သျှမ်းပြည် လွိုင်လင်ခရိုင် လွိုင်လင် – နမ့်စန် ပြည်ထောင်စု လမ်းမကြီးကြားတွင် ယခုရက်ပိုင်း ညအချိန် သွား လာရာတွင် ဓားပြတိုက်မှု ရှိနေကြောင်း သတင်းရရှိသည်။

အလားတူ ယမန်နေ့ ဧပြီ ၂၆ ရက် ည ၁၁ နာရီဝန်းကျင်တွင်လည်း ၁၂ ဘီး ကားသမား အပေါ့ ဆင်းသွားရာမှ ဓားထောက်ပြီး ငွေ ၂ သိန်း ပေးဆောင်ခဲ့ရကြောင်း သိရသည်။

“အခုတလော လွိုင်လင် – နမ့်စန် လမ်းမကြားမှာက ဓားပြတွေ အရမ်းများလာတယ်။ မနေ့ ညကလည်း ကားသမားကို ဓားထောက်ပြီး ပိုက်ဆံတောင်းတာ ၂ သိန်း ပေးလိုက်ရတယ်။ ကံကောင်းလို့ မသေတာပေါ့” ဟု လွိုင်လင်မြို့ ဒေသခံတစ်ဦးက ပြောသည်။

ယခု ဧပြီလအတွင်း လွိုင်လင်မြို့နယ် နည်းပညာတက္ကသိုလ် အနီးတွင် ညအချိန်၌ လေးဂွဖြင့် ပစ်ခတ်ခဲ့မှု ရှိသည့် အတွက် ကားဆရာတစ်ဦး မျက်စိ ထိမှန်သွားခဲ့သည့် ဖြစ်စဥ်လည်းရှိသည်။

“ ကျမတို့ ည ၉ နာရီလောက် နမ့်စန်ကနေ ပြန်လာခဲ့တာ။ လွိုင်လင်မြို့ အနီးက။ အဲ့တာ လေးဂွ နဲ့ မှန်ကားထဲကို ပစ်လာတာ။ ကားသမား မျက်စိ ထိသွားတာ။ ကံကောင်းလို့ မျက်လုံး မထိသွားဘူး။ ကားရပ်လိုက်ရင်တော့ သူတို့လာပြီး ဓားပြတိုက်မှာ” ဟု ကြုံတွေ့ခဲ့ရသည့် အမျိုးသမီးက ပြောသည်။

လေးဂွဖြင့် လိုက်လံပစ်ပြီး ဓားပြတိုက်နေသူများကို ရွာသား နှင့် တာဝန်ရှိသူတို့က ဖမ်းဆီးပြီး ပြန်လွှတ်ပေးခဲ့ကြောင်း သိရသည်။

“ လေးဂွ နဲ့ ပစ်နေတဲ့ သူတွေ ၆ ယောက် လောက်ရှိတယ်တဲ့ ။ အဲ့နားက ရွာကလူတွေ ဖမ်းလိုက်တယ်တဲ့။ ဖမ်းပြီးတော့ ပြန်လွှတ်ပေးတာတဲ့။ ဒီတိုင်းပဲ ဆုံးမပြီးတော့ ပြန်လွှတ်ပေးနေကြတာတဲ့” ဟု လွိုင်လင်မြို့ ဒေသခံတစ်ဦးက ပြောသည်။

လွိုင်လင်မြို့နယ် နည်းပညာတက္ကသိုလ်အနီး ပန်ခေါက်ဝိုး ကျေးရွာ တည်ရှိထားသည်။

စစ်တပ်အာဏာသိမ်းပြီးနောက်ပိုင်း သျှမ်းပြည်တစ်ဝှမ်း သူခိုး ၊ ဓားပြ ၊ လောင်းကစားဝိုင်း ၊ မူးယစ်ဆေးဝါးများ ပိုမိုများလာခဲ့သည်။