သျှမ်းပြည် လွိုင်လင်ခရိုင် လဲချားမြို့နယ် အတွင်း ဖြစ်ပွားသည့် တိုက်ပွဲကြောင့် နွေရာသီ သျှမ်းစာသင်ကျောင်း ၂၀ နီးပါး စာသင်ခွင့်မရကြောင်း စုံစမ်းသိရသည်။
ပြီးခဲ့သည့် မေ ၅ ရက်နေ့ နံနက်ပိုင်းတွင် လဲချားမြို့နယ်မှ မြို့နယ် သံဃာတော်အဖွဲ့များ ဦးဆောင်ကာ နွေရာသီ သျှမ်းစာသင်တန်း နှင့် ဗုဒ္ဓဘာသာ ယဥ်ကျေးလိမ္မာသင်တန်း စာမေးပွဲ ပြုလုပ်ခဲ့ရာ သင်တန်းကျောင်း ၁၇ ကျောင်းသည် တိုက်ပွဲကြောင့် စာဖြေမှု မပြုလုပ်နိုင်ခဲ့ကြောင်း သင်တန်း တာဝန်ရှိသူ ဦးဇင်းတစ်ပါးက သျှမ်းသံတော်ဆင့်ကို ပြောသည်။
“ဒီနှစ် စာမေးပွဲကို ဖြေဆိုတဲ့ ကျောင်းပေါင်း ၆၅ ကျောင်း ရှိပါတယ်။ ၁၇ ကျောင်းကတော့ တိုက်ပွဲတွေကြောင့် ပျက်ကွက်ခဲ့ရတယ်၊ အဲ့ ၁၇ ကျောင်းက ကျောင်းသား/သူ ၄၈၇ ဦးက လည်း ပညာသင်ခွင့် ဆုံးရှုံးခဲ့ရတာပေါ့၊ ဒါက တိုက်ပွဲကြောင့် ပျက်ကွက်ခဲ့ရတာတွေပါ” ဟု ဦးဇင်း ကောစန္လက သျှမ်းသံတော်ဆင့်ကို ပြောသည်။
အဆိုပါ သျှမ်းစာသင်တန်း နှင့် ဗုဒ္ဓဘာသာ ယဥ်ကျေးလိမ္မာ စာမေးပွဲသည် လဲချားမြို့နယ် အတွင်း ကျင်းပပြုလုပ်သည့် ၂၇ ကြိမ်မြောက် စာမေးပွဲဖြစ်ပြီး ၁၇ ကျောင်းသည် တိုက်ပွဲကြောင့် စာမေးပွဲ မကျင်းပ နိုင်ခဲ့ခြင်းဖြစ်ကြောင်း သိရသည်။
စာမေးပွဲ မကျင်းပနိုင်ခဲ့သည့် စာသင်ကျောင်း ၁၇ ကျောင်းတွင် စိကျော့ကျေးရွာ (ဝၢၼ်ႈၸိၸေႃ့)၊ ကုန်ယိန်းရွာ (ဝၢၼ်ႈၵုၼ်ယိူင်း) ၊ စလိုင်းလွယ်ရွာ (ဝၢၼ်ႈၸလၢႆးလွႆ) ၊ နောင်ကင်ရွာ (ရွာသစ်/ရွာဟောင်း) (ဝၢၼ်ႈၼွင်ၵိုၼ်ၵဝ်ႇ/မႂ်ႇ) ၊ ဖာမောင်ရွာ (ဝၢၼ်ႈၽႃဝွင်) ၊ မက်ကောက်ရွာ (ဝၢၼ်ႈမၢၵ်ႇၵွၵ်ႇ) ၊ ကုန်းမိုက်ဟိုင်းရွာ (ဝၢၼ်ႈၵုင်းမႆ့ႁႆး) ၊ မုံသျှမ်း (ဝၢၼ်ႈမူင်ႈသႅမ်း) ၊ ဝမ်ထီရွာ (ဝၢၼ်ႈထီႇ) ၊ ဟဲဆိုင်ရွာ (ဝၢၼ်ႈႁၢႆးသႅင်) ၊ ဝမ်ကုန်းစိမ်းရွာ (ဝၢၼ်ႈၵုင်းၸိင်း) ၊ ဝမ်လုက်ရွာ (ဝၢၼ်ႈလုၵ်း) စသည်တို့နှင့် တိုက်ပွဲဖြစ်ပွားရာ ဒေသမှ စာသင်ကျောင်းများ ဖြစ်သည်။
လက်ရှိတွင် အဆိုပါ ဒေသမှ ကျောင်းသား / သူများကလည်း အသီးသီး စစ်ရှောင် ထွက်ပြေး နေရကြောင်းလည်း ဦးဇင်းက သျှမ်းသံတော်ဆင့်ကို ဆက်မိန့်သည်။
“တိုက်ပွဲဖြစ်တော့ ကလေးတွေကလည်း သူတို့ မိဘတွေနဲ့ စစ်ရှောင်ထွက်ပြေးသွားရတာပေါ့၊ တချို့ကလည်း ထိုင်းနိုင်ငံထိ ထွက်ပြေးသွားတာ ရှိနေတယ်၊ အဓိက ကတော့ တိုက်ပွဲကြောင့်ပေါ့နော်၊ တိုက်ပွဲကြောင့် ဒီကလေးတွေ စာသင်ခွင့်၊ စာဖြေခွင့်တွေ ဆုံးရှုံးရတာ” ဟု ဦးဇင်း ကောစန္လက သျှမ်းသံတော်ဆင့်ကို ပြောသည်။
ယခုနှစ်အတွက် သျှမ်းစာ နှင့် ဗုဒ္ဓဘာသာ ယဥ်ကျေးလိမ္မာ ဗုဒ္ဓဘာသာ သင်တန်းကို ပြီးခဲ့သည့် မတ်လ ၁၂ ရက်နေ့တွင် စတင် ဖွင့်လှစ်လာခဲ့ခြင်းဖြစ်ပြီး စုစုပေါင်း ၈၂ ကျောင်းရှိရာ၊ မိုင်းကိုင်မြို့၊ မိုင်းခွန်ကျေးရွာအုပ်စုမှ ၄ ကျောင်းနှင့် နမ့်စန်မြို့မှ နားပွဲကျေးရွာအုပ်စု၊ တွန်ဟုန်းကျေးရွာအုပ်စုတို့မှ ၄ ကျောင်း တို့ ပါဝင်ကြောင်း သိရသည်။
ထို့အပြင် ပြီးခဲ့သည့် ဧပြီလ ၁၁ ရက်မှ စတင်ကာ မေလ ၄ ရက်နေ့အထိ ရှမ်းပြည်တိုးတက်ရေးပါတီ (SSPP/ SSA) နှင့် သျှမ်းပြည်ပြန်လည်ထူထောင်ရေး ကောင်စီ (RCSS/SSA) တို့ သည် လဲချားမြို့ အရှေ့ဘက်တွင် တစ်လ နီးပါး တိုက်ပွဲ ဖြစ်ပွားနေသည့်အတွက် စစ်ရှောင်နေရသည့် ဒေသခံများသည် နေရပ်မပြန်နိုင်သေးသည့် အပြင် စားနပ်ရိက္ခာများအတွက်လည်း ခက်ခဲနေကြကြောင်းလည်း သိရသည်။
