သျှမ်းပြည် မူဆယ်ခရိုင် မြန်မာ- တရုတ်နယ်စပ် ကျင်ဆန်ကျော့ဂိတ်တွင် တရုတ်နိုင်ငံမှ တရားမဝင် ကုန်ပစ္စည်းများကို မူဆယ်မြို့ အခွန်ကောက်ဦးစီးဌာနက အခွန်ကောက်ယူပြီး တင်သွင်းခွင့်ပြုနေကြောင်း စုံစမ်းသိရသည်။
အဆိုပါ တရားမဝင် ကုန်ပစ္စည်းများဖြစ်သည့် ဘီယာ၊ စက်ပစ္စည်းများ၊ ဆိုင်ကယ်များနှင့် စားသောက်ကုန် ကျန်းမာရေး စစ်ဆေးထောက်ခံချက် (FDA) လက်မှတ်မရှိသေးသည့် စားသောက်ကုန်များ အချိုရည်များကို ကျင်ဆန်ကျော့ဂိတ်မှ မူဆယ်မြို့သို့ တိုက်ရိုက်တင်သွင်းကြောင်း သိရသည်။
ထိုတရားမဝင် တိုက်ရိုက်တင်သွင်းသည့် အခွန်များကို မူဆယ်မြို့ အခွန်ကောက် ဦးစီးဌာနမှ ဦးစီးမှူး နှင့် မြို့နယ်မှူးတို့က ကိုယ်ကျိုးအတွက် ကောက်ယူနေကြောင်း ကုန်သည်ဒေသခံ များပြောပြချက်အရ သိရသည်။
“ ဘီယာကားတစ်စီး ဆို သိန်း ၃၀ လောက်ပေးရတယ်။ ဆိုင်ကယ်တစ်စီးဆိုလည်း ၂၅ သိန်းတဲ့။ ကုန်စုံကားဆိုရင်လည်း သိန်း ၂၀ ကနေ ၃၀ ထိပေးရတယ် ။ FDA လက်မှတ်မရသေးတဲ့ ကုန်ပစ္စည်းတွေလည်း တင်ပို့နေကြသေးတယ်။ ဘီယာတွေ ၊ အချိုရည်တွေဖြစ်တယ် ကျမတို့လည်း ကုန်သည်တွေပဲ။ ပြီးတော့ ကျင်ဆန်ကျော့ ကနေ မူဆယ်ကို တိုက်ရိုက်ပို့တာ ။ အဲ့လိုပို့တာ ကျင်ဆန်ကျော့မှာ အခွန်ဆောင်ရတယ်။ အဲ့အခွန်တွေကို အခွန်ကောက် ဦးစီးဌာနက ဦးစီးမှူး နဲ့ မြို့နယ်မှူးတို့က ကိုယ်ကျိုးအတွက် သုံးကြတာ” ဟု မူဆယ်မြို့ ကုန်သည် အမျိုးသားတစ်ဦးက သျှမ်းသံတော်ဆင့်ကို ပြောသည်။
မူဆယ်မြို့နယ် အခွန်ကောက် ဦးစီးဌာနမှ မြို့နယ်မှူး သည် ဦးအောင်မျိုးဌေး (လ/ထ) ညွှန်မှူး ဖြစ်ပြီး ဦးစီးအရာရှိသည် ဦးကျော်ကျော်လွင် ဖြစ်ကြောင်း သိရသည်။
အထက်ပါ ကိုယ်ကျိုးအတွက် အသုံးပြုအခွန်ကောက်နေသည်ကိုလည်း ကုန်သည်များက နေပြည်တော် အခွန်ရုံးသို့ စာတင်ထားသော်လည်း ထိရောက်စွာ အရေးယူမှု မရှိကြောင်း သိရသည်။
“ နေပြည်တော်ထိ စာ ၂ ခါတင်ပြီပြီး။ သူတို့ထိရောက်အောင် အရေးမယူပေးဘူး ။ လာကြည့် လာစစ်ဆေးပြီးတော့ပဲ ပြန်သွားတာ။ အခုချိန်ထိ ဘာမှမလုပ်ဘူး “ ဟု ၎င်းကုန်သည်က ပြောသည်။
ပုံမှန်အားဖြင့် ကျင်ဆန်ကျော့ဂိတ်မှ ဝင်ရောက်လာသည့် ကုန်ပစ္စည်းများကို ၁၀၅ မိုင်ကုန်သွယ်ရေးဇုန်မှ တစ်ဆင့် မူဆယ်မြို့တွင်းသို့ တင်ပို့လျက်ရှိကြောင်း သိရသည်။
ထိုသို့ ကျင်ဆန်ကျော့ဂိတ်မှ မူဆယ်မြို့သို့ တိုက်ရိုက်ပို့ဆောင်ရာတွင် ကုန်တင်ပို့ခ အခွန်ကောက်သည့်အပြင် အခွန်ကောက် ဦးစီးမှူးအရာရှိတို့ကိုလည်း ငွေပေးဆောင် ရကြောင်း ကုန်သည်အမျိုးသမီးက ပြောသည်။
“ မြို့နယ်အခွန်ဦးစီးမှူးတွေက တရုတ်နိုင်ငံက ဝင်လာတဲ့ ကုန်တွေကို ၁၀၅ မိုင်မှာ အခွန်မပေးခိုင်းဘဲ ကျင်ဆန်ကျော့မှာပဲ အခွန်ကောက်ပြီး မူဆယ်မြို့ထဲ တန်းဝင်ခိုင်းတာ။ အဲ့ဒီမှာ နိုင်ငံတော်အခွန်လည်း ဆောင်ရတယ်။ သူတို့ကိုလည်း ထပ်ပေးရတယ်။ အခု ကျင်ဆန်ကျော့ က ထွက်လာတဲ့ ကုန်တွေ အားလုံးက မူဆယ်ထဲ တိုက်ရိုက်ဝင်တယ်” ဟု ကျင်ဆန်ကျော့ဂိတ်တွင် နေထိုင်သည့် ကုန်သည်အမျိုးသမီးတစ်ဦးက ပြောသည်။
တရားမဝင် ကုန်ပစ္စည်းများကို တင်သွင်းရာတွင် ကျင်ဆန်ကျော့ဂိတ်မှ အခွန်ပေးဆောင်ရပြီး ကားတစ်စီးတွင် ကုန်ပစ္စည်း အမျိုးအစားပေါ်မူတည်ပြီး သိန်း ၃၀ အထက်ပေးဆောင်ရကြောင်း သိရသည်။
ထိုသို့ အခွန်အများပြားပေးဆောင်ရသည့်အတွက်ကြောင့် ကုန်သည်များအတွက် ခက်ခဲနေကြောင်း သိရသည်။
တရုတ် – မြန်မာနယ်စပ်ကုန်သွယ်ရေး၏ အကြီးဆုံးဖြစ်သော မူဆယ် ၁၀၅ မိုင်ကုန်သွယ်ရေးဇုန်မှ ၂၀၂၀ -၂၁ ဘဏ္ဍာနှစ် စက်တင်ဘာ ၁၀ အထိ ပို့ကုန်ဝင်ငွေ ဒေါ်လာ ၂၄၂၄ သန်းသာ ရရှိခဲ့ကြောင်းသိရသည်။
