မြန်မာ – ထိုင်း နယ်စပ် သျှမ်းပြည် တာချီလိတ်မြို့ရှိ ရာဘာခြံတစ်ခြံတွင် မီးလောင်မှုဖြစ်ပွားခဲ့ပြီး နေအိမ်များ မီးကူးစက်မည်ကို ဒေသခံများ စိုးရိမ်နေကြောင်း စုံစမ်း သိရှိရသည်။
ယမန်နေ့ ဧပြီ (၁၉) ရက် ည (၇) နာရီခွဲကျော်က တာချီလိတ်မြို့ ဝမ်ကောင်းရပ်ကွက်အတွင်းရှိ ကချင်ရွာအနီး ရာဘာတောတစ်ခုမှာ မီးလောင်မှုဖြစ်ပွားပြီး လူနေအိမ် ရပ်ကွက် နှင့် နီးသဖြင့် ပြည်သူများ စိုးရိမ်ထိတ်လန့်နေကြောင်း သိရှိရသည်။
“မနေ့ည မီးလောင်တာက လူနေအိမ် နဲ့ အရမ်းနီးတယ်။ ၂ နာရီကြာမှ မီးသတ်နိုင်ခဲ့တယ်။ အိမ် နဲ့ အရမ်းနီးတော့ ကျနော်တို့လည်း အိမ်တွေပါသွားမှာကို စိုးရိမ်တယ်” ဟု ကချင်ရွာတွင်း နေထိုင်သည့် ဒေသခံ အမျိုးသားတစ်ဦး ကပြောသည်။
ရာဘာတောအတွင်း မီးလောင်မှုဖြစ်ပွားခြင်းသည် အသေးစိတ် အချက်လက်ကို မသိရှိရသေးပေ။
သင်္ကြန်မတိုင်ခင် ကာလတွင်လည်း ရာဘာခြံတစ်ခု၌ မီးလောင်မှုဖြစ်ပွားခဲ့သေးသော်လည်း ယခုလို နေအိမ်နှင့် မနီးကပ်သဖြင့် ပြည်သူများ စိုးရိမ်မှု မရှိခဲ့ကြောင်း အဆိုပါ အမျိုးသား ကပြောသည်။
“မီးရှို့မယ်ဆိုရင်လည်း စည်းနဲ့ဘောင်နဲ့ ရှို့သင့်တယ်။ နေအိမ်တွေမှာ အမှိုက်တွေ ရှို့မယ်ဆိုရင်လည်း သံပုံးထဲ ထည့်ပြီး ရှို့ရင်ကောင်းတယ်။ နေအိမ်တွေ မကူးအောင်ပေ့ါ။ ကိုယ့်တောင်ယာ တောင်ကုန်းမှာ ရှို့မယ်ဆိုရင်လည်း စနစ်တကျ ရှို့ရင်ကောင်းတယ်။ ဒါက ပြောဖို့ခက်ပါတယ်။ ဒါက တောင်သူတွေရဲ့ စီးပွားရေး ဖြစ်နေတော့ တားလို့မရဘူး။ အသိပညာပေးနိုင်ရင်တော့ ကောင်းတာပေ့ါ” ဟု တာချီလိတ် ဒေသခံ တစ်ဦးက ပြောသည်။
ပွင့်လင်းရာသီ ရောက်ရှိချိန်ဖြစ်သည့် အတွက် တောင်သူများ တောင်ယာ မီးရှို့မှုရှိခြင်း၊ တောမီးလောင်မှု ဖြစ်ပွားခြင်း တို့ကြောင့် တာချီလိတ်မြို့နယ်အတွင်း လေထုညစ်ညှမ်းမှု နှစ်စဥ်နှစ်တိုင်း ဖြစ်ပေါ်နေလျက်ရှိသော်လည်း သက်ဆိုင်ရာ တာဝန်ရှိသူများက ကာကွယ်မှု၊ လေထုသန့်ရှင်းမှုများ လုပ်ဆောင်ပေးမှုများ မရှိကြောင်းလည်း သိရသည်။
Leave a Comments