သျှမ်းပြည် ကျောက်မဲခရိုင် နောင်ချိုမြို့နယ်အတွင်း စစ်ကောင်စီ နှင့် မန္တလေး PDF တို့ တိုက်ပွဲကြားတွင် စစ်ကောင်စီ ခလရ (၁၄၇) တပ်ရင်းမှူး ဒုတိယ ဗိုလ်မှူးကြီး မြတ်မင်းထွန်း အပါအဝင် စစ်ကောင်စီ တပ်သား ၁၀၀ နီးပါး သေဆုံးကြောင်း MDY PDF က ထုတ်ပြန်ထားသည်။
ယမန်နေ့ (ဧပြီ ၂၂) ရက် နံနက် ၃ နာရီဝန်းကျင်တွင် စစ်ကောင်စီ ခလရ (၁၄၇) တပ်စွဲထားသည့် စခန်းကုန်းကို MDY PDF က ဝင်ရောက် စီးနင်းပြီး နေထိုင်ခဲ့ကြောင်း သိရသည်။
တိုက်ပွဲကာလအတွင်း စစ်ကောင်စီ တပ်မှ ခလရ (၁၄၇) တပ်ရင်းမှုး ဒုတိယ ဗိုလ်မှူးကြီး တစ်ဦး ၊ ခလရ (၂၅၈) မှ တပ်ခွဲမှုး ဗိုလ်ကြီးတစ်ဦး နှင့် ခလရ (၂၅၃) မှ တပ်ခွဲမှူး ဗိုလ်ကြီးတစ်ဦး အပါအဝင် တပ်သား (၁၀၀) ဦး ဝန်းကျင်ထိ သေဆုံးခဲ့ပြီး ခလရ (၂၅၃) မှ စစ်ကြောင်းမှူး အပါအဝင် အများအပြား ထိခိုက်ဒဏ်ရာ ရရှိခဲ့ကြောင်း ထုတ်ပြန်ချက်တွင် ဖော်ပြထားသည်။
ထို တိုက်ပွဲအတွင်း ပြည်သူ့ကာကွယ်ရေး ရဲဘော် (၁၁) ဦး ကျဆုံးခဲ့ပြီး အချို့ ထိခိုက်ဒဏ်ရာ ရရှိခဲ့ကြောင်း သိရသည်။
“ ကျနော်တို့ သူတို့စခန်းကို ဝင်တိုက်တာက မနက် ၃ နာရီလောက်ပေါ့။ မြတ်မင်းထွန်း ကား ကတော့ မနက်အစောပိုင်းရောက်လာခဲ့တာ။ အိမ်စီးကား ၂ စီးလာတာ။ ယူနီဖောင်း နဲ့ ဝတ်လာတာကို ကားထဲကနေ တွေ့လိုက်တာ။ ကျနော်တို့ တားစစ်ဆေးတော့ မရပ်ပေးဘူး။ အဲ့ကြောင့် ပစ်ခတ်လိုက်တာ။ ကားထဲမှာက ဒုတိယ ဗိုလ်မှူးကြီး မြတ်မင်းထွန်းက သေဆုံးနေပြီ” ဟု MDY PDF ပြောခွင့်ရ ကိုအော်စမွန်က ပြောသည်။
ထို့ပြင် ဧပြီလ ၂၂ ရက်တွင် စစ်ကောင်စီ တပ်စွဲထားသည့် စခန်းကုန်းကို ၀င်ရောက်တိုက်ခိုက်ရာ စစ်သားများ ထွက်ပြေးသွားပြီး မန္တလေး PDF မှ နေရာယူထားကြောင်း သိရသည်။
တိုက်ပွဲအတွင်း စစ်ကောင်စီထံက MA (3) ၃ လက် ၊ 5.56 ကျည် အများအပြား ၊ ၉ မမ ကျည် အတောင့် (၂၀)၊ ၆၀ မမ အသီး (၁၀) လုံး နဲ့ အခြား ဆက်စပ်ပစ္စည်းများ သိမ်းဆည်းရမိခဲ့တယ်လို့ မန္တလေး PDF ကထုတ်ပြန်ထားသည်။
အလားတူ ယမန်နေ့တွင် နောင်ချိုမြို့ပေါ်ရှိ စစ်ကောင်စီ တပ်စခန်း ခလရ (၁၁၄) နှင့် ခလရ (၁၁၅) တို့ကို MDY PDFက ရှော့တိုက်ဒုံး ဖြင့် ဝင်ရောက် ထပ်မံတိုက်ခိုက်ခဲ့ကြောင်း ထုတ်ပြန်ချက်တွင် ရေးသားထားသည်။
ထိုသို့ ဝင်ရောက်တိုက်ခိုက်ခဲ့ရာတွင်လည်း ခလရ (၁၁၄) တပ်ဝန်းထဲသို့ ကျရောက်ပေါက်ကွဲခဲ့ပြီး ဒုတပ်ရင်းမှူး နှင့် တပ်သား ၅ ဦး တို့ ထပ်သေဆုံးခဲ့ကြောင်း ရေးသားထားသည်။
အဆိုပါ နောင်ချိုမြို့ပေါ် စစ်ကောင်စီတပ်စခန်းကို MDY PDF တို့ ဝင်ရောက်တိုက်ခိုက်နိုင်ခဲ့ရာတွင် နောက် တိုက်ပွဲများသည် မြို့ပေါ်သို့ ဖြစ်လာနိုင်ချေ ရှိ၊ မရှိ ကြောင်းကို MDY PDF ကိုအော်စမွန်ကို မေးမြန်းခဲ့ရာတွင် ဖြေကြားရာ ငြင်းပယ်ခဲ့သည်။
နောင်ချိုမြို့နယ်တွင် ဧပြီ ၅ ရက်နေ့မှ တိုက်ပွဲစတင်ဖြစ်ပွားခဲ့ပြီး စစ်ကောင်စီက လက်နက်ကြီး ရမ်းသမ်းပစ်ခတ်မှုကြောင့် အရပ်သား ဒေသခံ (၇) ဦး သေဆုံးသွားခဲ့ပြီး ဖြစ်ကြောင်း သိရသည်။
