သျှမ်းပြည် လားရှိုးခရိုင် လားရှိုးမြို့တွင် ယခုရက်ပိုင်း၌ အိမ်မွေးတိရိစ္ဆာန်ခွေးများကို လိုက်လံခိုးယူနေသည့် သူခိုးအုပ်စု ခပ်စိပ်စိပ်ရှိလာနေကြောင်း ဒေသခံများထံမှ စုံစမ်းသိရသည်။
ပြီးခဲ့သည့် ဧပြီလပိုင်းမှစ၍ လားရှိုးမြို့ပေါ်တွင် အိမ်တွင်းမွေး တိရိစ္ဆာန်ဖြစ်သည့် အလှမွေးခွေး၊ မျိုးကောင်းခွေး ပျောက်ဆုံးမှု မကြာခဏ ဖြစ်ပေါ်နေပြီး အဆိုပါ ပျောက်ဆုံးမှုဖြစ်စဉ် အချို့တွင် အမည်မသိ လူအုပ်စုတစ်စုမှ အိမ်ထဲရှိ ခွေးကို ကားပေါ်သို့ ခေါ်တင်ဆောင်သွားခြင်း၊ ခိုးယူခြင်းများ ခပ်စိပ်စပ် ပြုလုပ်လာနေကြောင်း လားရှိုးမြို့ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
“လားရှိုးမှာ ခွေးခိုးတဲ့ ဂိုဏ်းရှိပုံရတယ်။ ခွေးတွေလည်း ခဏခဏ ပျောက်နေတယ်။ တချို့ CCTV တပ်ထားတဲ့အိမ်က ခွေးကိုတောင် ကားပေါ် တင်သွားကြတာရှိတယ်။ ခွေးတွေကို ခိုးပြီး ဘာလုပ်ကြတာလဲတော့ ကျွန်မလည်း သေချာမသိဘူး။ ရောင်းစားကြတာလည်း ဖြစ်နိုင်တယ်။ ပြီးခဲ့တဲ့ လပိုင်းက ကိုယ့်အိမ်ရှေ့က ဟတ်စကီးစပ် ခွေးလည်း ပျောက်သေးတယ် “ ဟု ၎င်း အမျိုးသမီးတစ်ဦးက ပြောသည်။
အဆိုပါ အိမ်တွင်းမွေး တိရိစ္ဆာန်ဖြစ်သည့် ခွေးများဟာ လက်ရှိ ခွေးပေါက်စ တစ်ကောင်ကို ကျပ် ၂ သိန်းအထက် ပေးပြီး ဝယ်ယူနေရသလို အချို့ မျိုးကောင်းခွေးသည် တစ်ကောင်ကို ၁၀ သိန်းအထက် ပေးပြီးဝယ်ယူရကြောင်း သိရသည်။
အလားတူ ပြီးခဲ့သည့် (ဧပြီ ၂၇ ရက်) တွင် အိမ်တွင်းမွေးထားသည့် ခွေးတစ်ကောင် ပျောက်ဆုံးသွား၍ လိုက်ရှာနေသူ အမျိုးသမီးတစ်ဦးက လက်ရှိအချိန်ထိ ၎င်းခွေးကို ပြန်လည်ရှာဖွေ မတွေ့ရှိသေးကြောင်း သိရသည်။
“ပြီးခဲ့တဲ့ အရင်လ နောက်ဆုံးပတ် စနေနေ့က ကျမရဲ့ ခွေးလည်း ပျောက်သွားတယ်။ အခုထိ ပြန်ရှာလို့ မတွေ့သေးဘူး။ လမ်းမှားနေရင်း တွေ့ပြီးခေါ်မွေးလိုက်ကြလား မသိပါဘူး။ ခွေးက ရုပ်ချောပြီး အကောင်လည်းကြီးတယ်။ လူယဉ်ပြီး လိမ္မာတယ် “ ဟု ၎င်းအမျိုးသမီးက ထပ်လောင်းပြောသည်။
စစ်တပ်က အာဏာသိမ်းပြီးနောက်ပိုင်း မြန်မာနိုင်ငံတွင် စီးပွားရေး၊ ပညာရေး ကျဆင်းလာမှုနှင့် အလုပ်အကိုင် အခွင့်အလမ်း ရှားပါးလာမှုကြောင့် အခြေခံ လူတန်းစားများအတွက် စားဝတ်နေရေး ပိုမို ကြပ်တည်းလာပြီး တစ်ဖက်တွင် သူခိုး၊ ဓားပြ နှင့် ဒုစရိုက်များ ပေါများလာပြီး ပြည်သူများ၏ လုံခြုံရေးလည်း တစ်နေ့ထက်တစ်နေ့ ပိုဆိုးရွားလာနေသည်။
Leave a Comments