အာဏာသိမ်း စစ်ကောင်စီ တပ်ဖွဲ့သည် စားအုန်းဆီ ဈေးနှုန်းများ လျှော့ကျရန် ထုတ်ပြန်ထားသော်လည်း ပြင်ပဈေးကွက်က မြင့်တက်နေဆဲ ဖြစ်ကြောင်း သိရသည်။
ယခု မေလ ပထမပတ် အတွင်းတွင် တောင်ကြီးမြို့ ၊ လားရှိုးမြို့ တို့လို မြို့ကြီးများ စားအုန်းဆီ ရောင်းဝယ်ရေးများ၌ စားအုန်းဆီ တစ်ပိဿသည် ၇၀၀၀ ကျပ်မှ တစ်သောင်းဝန်းကျင် အထိ ဈေးနှုန်းရှိနေကြောင်း လားရှိုးမြို့မှ အမည်မဖော်လိုသူ ကုန်သည်တစ်ဦးက သျှမ်းသံတော်ဆင့်ကို ပြောသည်။
“သင်္ကြန် မတိုင်ခင်တုန်းက စားအုန်းဆီ တစ်ပိဿကို ၆၈၀၀ ကျပ် ဝန်းကျင်ထိ ရှိနေတယ်၊ အခုကျတော့ ၇၀၀၀ ကျပ်ထိ တက်လာတယ်၊ ပဲစားဆီ အမျိုးအစားပေါ် မူတည်ပြီးတော့ ဈေးနှုန်းကလည်း ကွာခြားမှု ရှိနေတယ်၊ တချို့ စားဆီတွေက တစ်ပိဿ ၁၀,၀၀၀ ကျပ် အထိလည်း ရှိနေတယ်” ဟု လားရှိုးမြို့မှ ကုန်သည် တစ်ဦးက ပြောသည်။
မေလ ၂ ရက်နေ့မှ ၇ ရက်နေ့အထိ မြန်မာနိုင်ငံ စားသုံးဆီ တင်သွင်း သိုလှောင်ဖြန့်ဖြူးခြင်းလုပ်ငန်း ကြီးကြပ်ရေး ကော်မတီသည် စားအုန်းဆီ အခြေခံ လက်ကားရည်ညွှန်းဈေးကို တစ်ပိဿလျှင် ၄၅၇၀ ကျပ်သာ သတ်မှတ်ပေးထားကြောင်း သိရသည်။
စစ်ကောင်စီတို့ဘက်မှ ယင်းကဲ့သို့ ကြေညာခြင်း နှင့် ပတ်သက်ပြီး စားသုံးဆီ ရောင်းဝယ်သည့် ပြည်သူများ အနေဖြင့် ရောင်းရန် ခက်ခဲသည့်အပြင် ဆုံးရှုံးမှုပါ ရှိလာနိုင်ကြောင်းလည်း အထက်ပါ ပုဂ္ဂိုလ် က ဆက်ပြောသည်။
“သူတို့က ဈေးကျတယ်ဆိုပြီး ကြေညာတော့ လာဝယ်တဲ့ သူတွေကလည်း သူတို့ သိထားတဲ့ ဈေးမဟုတ်ရင် ပြန်မေးတယ်၊ ဒီလောက်ဈေးနဲ့ ကြေညာထားတယ်လေ ၊ ဘာကြောင့်ဈေးကြီး နေသေးလဲ ဆိုတာမျိုးပေါ့။ ဒါပေမဲ့ ကျနော်တို့ကလည်း ဒိုင်က မကျပေးရင် ကျလို့မှ မရတာ၊ အရင်းပြုတ်ရုံပဲ ရှိမှာလေ” ဟု ၎င်းက ဆက်ဆိုသည်။
စားသုံးဆီ ကော်မတီ၏ ထုတ်ပြန်ချက်တွင် စားအုန်းဆီကို ဈေးကစားရန် ရည်ရွယ်ချက် နှင့် သိုလှောင်ခြင်း၊ ဈေးနှုန်းမြှင့်တင်ရောင်းချခြင်းများ ပြုလုပ်ပါက အရေးကြီးကုန်စည်နှင့် ဝန်ဆောင်မှု ဥပဒေအရ အရေးယူ
ဆောင်ရွက်မည် ဖြစ်ကြောင်းလည်း ထုတ်ပြန်ထားကြောင်း သိရသည်။
