Thursday, June 20, 2024

အပူချိန် မြင့်တက်လာခြင်းကြောင့် စစ်ရှောင်များ ဖျားနာနေ

Must read

သျှမ်းပြည် တောင်ကြီးခရိုင် မိုးဗြဲမြို့တွင် အပူချိန်မြင့်တက်လာခြင်းကြောင့် တောတောင်အတွင်းရှိ စစ်ရှောင်များ နေမကောင်းမှုများ ဖြစ်ပွားနေကြောင်း စုံစမ်း သိရှိရသည်။

စစ်ဘေးရှောင်များ

ပြီးခဲ့သည့် သတင်းပတ်မှစပြီး မိုးဗြဲဒေသတွင် အပူချိန် ၄၀ ဒီဂရီ စင်တီဂရိတ် မြင့်တက်လာခြင်းကြောင့် တောတောင်အတွင်းရှိ ရေဆိုးရေညစ်၊ သစ်ပင်နှင့် ခြုံကြားတွင် ခြင်များပိုမို ပေါက်ဖွားလာနေသည်။

အဆိုပါ ခြင်များပေါများလာခြင်းကြောင့် တောတောင်အတွင်းရှိ စစ်ရှောင်များသည် ညဘက် ခြင်ထောင် မပါဘဲ အိပ်ရသဖြင့် ခြင်မှရသော ကူးစက်ရောဂါဖြစ်ပြီး စစ်ရှောင် ၄ ဦးသည် ငှက်ဖျားရောဂါကို စတင်ခံစားနေရကြောင်း Mobye Rescue Team မှ ဆရာမ တစ်ဦးက ပြောသည်။

“ ပူတဲ့ရာသီလည်း ရောက်တော့ တောမှာကြတော့ ငှက်ဖျားတွေ ဖြစ်နေတယ်။ အခုနောက်ပိုင်း ခြင်ပေါက်ဖွားမှု တွေက ပိုဖြစ်လာတော့လေ၊ အခု ငှက်ဖျားဖြစ်နေတဲ့သူက ၄ ဦး လောက် တွေ့ထားတယ်။ သူတို့က သစ်ပင်တွေ၊ ခြုံတွေ စုပေါင်းတဲ့ နေရာမှာနေရတော့ ခြင်တွေကိုက်လည်း ပါမှာပေါ့ “ ဟု ၎င်း ဆရာမတစ်ဦးက ပြောသည်။

လက်ရှိ ငှက်ဖျားရောဂါ ဖြစ်ပွားနေသူ စစ်ရှောင် ၄ ဦးကို Mobye Rescue Team မှ ဆေးဝါးကုသပေးနေပြီး ကျန်ရှိနေသည့် စစ်ရှောင်များ ငှက်ဖျားရောဂါ ကာကွယ်ဖို့အတွက်လည်း ဆေးဝါးနှင့် ဆေးခြင်ထောင်များကို ပံ့ပိုးစေလိုကြောင်း ၎င်းကဆက်ပြောသည်။

အလားတူ ဆီဆိုင်မြို့နယ် သျှမ်း – ကယားနယ်စပ်ဒေသရှိ စစ်ရှောင်စခန်းတစ်နေရာတွင်လည်း ယခုရက်ပိုင်းမှာ အပူချိန် မြင့်တက်လာသည့်အတွက် မိခင် နှင့် ကလေးငယ်များ နေထိုင်ရန် ခက်ခဲခြင်း၊ ဖျားနာခြင်း စသည့် အခက်ခဲဖြင့် ကြုံတွေ့နေရကြောင်း စစ်ရှောင်အမျိုးသမီးတစ်ဦးက ပြောသည်။

“အပူချိန်မြင့်တော့ ကလေးလည်း ငိုတယ်၊ နေရတာ တအားပူတယ်။ ကလေးက အခုမှ ၂ လတောင် မပြည့်သေးဘူး။ နေ့လယ်ဆို အရမ်းပူတော့ ကလေးက တအားငိုတာ။ အေးတဲ့ နေရာနားမှာ ခေါ်နေရတယ်။ နို့လည်း မစို့တော့ဘူး။ နေမကောင်း၊ မကျန်းမမာဖြစ်မှာတော့ စိုးရိမ်ရတယ် “ ဟု ၎င်း အမျိုးသမီးတစ်ဦးက ပြောသည်။

မိုးလေဝသ နှင့် ဇလဗေဒ ညွှန်ကြားချက်များအရ မေလ နှင့် ဇွန်လအတွင်း မိုးခေါင်နိုင်သည့် အခြေအနေ ဖြစ်ပေါ် နိုင်ပြီး ဆည်၊ မြောင်း ရေခန်းခြောက်ခြင်း၊ မြေဆီလွှာစိုထိုင်းမှုများ လျော့ကျခြင်း စသည်ဖြင့် အလယ်ပိုင်း၊ အထက်အညာဒေသတွင် ပိုဆိုးဝါးလာနိုင်သဖြင့် သောက်ရေ၊ သုံးရေတွေ ကြိုတင်ပြင်ဆင်ထားနိုင်ရန်လည်း သတိပေးထားသည်။

ထို့အပြင် (ဧပြီ ၁၉ ရက်မှ မေ ၁ ရက်နေ့) အထိ သျှမ်းပြည် တောင်ကြီးမြို့တွင် အမြင့်ဆုံး အပူချိန် ၃၀ ဒီဂရီ စင်တီဂရိတ်၊ လားရှိုးတွင် အမြင့်ဆုံး အပူချိန် ၃၇ ဒီဂရီ စင်တီဂရိတ် နှင့် လွိုင်ကော်တွင် အမြင့်ဆုံး အပူချိန် ၄၀ ဒီဂရီ စင်တီဂရိတ် မြင့်တက်နိုင်ကြောင်း မိုးလေဝသ နှင့် ဇလဗေဒညွှန်ကြားမှု ဦးစီးဌာနမှ (ဧပြီ ၁၉ ရက်) တွင် ထုတ်ပြန်ထားသည်။

Leave a Comments

- Advertisement -spot_img

Latest article