သျှမ်းပြည် လားရှိုးခရိုင် တန့်ယန်းမြို့နယ်တွင် တောထွက်လည်သည့် အမျိုးသား တစ်ဦးသည် ကျားကိုက်ခံရပြီး လက်ရှိတွင် ဆေးရုံ၌ တင်ထားရကြောင်း သတင်းသိရသည်။

ယမန်နေ့ (မေ ၄) ရက်တွင် တန့်ယန်းမြို့နယ် မိုင်းကျိုင်ကျေးရွာအုပ်စု မိုင်းကျိုင်ရွာတွင် တောထွက်လည်သည့် အမျိုးသားတစ်ဦးသည် ကျားကိုက်ခံရပြီး ထိခိုက်ဒဏ်ရာပြင်းထန်စွာ ရရှိသွားကြောင်း သိရသည်။

“တောလည်တာပေါ့နော်၊ အဲ့မှာ ကျားနဲ့ ဘယ်လို တွေ့မိတာလည်း မသိဘူး၊ လက်တွေ ခြေထောက်တွေ တော်တော် ထိသွားတယ်၊ အဖော်ပါသွားလို့ တော်သေးတယ်၊ သူတို့ကတော့ ကျားကိုက်တာ မခံရဘူး၊ သူတစ်ယောက်တည်းပဲ ဖြစ်သွားတယ်၊ အခုတစ်ခေါက် တောလိုက်ကြတာကလည်း တောနက်ထဲ ရောက်သွားလို့ထင်တယ်” ဟု တန့်ယန်းမြို့နယ်မှ အမျိုးသား တစ်ဦးက သျှမ်းသံတော်ဆင့်ကို ပြောသည်။

အဆိုပါ ကျားကိုက်ခံရသူသည် ဘယ်ခြေထောက် နှင့် ညာလက်တို့တွင် ထိခိုက်ဒဏ်ရာ ပြင်းထန်စွာ ရရှိသွား ကြောင်း နှင့် လက်ရှိတွင် တန့်ယန်းမြို့နယ် ဆေးရုံသို့ ပို့ဆောင် ကုသထားကြောင်း သိရသည်။

အဆိုပါ ကျားကိုက်ခံရသည့် ဒေသအတွင်းသည် ယခင်အချိန်ကလည်း ကျား နှင့် တခြား တောရိုင်း တိရိစ္ဆာန်များ ကျင်လည် ကျက်စားရာ ဒေသလည်း ဖြစ်ကြောင်း သိရသည်။

“တခါတလေ တောလည်တဲ့ သူတွေက ကျားတွေ့တာလို့ ခဏခဏ ပြောတာတွေ့ရတယ်၊ ဒါပေမဲ့ အကိုက်ခံရတာ မျိုး မရှိဖူးဘူး၊ ပြီးတော့ ဝက်ဝံခြေရာတွေလည်း တွေ့ရတယ်၊ ဒီဘက်မှာ တောအုပ်ကောင်းတော့ အကောင်တွေ လည်းစုံပါတယ်” ဟု အထက်ပါ ပုဂ္ဂိုလ်က ဆက်ပြောသည်။

ယင်းကဲ့သို့ တိရိစ္ဆာန်ပေါများသည့် တောအုပ်ကို ဆက်လက်ထိန်းသိမ်းဖို့ လိုအပ်သလို တောရိုင်း တိရိစ္ဆာန် အန္တရာယ်မှ ကင်းအောင်လည်း လုပ်ဆောင်ရမည် ဖြစ်ကြောင်း ရပ်ရွာ တာဝန်ရှိသူ တစ်ဦးက သျှမ်းသံတော်ဆင့်ကို ပြောသည်။

“တောမတက်ရင်လည်း တချို့ စားဝတ်နေရေးက အဆင်မပြေဘူး၊ တချို့က တောထဲက သစ်ဥသစ်ဖုတွေ၊ အရွက်အမြစ်တွေကို တူးဖော်ပြီးတော့ ပြန်လာရောင်းကြတယ်၊ တချို့ကလည်း တောကောင်တွေကို လိုက်ပစ်တာပေါ့၊ အဲ့ဒါကြောင့် တောမတက်နဲ့လို့ ပြောလည်း မရနိုင်ဘူး၊ အကန့်အသတ်အထိ တောနက်ထိ မရောက်ဖို့ ကိုတော့ အချင်းချင်း ထိန်းသိမ်းပြောကြရမှာပေါ့” ဟု ရပ်ရွာ တာဝန်ရှိသူ တစ်ဦးက သျှမ်းသံတော်ဆင့်ကို ပြောသည်။

လွန်ခဲ့သည့် ၂၀၁၈ ခုနှစ် နိုဝင်ဘာလတွင်လည်း တန့်ယန်းမြို့နယ်၌ အမျိုးသား ၃ ဦး ကျားကိုက်ခံရပြီး ဒဏ်ရာရရှိခဲ့ဖူးကြောင်း သိရသည်။

မြန်မာနိုင်ငံအတွင်း ကျားများ ကျင်လည် ကျက်စားနေသည့် ကျက်စားနယ်မြေသည် နိုင်ငံဧရိယာ၏ ၇ % ခန့်၊ ဧက (၁၂) သန်းကျော်ရှိနေကြောင်း မြန်မာ့သစ်တောဦးစီးဌာနက ထုတ်ပြန်ထားသည်။

ကျားများ ကျင်လည်ကျက်စားသည့် နယ်မြေအတွင်း အနည်းဆုံး ကျား (၂၂) ကောင် ရှင်သန် ကျက်စားနေလေ့ရှိကြောင်း သစ်တောဦးစီးဌာနက ၂၀၁၉ ခုနှစ်၊ ဇူလိုင်လ ၂၉ ရက်နေ့ ကမ္ဘာ့ကျားများနေ့ တွင် အတည်ပြုထုတ်ပြန်ထားသည်။