သျှမ်းပြည် လားရှိုးမြို့နယ်ရှိ နိုင်ငံရေး အကျဥ်းသားများအနက်မှ (၁၃) ဦးသည် လွတ်ငြိမ်းခွင့်ဖြင့် ပြန်လည်လွတ်မြောက်လာကြောင်း သိရသည်။
ယမန်နေ့ မေလ ၃ ရက်နေ့တွင် ကျရောက်သည့် ကဆုန်လပြည့် (ဗုဒ္ဓဟူးနေ့) အထိမ်းအမှတ်အဖြစ် အကျဥ်းထောင် အသီးသီးရှိ အကျဉ်းသား/အကျဉ်းသူ ၂,၁၅၃ ဦးကို ပြစ်ဒဏ်လျော့ပေါ့ လွတ်ငြိမ်းခွင့်ပေးကြောင်း အာဏာသိမ်း စစ်ကောင်စီက ကြေညာလိုက်သည်။
အဆိုပါ လွတ်ငြိမ်းခွင့်ရသူ ၂,၁၅၃ ဦး အနက် လားရှိုးမြို့ရှိ အကျဥ်းထောင်မှ နိုင်ငံရေး အကျဥ်းသား ၁၃ ဦး ပြန်လည် လွတ်မြောက်လာကြောင်း ရှေ့နေတစ်ဦးက သျှမ်းသံတော်ဆင့်ကို ပြောသည်။
“မနက်ပိုင်းမှာ ပုဒ်မ (၅၀၅) နဲ့ မိန်းကလေး ၂ ယောက်နဲ့ ယောကျာ်းလေး ၁၁ ယောက်ပဲ လွတ်လာတယ်။ ဒါက နိုင်ကျဥ်းထဲကပေါ့၊ နိုင်ကျဥ်းထဲ မဟုတ်တာကို လွတ်ပေးမယ်လို့လည်း သတင်းရပေမဲ့ အရေအတွက် တိတိ ကျကျတော့ မသိရဘူး” ဟု အထက်ပါ ရှေ့နေက သျှမ်းသံတော်ဆင့်ကို ပြောသည်။
သျှမ်းပြည် တောင်ကြီးခရိုင်၊ ညောင်ရွှေမြို့ရှိ၊ ညောင်ရွှေအကျဥ်းထောင် (တောင်လေးလုံး) အကျဥ်းထောင်မှ နိုင်/ကျဥ်း တချို့ နှင့် တခြား အကျဥ်းသားများလည်း ပြန်လည်လွတ်မြောက်လာကြောင်း စုံစမ်းသိရသည်။
“ထောင်ရှေ့မှာ (တောင်လေးလုံး) မနက်ကတည်းက သွားစောင့်ပြီး ၁၀ နာရီလောက်မှာတော့ အကျဥ်းသား တချို့ကို စလွတ်လာတယ်၊ ၅၀၅ (က) နဲ့ ဖမ်းဆီး အမိန့်ချခံထားရတဲ့ ကျနော့် ညီလည်း ပြန်လွတ်လာပါပြီ၊ သူနဲ့ အတူ တခြား ၅၀၅ သမားတွေလည်း ပါလာတယ်၊ အရေအတွက် တော့ မသိရဘူး” ဟု တောင်လေးလုံး အကျဥ်းထောင်မှ လွတ်ငြိမ်းဖြင့် ပြန်လည်လွတ်မြောက်လာသည့် နိုင်/ကျဥ်းတစ်ဦး၏ ဆွေမျိုး တစ်ဦးက သျှမ်းသံတော်ဆင့်ကို ပြောသည်။
ထို့အပြင် ကျိုင်းတုံ၊ တာချီလိတ် အကျဥ်းထောင်များရှိ နိုင်ငံရေး အကျဥ်းသားများလည်း လွတ်ငြိမ်းချမ်းသာခွင့် ရသူများလည်း ရှိနေကြောင်း သတင်းထွက်ပေါ်သော်လည်း သီးခြား အတည်ပြုနိုင်ခြင်း မပြုနိုင်သေးပါ။
ယမန်နေ့ မေ ၃ ရက်တွင် နိုင်ငံရေးအကျဥ်းသား ၂,၁၅၃ ဦးကို လွတ်ငြိမ်းခွင့်ပေးကြောင်း စစ်ကောင်စီမှ ထုတ်ပြန်ထားသော်လည်း နိုင်ငံရေး အကျဥ်းသားများ ကူညီစောင့်ရှောက်ရေးအသင်း AAPP ၏ မေလ ၃ ရက်နေ့ ညနေ ၅ နာရီထိ ကိန်းဂဏန်းအရ (၁,၂၇၇) ဦးကို အတည်ပြုနိုင်ခဲ့ပြီး (၉၆) ဦးကိုသာ အမည်နှင့်တကွ အတည်ပြု နိုင်ခဲ့ကြောင်း ထုတ်ပြန်ထားသည်။
ပြီးခဲ့သည့် ဧပြီ ၁၇ ရက်နေ့ မြန်မာနှစ်ဆန်းတရက်နေ့ကလည်း အကျဉ်းသား/သူ ၃,၀၁၅ ဦးနှင့် နိုင်ငံခြားသားအကျဉ်းသား/သူ ၉၈ ဦးတို့အား ချွင်းချက်ဖြင့်ပင် စစ်ကောင်စီက လွတ်ငြိမ်းခွင့်ပေးခဲ့သည်။
