ကရင်နီ (ကယား) ပြည်အတွင်း တိုက်ပွဲကြောင့် နေရပ်စွန့်ပြီး ထွက်ပြေးတိမ်ရှောင်နေရသည့် စစ်ဘေးရှောင်များအတွက် (ဆန် နှင့် သောက်သုံးရေထောက်ပံ့ကူ မြတ်ကုသိုလ်ယူ) ကမ်ပိန်းတစ်ရပ်ကို ပြုလုပ်နေကြောင်း သိရသည်။
ယနေ့ မေလ ၁၀ ရက်မှ ဇွန်လ ၁၀ ရက်နေ့ထိ ကရင်နီပြည် စစ်ရှောင်ဦးရေ ၇၀ ရာခိုင်နှုန်းဝန်းကျင်အတွက် ဆန် နှင့်သောက်သုံးရေ ထောက်ပံ့ကူ မြတ်ကုသိုလ်ယူ ကမ်ပိန်းတစ်ရပ်ကို ပြုလုပ်သွားမည်ဖြစ်သဖြင့် မိမိတို့ တတ်နိုင်သလောက် ပါဝင်ကူညီပေးပါရန် ဖိတ်ခေါ်လိုက်ကြောင်း ကရင်နီပြည် စစ်ဘေးရှောင် ကူညီစောင့်ရှောက်ရေးကွန်ရက်က ယနေ့တွင် ကြေညာထားသည်။
တိုက်ပွဲကြောင့် နေရပ်စွန့်ပြီး ထွက်ပြေးတိမ်းရှောင်နေရသည့် စစ်ရှောင်များသည် လက်ရှိမှာ ရှောင်တိမ်း နေထိုင်ရသည့် ဒေသ၌ သီးနှံစိုက်ပျိုးရန် အခွင့်အလမ်းမသာခြင်း နှင့် သောက်သုံးရေ အရင်းအမြစ် ကန့်သတ်ချက် စသည့်ဖြင့် အခက်ခဲကြုံတွေ့နေရကြောင်း ကြေညာချက်တွင် ထုတ်ဖော်ရေးသားထားသည်။
“ ကျမအတွက် အလှူရှင်ရှိခဲ့မယ်ဆိုရင် စားစရိတ်အတွက် ဆန်၊ ဆီ၊ ဆားတွေ ကုန်စိမ်းတွေဆို ကျမတို့အတွက် မစားရတာကြာပြီ။ ဉပမာ အာလူးတို့၊ မုန်ညှင်းတို့ အဲ့လိုမျိုး ကုန်စိမ်းတွေ လိုအပ်နေတယ်။ ကုလားပဲတွေဆို ရက်တိုင်း စားနေရရင် ကလေးတွေလည်း စားမဝင်တော့ အားမရှိဘူး။ တချို့ သွေးတိုးသမားဆို သွေးတိုးတက်ကြတယ်။ ဆေးဝါးတွေလည်း လိုအပ်တယ် “ဟု သျှမ်း – ကယားနယ်စပ်ဒေသရှိ စစ်ဘေးရှောင် အမျိုးသမီးတစ်ဦးက သျှမ်းသံတော်ဆင့်ကို ပြောသည်။
အလားတူ အခုရက်ပိုင်းအတွင်း၌ စစ်ရှောင်များသည် အသားဟင်း၊ ငါးဟင်းမစားရသည်မှာ ကြာပြီဖြစ်ကြောင်း တတ်နိုင်သလောက် ပါဝင်ကူညီပေးဖို့ရန် ၎င်းက တောင်းဆိုထားသည်။
ထို့အပြင် သျှမ်း – ကယားနယ်စပ်ဒေသရှိ စစ်ဘေးရှောင်များ၊ စစ်ရှောင်စခန်းများ၊ အရပ်သား နေအိမ်များကို စစ်ကောင်စီ ပစ်မှတ်ထားပြီး လေယာဉ်ဖြင့် ဗုံးကြဲ တိုက်ခိုက်နေလျက်ရှိကြောင်း သိရသည်။
