သျှမ်းပြည် တောင်ကြီးခရိုင် သျှမ်း – ကယား နယ်စပ်ဒေသ တလျောက်ရှိ ဖယ်ခုံ၊ မိုးဗြဲ နှင့် ပင်လောင်း မြို့နယ်တွင် နေ့စဉ်နီးပါး စစ်ကောင်စီမှ လေကြောင်း အသုံးပြုပြီး ဗုံးကြဲတိုက်ခိုက်နေကြောင်း စုံစမ်းသိရှိရသည်။
ယနေ့ (မေလ ၅ ရက်) နံနက်အစောပိုင်း ၄ နာရီခွဲမှစပြီး ၈ နာရီဝန်းကျင်အထိ ပင်လောင်း – ဖယ်ခုံ နယ်စပ်တလျောက်ရှိ ကျေးရွာများကို စစ်ကောင်စီမှ တိုက်လေယာဉ် ၄ စင်း အသုံးပြုပြီး ပေါင် (၅၀၀) ဗုံးနှစ်လုံး ကြဲချခဲ့သည့်အပြင် အသေးစားဗုံးများကိုလည်း ဆက်စဉ်မပြတ် ဗုံးကြဲချ တိုက်ခိုက်နေကြောင်း ဒေသခံတစ်ဦးက သျှမ်းသံတော်ဆင့်ကို ပြောသည်။
“ ဒီမနက် ၄ နာရီခွဲကစပြီး ၈ နာရီထိုးတဲ့အထိ လိုက်ပစ်နေတယ်။ ဒီ တောင်စလုံးရွာဆို အိမ်ခြေတစ်လုံးက ပေါင် ၅၀၀ ဗုံးတစ်လုံး တိုက်ရိုက်ထိပြီး မီးလောင်သွားတယ်။ တခြားအိမ်လည်း တော်တော်ထိခိုက် ပျက်စီးသွားတယ်။ လူနှစ်ယောက်ကတော့ ပေါင် (၅၀၀) ဗုံးရဲ့ ကျည်ထိပြီး သတိမေ့သွားတယ်လို့တော့ သိထားရတယ် “ ဟု ၎င်းက ပြောသည်။
အဆိုပါ ထိခိုက်ဒဏ်ရာ ရသူသည် ပြည်သူ့ကာကွယ်ရေးတပ်ဖွဲ့ PDF မှ တပ်ဖွဲ့ဝင်နှစ်ဦးဟု သိရှိရသော်လည်း သျှမ်းသံတော်ဆင့်သတင်းဌာနမှ အတည်ပြုနေဆဲ ဖြစ်သည်။
စစ်ကောင်စီသည် အခုရက်ပိုင်းတွင် သျှမ်း – ကယားနယ်စပ် ဒေသတလျှောက်ရှိ စစ်ရှောင်စခန်း အပါအဝင် အရပ်သားများကို ပစ်မှတ်ထားပြီး တိုက်ခိုက်နေသဖြင့် လုံခြုံရေးစိုးရိမ်နေကာ တောတောင်အတွင်းသို့ ထွက်ပြေးတိမ်းရှောင်နေ ကြရကြောင်း သိရသည်။
“ အရင်တစ်ရက်၊ နှစ်ရက်ကလည်း လေယာဉ်က တောက်လျှောက်ဝဲနေတာ။ ဒီရက်မှ လာထုသွားတယ်။ ပြီးတော့ လက်နက်ကြီးတွေနဲ့ အဆက်အပြတ် ထုနေတော့ ကျနော်တို့ စစ်ရှောင်တွေကျ စစ်ရှောင်စခန်းမှာ လုံးဝ မအိပ်ရဲတော့ဘူး။ နေ့ဘက်၊ ညဘက် တောထဲတောင်ထဲကို ပြေးပြီး ပုန်းခိုနေကြရတယ်။ အကြောက်တရား ကတော့ အတော်ဖြစ်သွားတာပေါ့။ တံခါးပိတ်တာတောင်မှ ကြားရတယ်။ စိတ်ထဲမှာလည်း လက်နက်သံတွေ စွဲနေတယ် “ ဟု စစ်ရှောင်ကူညီသူ ဒေသခံတစ်ဦးက ထပ်လောင်းပြောသည်။
ထို့အပြင် အာဏာသိမ်းပြီး ၂ နှစ်ကျော် ကာလအတွင်း စစ်ကောင်စီသည် ဘဏ္ဍာရေးဖက်တွင်လည်း အင်အား လျော့နည်းလာနေသလို စစ်မြေပြင်တွင် အကျအဆုံး များလာသည့်အတွက် နောက်ဆုံး လေကြောင်းကို ပိုမိုအသုံးပြုလာခြင်း ဖြစ်သည်ဟု PNDF KK မှ တာဝန်ခံတစ်ဦးက သျှမ်းသံတော်ဆင့်ကို ဖြေကြားခဲ့သည်။
“သူတို့ကတော့ ဒါဘဲ ကျန်တော့တာ။ ဒါနဲ့ဘဲ သူတို့က တစ်ဖက်ကနေ လုပ်နေတာ။ သူတို့မှာလည်း ဒါတွေနဲ့ဘဲ အင်အားကြီး နေတယ်လေ။ လက်နက်ကြီး၊ လေယာဉ်တွေနဲ့ သုံးတာကတော့ စကစ လုပ်နေတဲ့ အကွက်ပါပဲ။ သူတို့က ဒါတွေနဲ့ အင်အားကြီးနေရင် ဒါတွေနဲ့ဘဲ လုပ်မှာပဲ။ သုံးလို့မရတဲ့ အနေအထားမှာလည်း သူတို့က သုံးနေတယ် “ ဟု တာဝန်ခံတစ်ဦးက ပြောသည်။
သျှမ်း – ကယား နယ်စပ်ဒေသ တိုက်ပွဲဖြစ်ပွားမှုကြောင့် တောင်မဲသင်း၊ တောင်စလုံး၊ မြောက်စလုံး၊ လုံးပင် နှင့် နိမ့်နိန်း စသည့် ကျေးရွာမှ ပြည်သူ ၆ ထောင်ဝန်းကျင်သည် နေရပ်စွန့်ပြီး ထွက်ပြေးတိမ်းနေရဆဲဖြစ်သလို စားနပ်ရိက္ခာနှင့် ဆေးဝါးများလည်း လိုအပ်နေသေးကြောင်း သိရသည်။
