Sunday, May 26, 2024

ပင်လုံမြို့ အမျိုးသား လူငယ်နှစ်ဉီး ၂ လနီးပါး ပျောက်ဆုံးနေ

Must read

သျှမ်းပြည် လွိုင်လင်ခရိုင် ပင်လုံမြို့အတွင်း နေထိုင်သည့် အမျိုးသား လူငယ် နှစ်ဉီးသည် နှစ်လနီးပါး ပျောက်ဆုံး နေပြီး ယနေ့ အချိန်အထိ အဆက်အသွယ် မရသေးကြောင်း သတင်းသိရသည်။

ပျောက်ဆုံးနေသည့် အမျိုးသား

ပြီးခဲ့သည့် မတ်လ ၄ ရက်မှ ညနေပိုင်း ၆ နာရီဝန်းကျင် အချိန်မှ စတင်ကာ လွိုင်လင်ခရိုင်၊ ပင်လုံမြို့ရှိ ဆနင်းဒေသ နှင့် နားတေကျေးရွာကြားတွင် ပျောက်ဆုံးသွားသည့် အမျိုးသားလူငယ် ၂ ဉီးသည် ယနေ့ အချိန်အထိ အဆက်အသွယ်မရသေးသဖြင့် မိသားစုဝင်များက စိုးရိမ်နေကြကြောင်း နီးစပ်သူ တစ်ဉီးက သျှမ်းသံတော်ဆင့်ကို ပြောသည်။

“သူတို့က ပန်ဟူကျေးရွာဘက်ကို အလည်သွားပြီး ပြန်အလာ လမ်းမှာ ပျောက်သွားတာ၊ သူတို့ ထွက်လာတဲ့ လမ်းမှာက “ဝ” စစ်သား စောင့်တဲ့ စစ်ဆေးရေးဂိတ် တစ်ခုလည်းရှိနေတယ်၊ အဲ့ကြောင့် ဒီနယ်တစ်ကြောမှာ တာဝန်ရှိတဲ့ SSPP/SSA တပ်ဖွဲ့က ဗိုလ်မှူးစိုင်းစောကိုသွားမေးကြည့်တော့ သူကလည်း မသိရဘူးတဲ့ ၊ အခုလည်း ပျောက်နေတာ ကြာပြီဆိုတော့ မိသားစုဝင်တွေကတော့ တအားကို စိတ်ပူနေကြတယ်” ဟု ပျောက်ဆုံးသူ နှစ်ဦး နှင့် နီးစပ်သူက သျှမ်းသံတော်ဆင့်ကို ပြောသည်။

အဆိုပါ အမျိုးသားလူငယ် နှစ်ဦးသည် ပန်ပျဥ် (ဝၢၼ်ႈပၢင်ပႅၼ်ႈ) ကျေးရွာနေ စိုင်းဇင် အသက် (၂၇) နှစ်၊ စိုင်းဆွန် (ၸၢႆးသွၼ်) အသက် ၂၂ နှစ်ရှိသည့် သူငယ်ချင်း နှစ်ဦး ဖြစ်ကြပြီး ပန်ဟူကျေးရွာဘက်မှ အပြန်လမ်းတွင် ပျောက်ဆုံး သွားခြင်း ဖြစ်ကြောင်း နီးစပ်သူက ပြောသည်။

ထို့အပြင် ၎င်းတို့ နှစ်ဦးအနက်မှ စိုင်းဇင် အသက် (၂၇) နှစ်သည် ပအိုဝ်းအမျိုးသား အဖွဲ့ချုပ် (PNO/ PNA) တွင် ပြည်သူ့စစ်တပ်ဖွဲ့ ဝင် တစ်ဦး ဖြစ်နေသည့်အတွက် PNO/PNA မှ တာဝန်ရှိသူများကလည်း အဆိုပါ ဒေသအတွင်းရှိ “ဝ” တပ်ဖွဲ့နှင့် သွားရောက် တွေ့ဆုံမှု ရှိခဲ့ကြောင်း ၎င်းက ဆက်ပြောသည်။

“လူ စစ်ပျောက်တုန်းက ပအိုဝ်းပြည်သူ့စစ် ခေါင်းဆောင်အဖွဲ့ကလည်း “ဝ” တပ်ဖွဲ့ထံကို သွားမေးတယ်၊ သူတို့လူကို ခေါ်ထားလား ဘာညာပေါ့၊ ဒါပေမဲ့ “ဝ” တပ်ဖွဲ့က မယူဘူးလို့ပဲ အကြောင်းပြန်တယ်၊ SSPP/SSA တာဝန်ရှိသူ ကလည်း “ဝ”တပ်ဖွဲ့ကို သွားမေးဖို့ပဲ ပြောတယ်” ဟု ၎င်းက ပြောသည်။

၎င်းတို့ ပျောက်ဆုံးသွားသည့် မတ်လ မှ ယနေ့ အချိန်အထိ မည်သည့်နေရာကို ရောက်ရှိနေကြောင်း နှင့် သေကြောင်း ရှင်ကြောင်း ကို မသိရသေးသည့် အတွက် မိဘများက စိတ်ပူနေကြကြောင်း သိရသည်။

၎င်းတို့ နှစ်ဦးကို တွေ့ရှိသူများ (သို့မဟုတ်) သူတို့ နှစ်ဦး နှင့် ပတ်သက်သည့် သတင်းများကို သိရှိပါက အောက်ပါ ဖုန်းနံပါတ် 09979456939 ကို ဆက်သွယ် အကြောင်းကြား ပေးစေလိုကြောင်းလည်း မိသားစုဝင်များက တောင်းဆိုထားသည်။

ပင်လုံမြို့၊ ထုန့်ဆနင်းဒေသသည် ပြီးခဲ့သည့် ၂၀၂၂ ခုနှစ်အတွင်း မြောက်ပိုင်းမဟာမိတ် တပ်ဖွဲ့ဝင်များ နှင့် သျှမ်းပြည် ပြန်လည်ထူထောင်ရေးကောင်စီ၊ သျှမ်းပြည် တပ်မတော် RCSS/SSA တို့ တိုက်ပွဲ အပြီး RCSS/SSA က ဆုတ်ခွာပေးခဲ့ရပြီး အဆိုပါ ဒေသအတွင်းမှာလည်း မြောက်ပိုင်းမဟာမိတ်တပ်ဖွဲ့ဝင်များက နေရာယူထားခြင်း ဖြစ်ကြောင်းလည်း သိရသည်။

Leave a Comments

- Advertisement -spot_img

Latest article