သျှမ်းပြည် ကျောက်မဲ ခရိုင် နောင်ချိုမြို့နယ် ဒေသခံ အမျိုးသား ၅ ဦး မြေမြှုပ်မိုင်း နင်းမိပြီး နှစ်ဦးက ပြင်းထန်စွာ ထိခိုက် ဒဏ်ရာရသွားကြောင်း သတင်းသိရသည်။
ပြီးခဲ့သည့် ဧပြီလ ၂၉ ရက်နေ့ မနက်ပိုင်း ၁၁ နာရီဝန်းကျင်တွင် နောင်ချိုမြို့နယ် ၊ ကုန်းကြီး ကျေးရွာ အုပ်စုရှိ နောင်ခဲရွာ (ဝၢၼ်ႈၼွင်ၶၢႆး) နေ ဒေသခံ အမျိုးသား ၅ ဦးတို့သည် ကြံစိုက်ခင်း သွားကြည့်စဥ် မြေမြှုပ်မိုင်းနင်းမိကြောင်း အမည်မဖော်လိုသူ ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
“သူတို့ မိုင်းထိတဲ့ နေရာက PDF ပူးပေါင်းတပ်ဖွဲ့ နဲ့ စစ်ကောင်စီတွေ တိုက်ပွဲ ဖြစ်တဲ့ နေရာဖြစ်တယ်၊ ၅ ယောက် ထဲမှာ ၂ ယောက်က ဘောင်မှာ ဒဏ်ရာတော်တော်ပြင်းထန်တယ်၊ အခုတော့ နောင်ချိုက ဆေးရုံမှာ ဆေးကု ထားတယ်” ဟု ဖြစ်စဥ်ကို သိရှိသည့် အမည်မဖော်လိုသူ အသက် ၄၀ ကျော် အမျိုးသားက သျှမ်းသံတော်ဆင့်ကို ပြောသည်။
အဆိုပါ မိုင်းနင်းမိသူ ၅ ဦး အနက် အသက် ၄၃ နှစ်ရှိ စိုင်းစု နှင့် အသက် ၄၇ နှစ်ရှိ စိုင်းကျော်ထွန်း တို့ နှစ်ဦးသည် ခြေထောက်တွင် ပြင်းထန် ထိခိုက် ဒဏ်ရာရရှိကြောင်း ၎င်းက ဆက်ပြောသည်။
ထို့အပြင် စိုင်းပစိန် အသက် ၂၆ နှစ်၊ စိုင်းဆန်ဝန်း အသက် ၂၅ နှစ် နှင့် စိုင်းဆန်ကျောင်း ၂၄ နှစ်တို့ကလည်း ထိခိုက် ဒဏ်ရာ အသီးသီး ရရှိသွားကြောင်း သိရသည်။
အဆိုပါ ပေါက်ကွဲမှု ဖြစ်သည့် မိုင်းများသည် မည်သည့်လက်နက်ကိုင် အဖွဲ့အစည်းမှ လာရောက် ထောင်ထားသည့် မိုင်း ဖြစ်သည်ကို မသိရသေးကြောင်း နှင့် လက်ရှိအချိန်တွင် ဒေသခံများက မြေမြှုပ်မိုင်းများ၊ တိုက်ပွဲ အတွင်း ကျန်သည့် လက်နက်များ ပေါက်ကွဲမှု ထပ်ဖြစ်မှာကို စိုးရိမ်နေရကြောင်းလည်း ဒေသခံများက ပြောသည်။
“အခုချိန်မှာ တိုက်ပွဲက ငြိမ်သွားပေမယ့် အဲ့လိုမျိုး မိုင်းတွေ၊ ပြီးတော့ မပေါက်ကွဲသေးဘဲ ကျန်နေတဲ့ လက်နက်တွေ မတော်တဆ ပေါက်ကွဲမှာကို ကြောက်ရတယ်၊ အခုဆို စစ်ရှောင်ကနေ ပြန်ရောက်ကြပေမဲ့ တောင်ယာတွေ ကိုလည်း သွားဖို့ ကြောက်ရတယ်၊ မလုံခြုံသေးဘူး” ဟု အထက်ပါ အမျိုးသားက ဆက်ပြောသည်။
ပြီးခဲ့သည့် ဧပြီ (၃) ရက်နေ့ကလည်း နောင်ချိုမြို့နယ် ကုန်းညောင်ကျေးရွာ မှ ကြံစိုက်ခင်း သွားသည့် ဒေသခံ အမျိုးသား တစ်ဦး မြေမြှုပ်မိုင်း နင်းမိပြီး ဒဏ်ရာ ရရှိခဲ့သည်။
နောင်ချိုမြို့နယ်အတွင်း ဧပြီလ ၅ ရက်နေ့ မှ ၂၂ ရက်နေ့အထိ စစ်ကောင်စီ တပ်ဖွဲ့ နှင့် ပြည်သူ့ကာကွယ်ရေး ပူးပေါင်း တပ်ဖွဲ့ PDF တို့ ထိတွေ့တိုက်ပွဲ ပြင်းထန်စွာ ဖြစ်ပွားခဲ့ပြီး၊ အရပ်သား ၃ ဦး ထက်မနည်း တိုက်ပွဲအတွင်း ထိခိုက်သေဆုံးရသည်။
ထို့အပြင် ဒေသခံ ၁၅၀၀ ကျော် စစ်ရှောင်ထွက်ပြေးရပြီး ပြည်သူ့ နေအိမ် ၂၄ လုံး၊ ကြံစိုက်ခင်း ဧကပေါင်း ၄၆၀ ဧက နှင့် ယခု မိုင်းပေါက်ကွဲ အပါအဝင် မိုင်းပေါက်ကွဲမှုကြောင့် အရပ်သား ၉ ဦး ထက်မနည်း ထိခိုက်ဒဏ်ရာ ရကြောင်း သိရသည်။
မြန်မာနိုင်ငံ မြေမြှုပ်မိုင်း စောင့်ကြည့်လေ့လာရေးအဖွဲ့၏ ၂၀၂၀ ခုနှစ် အထိ အစီရင် ခံစာအရ မြေမြှုပ်မိုင်း နှင့် စစ်ကျန် ပေါက်ကွဲ ပစ္စည်းများကြောင့် ထိခိုက်ဒဏ်ရာရမှု၊ သေဆုံးမှု စုစုပေါင်း ၃၆၈ ခု ရှိနေပြီး သျှမ်းပြည်သည် ထိခိုက်၊ ဒဏ်ရာရမှု အများဆုံးအဖြစ် (၁၂၁) ခု ရှိနေကြောင်း သိရသည်။
ဒေသအလိုက်အနေဖြင့် သျှမ်းပြည်တွင် မြေမြှုပ်မိုင်းနင်းမိသူ (၄၂) ရာခိုင်နှုန်းရှိခဲ့ပြီး၊ စစ်ကိုင်းတိုင်းတွင် (၁၂) ရာခိုင်နှုန်း၊ ရခိုင်တွင် (၁၁) ရာခိုင်နှုန်း၊ ကချင်တွင် (၁၀) ရာခိုင်နှုန်း နှင့် ကရင်တွင် (၇) ရာခိုင်နှုန်းရှိပြီး သျှမ်းပြည်သည် အများဆုံး ဖြစ်ကြောင်း သိရသည်။
မိုင်းအန္တရာယ်လျော့ချရေး အသိပညာပေး လုပ်ငန်းများကို နိုင်ငံတော် အဆင့် အာဏာပိုင်များ တရားဝင်ခွင့်ပြုချက်ဖြင့် ပြည်တွင်း စစ်ဖြစ်ပွားနေသည့် နေရာဒေသများ၌ ဆောင်ရွက်ပေးနိုင်ပါက မိုင်းအန္တရာယ်လျော့ချမှု အတွက် အကောင်းဆုံး ဖြစ်နိုင်မည် ဖြစ်ကြောင်းလည်း မြန်မာနိုင်ငံ မြေမြှုပ်မိုင်း စောင့်ကြည့်လေ့လာရေး အဖွဲ့က ထုတ်ပြန် ပြောဆိုထားသည်။
Leave a Comments