သျှမ်းပြည် လားရှိုးခရိုင် လားရှိုးမြို့နယ် တပ်ထွက်ဆရာဝန်မြေပွဲစားတစ်ဦး အသတ်ခံရကြောင်း စုံစမ်းသိရှိရသည်။
ပြီးခဲ့သည့် ဧပြီ ၃၀ ရက်တွင် လားရှိုးမြို့ မြေပွဲစား ကိုအောင်မြိုင် (၅၃) နှစ် တပ်ထွက်ဆရာဝန်သည် ဖမ်းဆီးခံရပြီး သတ်ခံရကြောင်း သိရသည်။
အဆိုပါ ကိုအောင်မြိုင်သည် ၎င်း၏ ကိုယ်ရေးကိုယ်တာ ကိစ္စကြောင့် သတ်ဖြတ်ခံခဲ့ရကြောင်း ကိုအောင်မြိုင်နှင့် နီးစပ်သူတစ်ဦးက ပြောသည်။
“ သူနဲ့ ကျနော်တို့ ခင်လာတာ ၇ နှစ်လောက်ရှိပြီ။ သူက တပ်ထွက် ဆရာဝန်၊ သူသတ်ခံရတာ ကျနော်သိသလောက်တော့ ကိုယ်ရေးကိုယ်တာ ကိစ္စကြောင့် ဖြစ်တယ်။ သူက မိန်းမတွေ အရမ်းရှုပ်တယ်။ သူ့ ဇနီးသေသွားတာ ၂ နှစ်လောက်ရှိပြီ။ ဘယ်သူသတ်တာလဲတော့ မသိသေးပါဘူး” ဟု ၎င်းက ပြောသည်။
ကိုအောင်မြိုင်ကို ဧပြီ ၃၀ ရက်တွင် ရှန်ခိုက် ရာဘာခြံမှာ လာရောက်ဖမ်းဆီးသွားပြီး၊ မေလ ၁ ရက်တွင် တောင့်တလောင်ရွာ၌ ရုပ်အလောင်းကို တွေ့ရှိခဲ့သည်။
ထိုရုပ်အလောင်းမှာ လက်ကိုကြိုးတုတ်ခံထားကာ မျက်လုံးထိုးခံထားရပြီး ဦးခေါင်း နောက်စေ့တွင် ဒဏ်ရာ နှင့် သေဆုံးသွားကြောင်း သိရသည်။
လက်ရှိ လားရှိုးမြို့နယ်တွင်း မြေဈေး တစ်ဖန် ပြန်မြင့်တက်လာခဲ့ပြီး ဝယ်ယူသူ များပြားလာသည့် အတွက်ကြောင့် ပွဲစားများက ငွေကြေးဆိုင်ရာ ၊ ကိုယ်ရေးကိုယ်တာကိစ္စ၊ ရုံးပိုင်းဆိုင်ရာကိစ္စ စသည်တို့အတွက် စိုးရိမ်နေရကြောင်း သိရသည်။
“လားရှိုးမှာက မြေပွဲစားတွေက အရမ်းရှုပ်ကြတယ်။ ငွေကြေးတွေကော ၊ ရုံးပိုင်းဆိုင်ရာတွေကော ၊ ကိုယ်ရေးကိုယ်တာ ကိစ္စကြောင့်ကော အရမ်းရှုပ်ကြတယ်။ ငွေကြေးကြောင့်ဆိုရင် လာဖမ်းသွားတာရှိတယ်။ အများစုကတော့ ဖမ်းပြီးရင် ပြန်လွတ်ပေးပါတယ်။ ရက်ချိန်းပြီး ပိုက်ဆံပြန်ပေးရတာပေါ့။ လားရှိုးမှာလည်း မြေဈေးတွေပဲ အလုပ်ဖြစ်တယ်လေ” ဟု လားရှိုးမြို့နယ်အတွင်း မြေပွဲစားလုပ်နေသူက ပြောသည်။
လားရှိုးမြို့နယ်တွင် စစ်တပ်အာဏာသိမ်းပြီးနောက်ပိုင်း မြေဈေးတွေ ပြန်မြင့်တက်လာသည့် အတွက်ကြောင့် မြေပွဲစားများ ပေါများလာခဲ့သည်။
