သျှမ်းပြည် တောင်ကြီးခရိုင် ပင်လောင်း – ဖယ်ခုံ နယ်စပ်တိုက်ပွဲတွင် စစ်ကောင်စီမှ လေကြောင်းဖြင့် စစ်ရှောင်စခန်းများပါ တိုက်ခိုက်လာနိုင်ကြောင်း PNDF KK တာဝန်ခံတစ်ဦး အသိပေးချက်အရ သိရသည်။

စစ်ကောင်စီသည် ပြီးခဲ့သည့် ဧပြီလ ၂၅ ရက်မှစပြီး ဖယ်ခုံမြို့နယ် ဆောင်းဖွေးဆေးရုံကို Mi 35 လေယာဉ်ဖြင့် ဗုံးကြဲတိုက်ခိုက်ခဲ့ပြီး ဧပြီလ ၂၇ ရက်တွင် ဒီးမော့ဆို အနောက်ဖက်ခြမ်းဒေသရှိ စစ်ရှောင်စခန်းအပါအဝင် ဒေသခံ နေအိမ်ကိုလည်း လက်နက်ကြီး၊ တိုက်လေယာဉ်ဖြင့်ပါ စဉ်ဆက်မပြတ် ဗုံးကြဲ တိုက်ခိုက်ခဲ့သည်။

အလားတူ ယမန်နေ့ ဧပြီလ ၃၀ ရက် နံနက်အစောပိုင်း ၅ နာရီအချိန်တွင်လည်း ပင်လောင်း – ဖယ်ခုံ နယ်စပ်ဒေသ ဖြစ်ပွားသည့်တိုက်ပွဲတွင် စစ်ကောင်စီမှ လေကြောင်း အသုံးပြုပြီး တိုက်ခိုက်နေရာ အနီးအနား တဝိုက်ရှိ စစ်ရှောင်စခန်းတွေပါ တိုက်ခိုက်လာနိုင်သဖြင့် သတိပြု နေထိုင်ရန် PNDF KK မှ တာဝန်ခံတစ်ဦးက ပြောသည်။

“တိုက်ပွဲကတော့ ဆိုးတယ်ဗျ။ ပြင်းထန်နေသေးတယ်။ ရန်သူဖက်ကလည်း အင်အားထပ်တိုးလာမယ့် အနေအထားတွေ ရှိနေတယ်။ မနေ့တုန်းကလည်း တောင်မဲသင်းဖက်မှာ သူတို့ လေယာဉ်နဲ့ ဗုံးကြဲတိုက်ခိုက် တာတွေလည်း ရှိတယ်ဗျ။ ကျနော်တို့ ဒီဖက်က စစ်ရှောင်နေရာတွေမှာလည်း အဲ့လိုမျိုး သူတို့လုပ်လာနိုင်တဲ့ အနေအထားရှိတယ်ဗျ။ အခု ပင်လောင်း၊ ဖယ်ခုံဖက်မှာ တိုက်ပွဲ နေ့တိုင်း လိုလိုဖြစ်နေတာ ၂ လ ကျော်နေပြီ “ ဟု ၎င်း တာဝန်ခံတစ်ဦးက ပြောသည်။

လက်ရှိ တိုက်ပွဲဖြစ်ပွားသည့် ပင်လောင်း – ဖယ်ခုံနယ်စပ်တွင် စစ်ကောင်စီဖက်မှ အကျဆုံးများသဖြင့် ဒီထက် အင်အားဖြည့်တင်းလာနိုင်ခြင်း ရှိသလို စစ်ရှောင်စခန်းတွေပါ တိုက်ခိုက်လာနိုင်သဖြင့် သတိပြုရန် ၎င်းက ထပ်လောင်း သတိပေးသည်။

“ ဘယ်အချိန်သေမယ်ဆိုတာ မသိရတဲ့ဘဝ မဟုတ်တော့ဘူး။ သိနေရတဲ့ ဘဝဖြစ်နေပြီ။ လောလောဆယ်တော့ သေမင်းလက်က ခဏသာလွတ်အောင် ပြေးနေရတာပေါ့ဗျာ “ ဟု ဒီးမော့ဆို အနောက်ခြမ်းရှိ စစ်ရှောင်တစ်ဦးက ပြောသည်။

ထို့အပြင် စစ်ကောင်စီသည် အရပ်သားများကို ကုသပေးနေသည့် ဆေးရုံ၊ ဆေးခန်းများအပေါ် (ဧပြီလ) အတွင်း လေကြောင်းမှတဆင့် ဗုံးကြဲတိုက်ခိုက်မှု အရှိန်တိုးမြင့်လာကြောင်း အမျိုးသား ညီညွတ်ရေးအစိုးရအဖွဲ့ ကျန်းမာရေးဝန်ကြီးဌာန (MOH NUG) က ဧပြီ ၂၈ ရက်တွင် ထုတ်ပြန်ထားသည်။

စစ်ကောင်စီမှ တိုက်လေယာဉ်ဖြင့် အသုံးပြုပြီး ဆောင်းဖွေးဆေးရုံကို တိုက်ခိုက်ခဲ့သည့် ဖြစ်စဉ်အတွင်း တိုက်လေယာဉ်ဖြင့် (၅) ကြိမ်ထက်မနည်း ဗုံးသီး (၁၀) လုံးကျော် ပစ်ခတ်ခဲ့သောကြောင့် အသက် (၁၅) နှစ်အရွယ် ကလေးတစ်ဦး အပါအဝင် ပြည်သူ (၅) ဦး ထိခိုက်ဒဏ်ရာရရှိခဲ့ပြီး ကလေးမီးဖွားပြီး (၂) ရက်သာရှိသေးသူ အသက် (၁၈) နှစ်အရွယ်ရှိ မပန်းလဲ့ဦး၏ ဦးခေါင်းဗုံးစ ဖောက်ဝင်ဒဏ်ရာ ရရှိပြီး အသက် အန္တရာယ်ရှိနေကြောင်း ထုတ်ပြန်ချက်တွင် ဖော်ပြထားသည်။