသောက်ပြီး အသက်ဆုံးရှုံးသွားကြောင်း စုံစမ်းသိရသည်။
ပြီးခဲ့သည့် မေလ ၁၂ ရက် ညပိုင်း ၁၀ နာရီအချိန်တွင် ပါလျှံ ၁ ရပ်ကွက်အတွင်း နေထိုင်သူ အမျိုးသမီးတစ်ဦးသည် စိတ်ကျန်းမာရေး ချို့တဲ့သည့်အတွက် စိတ်ကျရောဂါပျောက်ဆေး အေမီထရစ်တလင်း (Amitriptyline) ကို အလွန်အကျွံသောက်မိရာမှ သတိမေ့သွားခဲ့သဖြင့် တာချီလိတ်ပြည်သူ့ဆေးရုံကြီးသို့ အရေးပေါ်ပို့ဆောင်ပေးခဲ့သည်။
ထိုနောက် မေလ ၁၃ ရက် နံနက်အစောပိုင်းအချိန်တွင် ဆေးရုံကြီး၌ ဆေးဝါးကုသခံယူနေရင်း သေဆုံးသွားခဲ့ကြောင်း ၎င်းကိုသွားရောက်ကူညီသည့် လူမှုကူညီရေးအသင်းမှ ပြောသည်။
“ သူက စိတ်တည်ငြိမ်တဲ့ ဆေးကိုသောက်လိုက်တယ်လို့ ပြောတယ်ဗျ။ ကျနော်တို့ သွားခေါ်တဲ့ အချိန်က အပြင်ဆေးရုံတစ်ခုမှာ သူက ဆေးကုနေပြီ။ အဲ့ဒီ ဆေးရုံက မရလို့ ပြည်သူ့ဆေးရုံကြီးလွှဲလို့ ကျနော်တို့ သွားပို့ပေးတယ်။ ဆေးဝါးကုသနေရင်း ဆုံးသွားတယ် “ ဟု ၎င်း တာဝန်ခံတစ်ဦးက ပြောသည်။
အဆိုပါ သေဆုံးသွားသူဟာ အသက် ၂၂ နှစ် မယွန်းဝတီကျော်မင်း ဖြစ်ကြောင်း သိရသည်။
ထို့အပြင် စိတ်ကျရောဂါပျောက်ဆေးဖြစ်သည့် အေမီထရစ်တင်လင်း (Amitriptyline) ဆေးဝါးသည် စိတ်ဓာတ်ကျခြင်း၊ စိတ် အတက်အကျဖြစ်ခြင်း၊ စိုးရိမ်စိတ် များခြင်း နှင့် စိတ်ဖိအားများခြင်းကို သက်သေစေရန် နှင့် ကောင်းမွန်စွာ အိပ်စက်စေရန် အတွက် သောက်သုံးရခြင်းဖြစ်သည်။
“ဆေးသောက်မယ်လို့ မဆုံးဖြတ်ခင်မှာ ဆရာဝန် နဲ့ ဆေးရဲ့ ကောင်းကျိုးဆိုးပြစ်နဲ့ ဘယ်အချိန်မှာ သောက်ရင် အကောင်းဆုံး ဖြစ်မလဲဆိုတာကို ဆွေးနွေးတိုင်ပင်ပါ။ ဆေးကို ဆရာဝန် ညွှန်ကြားတဲ့အတိုင်း သောက်ပေးပါ။ ဆေးကြောင့် ထိခိုက်မှု နည်းစေဖို့အတွက် ဆရာဝန် ညွှန်ကြားချက် မပါဘဲ ကိုယ့်သဘောနဲ့ကိုယ် ဆေးပဏ လျော့တာ၊ ဆေးရပ်တာ၊ ဆေးပမာဏ တိုးတာတွေ မလုပ်ပါနဲ့ “ ဟု ဆေးဝါးကျွမ်းကျင်သူ ဆရာဝန်မှ လူမှုကွန်ရက်စာမျက်နှာပေါ်၌ သတိပေးထားသည်။
ထိုဆေးဝါးသည် ကိုယ်ဝန်ဆောင် မိခင်၊ ဆေးရဲ့ ပါဝင်ပစ္စည်း နှင့် ဓာတ်မတည့်သူများ၊ တခြားရောဂါအခံ ရှိသူများနှင့် တခြားစွဲသောက်နေသည့် ဆေးဝါးများ သောက်သုံးပါက စိတ်တိုစိတ်ဆတ်ခြင်း၊ ကတုန်ကရင် ဖြစ်စေနိုင်သည့်အပြင် တချို့မှာ စိတ်ပိုကျပြီး ကိုယ့်ကိုယ်ကို သတ်သေချင် စိတ်အထိ ဖြစ်လာနိုင်တယ်ကြောင်း လည်းသိရသည်။
Leave a Comments