သျှမ်းပြည် ကျောက်မဲခရိုင် နောင်ချိုမြို့နယ် အတွင်းမှာ အာဏာသိမ်း စစ်ကောင်စီတပ်ဖွဲ့ နဲ့ ပြည်သူ့ကာကွယ်ရေးပူးပေါင်းတပ်ဖွဲ့ PDF တပ်ဖွဲ့တွေက ရက်ရှည်ကြာ ထိတွေ့တိုက်ပွဲ ဖြစ်ပွားခဲ့တာ ဒီကနေ့အထိ စစ်ရေး တင်းမာမှုတွေ ရှိနေကြပါတယ်။
ပြီးခဲ့တဲ့ ဧပြီလ ၅ ရက်နေ့ကနေစပြီး ဒီကနေ့အထိ နောင်ချိုမြို့နယ် အတွင်း ထိတွေ့တိုက်ပွဲတွေ၊ စစ်ရေးတင်းမာမှုတွေ ဖြစ်နေဆဲပါ။
အခုလို ထိတွေ့တိုက်ပွဲ ရက်ရှည်ကြာ ဖြစ်နေတဲ့ နောင်ချိုမြို့နယ်အတွင်းမှာ ဒေသခံတွေက ဘယ်လို နေထိုင် စားသောက်နေကြလဲ။ ဘာတွေ စိုးရိမ်ကြောက်လန့်နေကြတာလဲ ဆိုတဲ့ အကြောင်း အမည်မဖော်လိုသူ အသက် ၅၀ အရွယ်ရှိ စစ်ရှောင် အမျိုးသား တစ်ဦးကို သျှမ်းသံတော်ဆင့် သတင်းထောက် နန်းနောင့်နောင့် က ဆက်သွယ် မေးမြန်းထားပါတယ်။
မေး ။ ။ နောင်ချိုမြို့နယ်ထဲမှာက လက်နက်ကိုင်တပ်ဖွဲ့တွေရဲ့ ထိတွေ့တိုက်ပွဲဖြစ်စဥ်ကို ပြောပြပေးပါအုံး။
ဖြေ ။ ။ ပြောရရင် ကျနော်တို့ကလည်း တကယ်ကို နားမလည်နိုင်ဘူး ဖြစ်နေတယ်၊ ဘာဖြစ်လို့ ဒီလိုပြောရလဲဆိုရင် ကျနော်တို့ နောင်ချိုမြို့နယ် ခေးနင်းကျေးရွာ အုပ်စု (ဒိုးပင်) နဲ့ လုံခန်ကျေးရွာတွေဘက်ကို တိုက်ပွဲ ဖြစ်တာ နှစ်ကြိမ်ခံနေရပြီ၊ အခု ဖြစ်နေတဲ့ တိုက်ပွဲကလည်း သံဘို(ဝၢၼ်ႈသၢၼ်ႇၽူဝ်ႇ) ၊ ဟိုခဲ၊ ကုန်းကြမ်းဘက်က ဖြစ်တယ်ဆိုပေမယ့် ကျနော်တို့ ရွာဘက်ကိုလည်း စစ်ရေးတွေ ရောက်နေတော့ ဒေသခံတွေက စစ်ရှောင် ထွက်ပြေးခဲ့ရတယ်။ ဒီ လက်နက်ကိုင် တပ်ဖွဲ့တွေက ဘာကြောင့်တိုက်ပွဲ ဖြစ်တာလဲ ဆိုတာ ကျနော်တို့လည်း မသိရဘူး၊ စစ်ရှောင်တွေလည်း အခုချိန်ထိ နေရပ် မပြန်နိုင်ကြသေးဘူး။ PDF ပူးပေါင်း တပ်ဖွဲ့ နဲ့ စစ်ကောင်စီ ဖြစ်ပေမယ့် သျှမ်းရွာတွေဘက်ကိုပဲ တိုက်ပွဲဖြစ်နေကြတာ၊ အိုးအိမ်တွေကို စွန့်ခွာပြီးတော့ စစ်ရှောင်ထွက်ပြေးနေရတဲ့ ဒေသခံ အများစုကလည်း သျှမ်းလူမျိုးတွေပဲ ဖြစ်နေတယ်။
မေး ။ ။ တိုက်ပွဲ ဖြစ်လာတော့ ဒေသခံ တစ်ယောက် အနေနဲ့ ဘယ်လို ခံစားမိလဲ၊ စိုးရိမ်ကြောက်လန့်မှုက ဘာရှိလဲ။
ဖြေ ။ ။ ကျနော်တို့ အုပ်စုက ပထမ အကြိမ်ကြုံရတဲ့ တိုက်ပွဲမှာ ကျနော်တို့က ကြောက်ကြတာပေါ့၊ ဘယ်ကို ပြေးရမလဲ၊ ကျွဲ၊ နွား၊ ဝက်၊ ကြက် ဥစ္စာပစ္စည်းတွေ ဘယ်လိုလုပ်ရမလဲ ဆိုတာတွေ တွေးမိတယ်၊ အဲ့မှာ စစ်ရှောင်ပြေး ရတဲ့ တချို့က ဘာပစ္စည်းမှ မယူနိုင်တာတွေလည်း ရှိတယ်၊ ပြီးတော့ ဒုတိယ အကြိမ်၊ တတိယ အကြိမ် ဆိုပြီးတော့ တိုက်ပွဲဒဏ်တွေကို ခံလာခဲ့ရတယ်၊ ဒုတိယ အကြိမ် တိုက်ပွဲမှာ ကတုတ်ကျင်းတွေ ရှိပေမဲ့ စိတ်လုံခြုံမှုကို မရနိုင်သေးဘူးလေ၊ ဗုံးတွေကျမလား၊ စစ်သားတွေ လာရှာမလား ဆိုတာတွေ တွေးကြောက်ရတယ်၊ တိုက်ပွဲ ဖြစ်တိုင်း ဒေသခံတွေပဲ စစ်ရှောင်ထွက်ပြေးရတယ်၊ အိုးအိမ်တွေကို လက်နက်ကြီးထိ ပျက်စီးရတယ်၊ ဘယ်တိုက်ပွဲပဲ ဖြစ်ဖြစ် ပြည်သူတွေပဲ အထိနာတယ်။
မေး ။ ။ လက်ရှိ အခြေအနေမှာ စစ်ရေးတင်းမာမှု ရှိနေတဲ့ ကျေးရွာ ဒေသက ဘယ်နေရာတွေ ဖြစ်လဲ။
ဖြေ ။ ။ အစပိုင်းမှာတော့ ကျနော်တို့ ကျေးရွာ အုပ်စုဘက်မှာ တိုက်ပွဲ ဒဏ်ကို ပြင်းပြင်းထန်ထန် ခံခဲ့ရတာပေါ့၊ အခုတစ်ခေါက်ကတော့ ကြူအင်းရွာ (ဝၢၼ်ႈၵိဝ်ႇဢၢင်း) ၊ အင်းမရွာ၊ ဟိုခိုရွာ၊ ဟိုခဲရွာတွေဘက်ကို တိုက်ပွဲက ကူးသွားတယ်၊ အခုက အဲ့ဘက်တွေမှာ စစ်ရေး တင်းမာနေကြတာ။
မေး ။ ။ တိုက်ပွဲတွေကြောင့် စစ်ရှောင်ထွက်ပြေးရတဲ့ ပြည်သူတွေက ဘယ်မှာနေထိုင်ကြရလဲ။ စားဝတ်နေရေးတွေ ကရော ကိုယ့်ဘာသာ စီစဥ်နေရတာလား။
ဖြေ ။ ။ မြို့ပေါ်မှာ ဆွေမျိုးရှိတဲ့သူတွေက ဆွေမျိုးတွေဆီ သွားနေတယ်။ တချို့ကလည်း ကူညီထောက်ပံ့ပေးတဲ့ သူတွေက စီစဥ်ပေးတဲ့ ဘုန်းကြီးကျောင်းတွေ၊ နေရာတွေမှာ နေထိုင်ကြတယ်။ ပိုက်ဆံတတ်နိုင်တဲ့ သူတွေကျတော့ တစ်လကို ငါးသောင်း နဲ့ အိမ်ငှားနေကြတယ်။ တချို့လည်း မိသားစု နှစ်ခု/သုံးခု စုပြီး အိမ်ငှားနေထိုင်ကြတာ ရှိတယ်။ ကျနော်တို့ လုံခန်ရွာက ဒေသခံ ၅၀၀ ကျော် စစ်ရှောင် ထွက်ပြေး နေရတုန်းပဲ။ ခန့်မှန်းရသလောက်တော့ စစ်ရှောင်ထွက်ပြေးရတဲ့ သူတွေက စုစုပေါင်း သုံးထောင်နီးပါးလောက် ရှိနေပြီ၊ စစ်ရှောင်မပြေးဘဲနဲ့ အိမ်စောင့်အဖြစ် ကျွဲ၊ နွား၊ ဝက်တွေကို ကြည့်ပေးနေတဲ့ သူတွေလည်း ရှိနေကြတယ်။ သူတို့ကြတော့ ရွာထဲမှာပဲနေပြီး တိုက်ပွဲဒဏ်ကို ကြည့်ရှောင်နေကြရတာပေါ့။
မေး ။ ။ အခုလည်း တိုက်ပွဲတွေ၊ စစ်ရေးတင်းမာမှု အခြေအနေတွေက ရက်ရှည်ကြာလာတော့ ဒေသခံ တစ်ယောက် အနေနဲ့ ဘယ်လိုပြောချင်လဲ။
ဖြေ ။ ။ အခုလိုမျိုး PDF ပူးပေါင်းတပ်ဖွဲ့ဘက်လည်း မဆုတ်ဘူး။ စစ်ကောင်စီကလည်း မဆုတ်ဘူးဆိုရင်တော့ တိုက်ပွဲက ပိုမိုပြင်းထန်လာမဲ့ အလားအလာရှိပါတယ်။ အခုလည်း ကျနော်တို့က တိုက်ပွဲဖြစ်လာရင် ရှောင်လိုက်၊ စစ်ရေးတင်းမာမှု ဖြစ်ရင် ရှောင်လိုက်နဲ့ လုပ်နေရတော့ ဝမ်းစာအတွက် လုပ်ငန်းတွေ၊ တောင်ယာတွေက မစ နိုင်သေးဘူး ဖြစ်နေတယ်။ သာမာန် အချိန်တုန်းကဆိုရင် ဒီအချိန်က ကျနော်တို့ ယာခင်းစဝင်ပြီး လုပ်ငန်းတွေလည်း စလုပ်နေပြီ။ ဒါပေမဲ့ အခုကတော့ ပြောင်းမျိုးစေ့တွေလည်း မဝယ်နိုင်ဘူး။ ယာခင်းထဲလည်း မသွားနိုင်ဘူး။ ဒီလိုသာ ဆက်ဖြစ်နေရင် နောက်နှစ်အတွက် သီးနှံစိုက်ပျိုးမှုတွေ မရှိလို့ နောက်နှစ်အတွက် စားဝတ်နေရေးတွေလည်း ခက်ခဲလာမှာ အမှန်ပဲ။ ဒါကြောင့် တိုက်ပွဲတွေကို ပြီးဆုံးစေချင်တယ်၊ နယ်မြေ ငြိမ်းချမ်းစေချင်တယ်။
ပြီးတော့ အခုတိုက်ပွဲဖြစ်နေတာက PDF ပူးပေါင်း တပ်ဖွဲ့နဲ့ စစ်ကောင်စီတွေသာ ဖြစ်တယ်၊ ကျနော်တို့ နယ်မြေ ဒေသထဲမှာ သျှမ်းတပ်မတော် SSPP/SSA လည်း ရှိနေတယ်၊ ဒါကြောင့် သျှမ်းတပ်မတော်ကလည်း ကျနော်တို့ သျှမ်းပြည်သူတွေအတွက် ကာကွယ်မှုလုပ်ပေးနိုင်ရင် ပိုကောင်းတာပေါ့နော်၊ ကျနော်တို့ သျှမ်းမိဘပြည်သူတွေ ရှိနေတဲ့နေရာကို တိုက်ပွဲမဖြစ်အောင် တားပေးတာမျိုးပဲဖြစ်ဖြစ် လုပ်ပေးစေချင်ပါတယ်။
မေး ။ ။ နောက်ဆုံးအနေနဲ့ ထပ်မံဖြည့်စွက်ပြောချင်သာ ရှိရင် ပြောပေးပါ။
ဖြေ ။ ။ ကျနော်တို့ အနေနဲ့ကတော့ တိုက်ပွဲတွေ အမြန်ပြီးဆုံး စေချင်ပါတယ်၊ ပြီးတော့ နယ်မြေ ငြိမ်းချမ်းမှု ရှိပြီး လုပ်ကိုင်စားသောက်မှုတွေ အဆင်ပြေစေချင်တာပေါ့နော်။ ကျနော်တို့က ကိုဗစ် ကတည်းက ခက်ခဲလာတယ်။ ကိုဗစ် ပြီးတော့ စစ်အာဏာသိမ်းမှု နောက်ဆက်တွဲ နိုင်ငံရေး ရှုပ်ထွေးမှုတွေ ခံရတယ်။ အခုက တိုက်ပွဲဒဏ် ထပ်ခံရတယ်။ ဒါကြောင့် တိုက်ပွဲတွေ ရပ်ပေးပါ။ ကျနော်တို့ ပြည်သူတွေကို သနားပေးကြပါလို့ ပြောချင် ပါတယ်။
Leave a Comments