သျှမ်းပြည် တောင်ကြီးခရိုင် ပင်လောင်းမြို့နယ် နှင့် ဖယ်ခုံမြို့နယ်တွင်း တိုက်ပွဲရက်ရှည် ကြာလာသည့် အတွက်ကြောင့် PDF များ လက်နက် အခက်ခဲ ရှိလာကြောင်း စုံစမ်းသိရှိရသည်။

၃ လ နီးပါး စစ်ကောင်စီ နှင့် ပြည်သူ့ကာကွယ်ရေးတပ်ဖွဲ့တို့သည် ပင်လောင်းမြို့နယ် နှင့် ဖယ်ခုံမြို့နယ် နယ်စပ် တောင်စလုံး နှင့် မြောက်စလုံးဘက်တွင် ယနေ့ချိန်ထိ တိုက်ပွဲဖြစ်ပွားနေလျက်ရှိကြောင်း သိရသည်။

“အခုချိန်ထိတော့ တိုက်ပွဲတွေ ဖြစ်ပွားနေသေးတယ်။ ကျနော်တို့ တိုက်ပွဲမှာတော့ အခက်ခဲတွေက လက်နက်တွေ အခက်ခဲဖြစ်တာပေါ့။ ရက်ကြာလာတော့ လက်နက်တွေလည်း လုံလောက်မှု မရှိတော့ဘူး။ ဒါတော့ တကယ့်အခက်ခဲဖြစ်နေတာပေါ့” ဟု ပအိုဝ်းအမျိုးသားကာကွယ်ရေးတပ်ဖွဲ့ PNDF – KK သတင်း နှင့် ပြန်ကြားရေးတာဝန်ခံ ခွန်ဗွေဟုန်း က ပြောသည်။

ထိုသို့ လက်နက်ခဲယမ်း လုံလောက်မှု မရှိသည့်အတွက်ကြောင့် တော်လှန်ရေး တပ်ဖွဲ့များအတွက် အခက်အခဲဖြစ်နေကြောင်း သိရသည်။

ထိုအပြင် အမျိုးသားကာကွယ်ရေးတပ်ဖွဲ့ NUG အစိုးရအနေဖြင့်လည်း လက်နက်အပြည့်အဝ ထောက်ပံ့ပေးမှု မရှိကြောင်း ဖယ်ခုံမြို့နယ်တွင်း လှုပ်ရှားသည့် PDF တပ်ရင်းတစ်ခုက ပြောသည်။

“ ကျနော်တို့ကလည်း လက်နက်အတွက် အဓိက ခက်ခဲတာပေါ့။ ကျနော်တို့ တပ်ဖွဲ့က NUG လက်အောက်ခံက ဖြစ်တယ်။ ဒါမဲ့ သူတို့လက်နက် အပြည့်ဝ ထောက်ပံ့ပေးတာမရှိဘူး။ ကျနော်တို့ ဒီမှာ တိုက်ပွဲတကယ် ဖြစ်နေတဲ့နေရာကိုလည်း လက်နက်အပြည့်ဝ ထောက်ပံ့ပေးဖို့ ပြောချင်တယ်” ဟု ၎င်းကပြောသည်။

အလားတူ ပြီးခဲ့သည့် မေလ ၈ ရက်နေ့တွင်လည်း ပင်လောင်းမြို့နယ် တောင်စလုံး မြောက်စလုံး တိုက်ပွဲထဲတွင် KNDF Bo 11 တပ်ရင်းမှူး တိုက်ပွဲတွင်း ကျဆုံးသွားခဲ့ကြောင်း သိရသည်။

“ ဟုတ်တယ်။ စိတ်တော့ မကောင်းဘူးပေါ့။ ကျနော်တို့လည်း မဟာမိတ်တပ်ဖွဲ့တွေပဲ။ ကျနော်တို့ တိုက်ပွဲကာလ အတွင်းမှာ ဘယ်သူဘာဖြစ်မလဲ ၊ ဘာတွေဖြစ်မလဲဆိုတာလည်း မသိနိုင်ဘူးလေ။ အခုလို ဖြစ်သွားတော့လည်း ကျနော်တို့ကနေ ကျဆုံးသွားတဲ့ ရဲဘော်တွေအတွက် ရှေ့ဆက်ပြီး ပိုပြီးတော်လှန်သွားမှာပါ” ဟု ခွန်ဗွေဟုန်းက ပြောသည်။

စစ်ကောင်စီသည် ပင်လောင်းမြို့နယ် နှင့် ဖယ်ခုံမြို့နယ်ကြားကို စစ်ရေး ပိုမိုပြင်းထန်လာခဲ့ပြီး ယခုနေ့စဉ် တိုက်ပွဲဖြစ်ပွားနေလျက်ရှိကြောင်း သိရသည်။

ထိုအပြင် စစ်ကောင်စီတပ်ဖွဲ့က လက်နက်ကြီး နှင့် လေယာဉ်ဖြင့် တိုက်ခိုက်ခဲ့သည့်အတွက်ကြောင့် ပင်လောင်းမြို့နယ်တွင် ပြည်သူ နေအိမ် (၃၀၀) ကျော် ထိခိုက်ပျက်စီးခဲ့ကြောင်း သိရသည်။