သျှမ်းပြည် မိုင်းကိုင်မြို့နယ် ပန်ကေတုကျေးရွာ နှင့် တုံလောကျေးရွာ အကြားရှိ တောင်တက်လမ်း၌ မိုင်းပေါက်ကွဲမှု ဖြစ်ပွားခြင်းကြောင့် အရပ်သား ကား ၂ စီး ထိခိုက်ရသည့် အပြင် အမျိုးသားတစ်ဦးလည်း ထိခိုက်ဒဏ်ရာရသွားကြောင်း သတင်း သိရသည်။
ပြီးခဲ့သည့် မေလ ၈ ရက် မွန်းလွဲပိုင်း ၁၂ နာရီခွဲ ဝန်းကျင်တွင် ပန်ကေတုကျေးရွာ နှင့် တုံလောကျေးရွာ ကြားရှိ လွယ်လောင်း (လွႆလၢဝ်း) တောင်တက်လမ်း၌ မိုင်းပေါက်ကွဲမှု ဖြစ်ပွားခဲ့ပြီး အရပ်သားများ မောင်းနှင်လာသည့် ကား ၂ စီးထိခိုက်ကာ အမျိုးသား တစ်ဦး ထိခိုက်ဒဏ်ရသွားကြောင်း သတင်းသိရသည်။
“ကားကို မိုင်းစတွေ ထိပြီးတော့ ကားမှန်တွေ ကွဲအက်တာပေါ့၊ ကားပေါ်ပါတဲ့သူတွေထဲက အမျိုးသား တစ်ယောက်ကို ထိပါတယ်။ သူ့လည်ပင်းနားမှာ ထိတာ၊ ဒဏ်ရာတော့ သိပ်မပြင်းပါဘူး” ဟု အမည်မဖော်လိုသူ ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။
မိုင်းပေါက်ကွဲမှုကို ၃ လုံးထက်မနည်း အသံများ ကြားရခြင်း ဖြစ်ကြောင်း နှင့် လမ်းသွားလမ်းလာ အရပ်သား ပြည်သူကားကို ထိမှန်ခြင်းဖြစ်ကြောင်း အထက်ပါ ပုဂ္ဂိုလ်က ဆက်ပြောသည်။
အဆိုပါ မိုင်းပေါက်ကွဲမှုသည် မည်သည့်အဖွဲ့အစည်း ထောင်ထားသည့် မိုင်းဖြစ်သည်ကို မသိရကြောင်းလည်း ၎င်းက ဆက်ပြောသည်။
အဆိုပါ လမ်းကြောင်း တစ်လျှောက်သည် ရှမ်းပြည်တိုးတက်ရေးပါတီ (SSPP/SSA) နှင့် သျှမ်းပြည် ပြန်လည်ထူထောင်ရေးကောင်စီ (RCSS/SSA) တို့ စစ်ရေးတင်းမာမှု ဖြစ်ပွားနေသည် ဖြစ်ကြောင်းလည်း အသက် ၄၀ ဝန်းကျင် ဒေသခံ အမျိုးသားက ပြောသည်။
“အရင်နေ့တွေကတော့ ဒီလမ်းကြောင်း တစ်လျှောက်မှာ သျှမ်းတပ်နှစ်တပ် သွားလာလှုပ်ရှားမှုတွေ တွေ့ရပါတယ်။ လဲချားအရှေ့ဘက်မှာ သူတို့ ထိတွေ့တိုက်ပွဲဖြစ်တော့ ရွာသားတွေကလည်း စစ်ရှောင်ရတာ ရှိတယ်၊ ဒီဘက်ကို တိုက်ပွဲကူးလာမှာတောင် ကြောက်ရသေးတာ” ဟု အသက် ၄၀ ဝန်းကျင် ဒေသခံ အမျိုးသားက သျှမ်းသံတော်ဆင့်ကို ပြောသည်။
ပြီးခဲ့သည့် ဧပြီလ ၁၁ ရက်မှ စတင်ကာ လဲချားမြို့နယ်အတွင်း သျှမ်းတပ်နှစ်တပ်ဖြစ်သည့် (RCSS နှင့် SSPP) တို့ ထိတွေ့တိုက်ပွဲ ဖြစ်ပွားမှုကြောင့် ဒေသခံ ၅၀၀ ကျော်တို့သည် လဲချားမြို့ပေါ်သို့ စစ်ရှောင်ထွက်ပြေးလာရခြင်း ဖြစ်သည်။
မြန်မာနိုင်ငံ မြေမြှုပ်မိုင်း စောင့်ကြည့်လေ့လာရေးအဖွဲ့၏ ၂၀၂၀ ခုနှစ် အထိ အစီရင် ခံစာအရ မြေမြှုပ်မိုင်း နှင့် စစ်ကျန် ပေါက်ကွဲ ပစ္စည်းများကြောင့် ထိခိုက်ဒဏ်ရာရမှု၊ သေဆုံးမှု စုစုပေါင်း ၃၆၈ ခု ရှိနေပြီး သျှမ်းပြည်သည် ထိခိုက်၊ ဒဏ်ရာရမှု အများဆုံးအဖြစ် (၁၂၁) ခု ရှိနေကြောင်း သိရသည်။
ဒေသအလိုက်အနေဖြင့် သျှမ်းပြည်တွင် မြေမြှုပ်မိုင်းနင်းမိသူ (၄၂) ရာခိုင်နှုန်းရှိခဲ့ပြီး၊ စစ်ကိုင်းတိုင်းတွင် (၁၂) ရာခိုင်နှုန်း၊ ရခိုင်တွင် (၁၁) ရာခိုင်နှုန်း၊ ကချင်တွင် (၁၀) ရာခိုင်နှုန်း နှင့် ကရင်တွင် (၇) ရာခိုင်နှုန်းရှိပြီး သျှမ်းပြည်သည် အများဆုံး ဖြစ်ကြောင်း သိရသည်။
Leave a Comments