သျှမ်းပြည် တောင်ကြီးခရိုင် ပင်လောင်းမြို့နယ် နှင့် ဖယ်ခုံမြို့နယ် နယ်စပ် တိုက်ပွဲတွင် စစ်ကောင်စီက ပြည်သူများကို လူသားဒိုင်းကာ အဖြစ် ဖမ်းဆီးသွားကြောင်း စုံစမ်းသိရှိရသည်။

ပြီးခဲ့သည့် ဧပြီ ၂၅ ရက်တွင် ဖယ်ခုံမြို့နယ် နှင့် ပင်လောင်းမြို့နယ် နယ်စပ်ရှိ စစ်ရှောင်စခန်းကို စစ်ကောင်စီက လေယာဉ်ဖြင့် ဝင်ရောက်တိုက်ခိုက်ခဲ့ပြီးနောက် ပြည်သူများကို လူသားဒိုင်းကာအဖြစ် ဖမ်းဆီးသွားမှုရှိကြောင်း ပင်လောင်းမြို့ ဒေသခံ အမျိုးသားတစ်ဦးက ပြောသည်။

“ လူသားဒိုင်းကာ အဖြစ် ဖမ်းသွားတာတော့ ကြားတယ်။ ဘယ်ကျေးရွာက လူလဲဆိုတာတော့ သေချာမသိဘူး။ ၅ ယောက်လောက်တော့ ဖမ်းသွားတယ်လို့ ကြားတယ်။ ပြီးခဲ့တဲ့ ဆေးခန်းကို လေယာဉ်နဲ့ တိုက်ခိုက်ပြီးတဲ့ နောက်ပိုင်းရက်မှာပဲ ဖမ်းသွားတာ။ ဘယ်သူတွေပါသွားလဲဆိုတာတော့ အတိကျ မသိရဘူး” ဟု ၎င်းက ပြောသည်။

ထိုအပြင် စစ်ကောင်စီတပ်ဖွဲ့က ဒေသခံ အရပ်သားများကို လူသားဒိုင်းကာ အဖြစ် ဖမ်းဆီးသွားသည့်အပြင် သတ်ဖြတ်မှုလည်းရှိကြောင်း PNDF-KK သတင်းနှင့် ပြန်ကြားရေးတာဝန်ခံ ခွန်ဗွေဟုန်းက သျှမ်းသံတော်ဆင့်ကို ပြောသည်။

“ ကျနော်တို့ တပ်ရင်းအနေနဲ့တော့ အတည်မပြုနိုင်သေးဘူး။ ဒါမဲ့ အခုတိုက်ပွဲအတွင်းမှာ စစ်ကောင်စီဘက် ကနေတော့ ပြည်သူတွေကို လူသားဒိုင်းကာ အဖြစ် ဖမ်းဆီးတာရှိတယ်။ ပြီးတော့ သတ်ဖြတ်တာတွေ လည်းရှိတယ်။ ဘယ်သူတွေလဲ၊ ဘယ်ကျေးရွာ ဒေသခံတွေလဲဆိုတာတော့ ကျနော်တို့ စုံစမ်းနေပါတယ်” ဟု ခွန်ဗွေဟုန်းက ပြောသည်။

အလားတူ KNDF Pekhon Zone ကလည်း ယနေ့ ဧပြီ ၂၈ ရက်တွင် စစ်ကောင်စီသည် ပင်လောင်းမြို့နယ် လုံးပျဉ်ကျေးရွာအုပ်စု လယ်ကြားကျေးရွာ ဒေသခံများကို လက်နောက်ပြန်ကြိုးတုတ်ပြီး လူသားဒိုင်းကာ အဖြစ်ဖမ်းဆီးသွားခဲ့ကြောင်း ထုတ်ပြန်ထားသည်။

ထို့အပြင် လူသားဒိုင်းကာ အဖြစ် အသုံးပြုဖမ်းဆီးခံရသည့်သူထဲတွင် ကိုယ်လက် ၊ မျက်စိ နှိပ်စက်ခံထားရသည့် ရုပ်အလာင်း တစ်ခုကိုလည်း တွေ့ရှိခဲ့ရပြီး တော်လှန်ရေးအင်အားစုမှ မီးသင်္ဂြိုလ်ပေးခဲ့ကြောင်း ရေးသားထားသည်။

လက်ရှိအချိန်ထိ ဖယ်ခုံမြို့နယ် နှင့် ပင်လောင်းမြို့နယ် နယ်စပ် တောင်စလုံး ၊ မြောက်စလုံး ၊ တောင်မဲသင်းတို့သည် တိုက်ပွဲဆက်လက် ပြင်းထန်နေလျက်ရှိကြောင်း သိရသည်။

“ ဒီနေ့ အချိန်ထိတော့ တိုက်ပွဲဖြစ်နေတယ်။ နေ့တိုင်းနီးပါး တိုက်ပွဲပြင်းထန်နေတယ်။ စစ်ကောင်စီကလည်း လက်နက်ကြီးတွေ၊ လေယာဉ်တွေနဲ့လည်း လာတိုက်ခိုက်နေတာရှိတယ်။ တိုက်ပွဲက မငြိမ်သေးဘူး” ဟု PNDF KK ခွန်ဗွေဟုန်းက ပြောသည်။

အလားတူ ပြီးခဲ့သည့် မတ် ၁၁ ရက်တွင်လည်း စစ်ကောင်စီက ပင်လောင်းမြို့နယ် နိမ့်နိန်းကျေးရွာထဲ ဝင်ရောက်ပစ်ခတ်ခဲ့သည့်အတွက်ကြောင့် အရပ်သား ၁၉ ဦး နှင့် သံဃာ (၃) ပါးတို့ကို သတ်ဖြတ်ခဲ့သည်။