သျှမ်းသံတော်ဆင့် (SHAN) သတင်းဌာန မှ အဖွဲ့ဝင် အဖြစ် ပါဝင်ထားသည့် Burma News International (BNI ) အဖွဲ့သည် ၂၀၂၃ ခုနှစ်အတွက် ဟီရိုရှီးမားဆုကို ဆွတ်ခူးရရှိကြောင်း သတင်းသိရသည်။
အဆိုပါ ဆုသည် BNI ၏ နှစ်အတော်ကြာအောင် ငြိမ်းချမ်းရေး တည်ဆောက်မှု အားထုတ်မှုများအပြင် ၂၀၂၁ စစ်အာဏာသိမ်းပြီးနောက်ပိုင်း လူ့အခွင့်အရေး နှင့် ဒီမိုကရေစီ အရေးအတွက် မဆုတ်မနစ် ကြိုးပမ်းဆောင်ရွက်မှုများကြောင့် ဟီရိုရှီးမားဆုကို ချီးမြှင့်ခြင်းဖြစ်ကြောင်း BNI ၏ မူဝါဒရေးရာကော်မတီ ဥက္ကဋ္ဌလည်းဖြစ်၊ ကရင်သတင်းစဥ် ဌာန KIC ၏ အယ်ဒီတာချုပ်လည်းဖြစ်သည့် နန်းဖောကေ က သျှမ်းသံတော်ဆင့်ကို ပြောသည်။
“ဒီ ဟီရိုရှီးမားဆုက တစ်ဦးတစ်ယောက်ချင်းစီကိုပေးတာ ရှိတယ်၊ အဖွဲ့အစည်း ကွန်ရက်ကို ပေးတာရှိတယ်၊ BNI ကို ပေးတာကျတော့ အစုအဖွဲ့ ကွန်ရက်အနေ နဲ့ ပေးတာပေါ့၊ တစ်နိုင်ငံလုံးမှာရှိတဲ့ ဒေသအသီးသီးက သတင်းတွေ ကို မတူကွဲပြားတဲ့ တိုင်းရင်းသား ဘာသာစကားတွေ နဲ့ ထုတ်လုပ်သွားနိုင်တာရယ်၊ တိုင်းသူပြည်သားတွေ လူ့အခွင့် အရေး ချိုးဖောက်ခံရတာတွေ၊ စစ်ကောင်စီ ကျူးလွန်နေတဲ့ ရာဇဝတ်မှုတွေကို အများပြည်သူ နဲ့ နိုင်ငံတကာ သိအောင် သတင်းအားဖြင့် အစီရင်ခံသွားတဲ့အပေါ် ဒီဆုကို ပေးအပ်ခံရတာ ဖြစ်ပါတယ်၊နှစ်ပေါင်း ၂၀ အတွင်း အောင်မြင်မှုတစ်ခုလို့ ပြောလို့ရတာပေါ့” ဟု နန်းဖောကေ ကပြောသည်။
Edita and Morris Hiroshima Foundation for Peace and Culture မှ ချီးမြှင့်သည့် ၂၀၂၃ အတွက် ဆုကို မြန်မာနိုင်ငံမှ Burma News International (BNI) အဖွဲ့က ရရှိခြင်းဖြစ်သည်။
BNI မှ ရရှိသော ၂၀၂၃ ခုနှစ် ဟီရိုရှီးမားဆုအတွက် အမေရိကန် ဒေါ်လာ ၅၀,၀၀၀ (ငါးသောင်း) ရရှိမည် ဖြစ်ပြီး ဆုပေးပွဲ အခမ်းအနားကို ၂၀၂၃ ခုနှစ် စက်တင်ဘာလ အတွင်း၌ ကျင်းပပြုလုပ်သွားမည်ဟုလည်း သတင်း သိရသည်။
ဟီရိုရှီးမားဆု ရရှိခြင်းသည် BNI အဖွဲ့ အတွက်သာမက မြန်မာနိုင်ငံရှိ လွတ်လပ်သော သတင်း မီဒီယာများ အတွက် ခွန်အားဖြစ်စေကြောင်းလည်း BNI ၏ မူဝါဒ ရေးရာကော်မတီ ဥက္ကဋ္ဌလည်းဖြစ်၊ ကရင်သတင်းစဥ်ဌာန KIC ၏ အယ်ဒီတာချုပ်လည်းဖြစ်သည့် နန်းဖောကေ သျှမ်းသံတော်ဆင့်ကို ဆက်ပြောသည်။
“ဒီလို ဆုရရှိခြင်းအားဖြင့် BNI အတွက် သာမက တခြား မြန်မာနိုင်ငံရဲ့ လွတ်လပ်တဲ့ သတင်းမီဒီယာတွေ အတွက် ခွန်အားရရှိစေချင်တာပေါ့နော်။ BNI အနေနဲ့ကလည်း ရှေ့ဆက်ပြီးတော့ တချိန် ဖက်ဒရယ် ပြည်ထောင်စု အသစ် ကို ပြန်တည်ဆောက်ကြတဲ့ အခါကျရင်လည်း မီဒီယာအနေ နဲ့ ဆက်လက်လုပ်ဆောင်သွားဖို့ အင်အားရှိတယ်၊ BNI အတွက် တွန်းအားတစ်ခုလည်း ဖြစ်စေချင်တာပေါ့” ဟု နန်းဖောကေ က ဆက်ပြောသည်။
လက်ရှိတွင် BNI အဖွဲ့သည် သျှမ်းသံတော်ဆင့် သတင်းဌာန အပါအဝင် တိုင်းရင်းသား မီဒီယာ (၁၅) ဖွဲ့ ဖြင့် စုဖွဲ့ထားခြင်း ဖြစ်သည်။
Leave a Comments