သျှမ်းပြည် ကျောက်မဲခရိုင် နောင်ချိုမြို့နယ်အတွင်း အာဏာသိမ်း စစ်ကောင်စီ နှင့် မန္တလေး ပြည်သူ့ကာကွယ်ရေး (MDY-PDF ) ပူးပေါင်း တပ်ဖွဲ့တို့ အကြား ထိတွေ့တိုက်ပွဲ ဖြစ်ပွားစဥ်တွင် စစ်ကောင်စီ တပ်ဖွဲ့မှ ကျေးရွာအုပ်ချုပ်ရေးမှူး တစ်ဦးကို ရိုက်နှက် ဖမ်းဆီးခေါ်ဆောင်သွားကြောင်း စုံစမ်းသိရသည်။

စစ်ကောင်စီ နှင့် MDY – PDF ပူးပေါင်းတပ်ဖွဲ့တို့ တိုက်ပွဲပြင်းထန်ခဲ့သည့် နောင်ချိုမြို့နယ် အင်းမကျေးရွာမှ ကျေးရွာအုပ်ချုပ်ရေးမှူး နှင့် ဇနီးဖြစ်သူကို စစ်ကောင်စီတို့က ဖမ်းဆီးခေါ်ဆောင်သွားပြီး ရိုက်နှက်မှုများ ပြုလုပ်နေကြောင်း ဒေသခံများက သျှမ်းသံတော်ဆင့်ကို ပြောသည်။

“အင်းမရွာထဲကို စစ်ကောင်စီ စစ်ကြောင်း ဝင်လာတဲ့ အချိန်မှာ ဖမ်းသွားတာ၊ သူ့ဇနီးကိုလည်း ဖမ်းသွားတယ်၊ တစ်ပတ်လောက် ရှိနေပြီ၊ လာဖမ်းတုန်းက ရိုက်နှက်တာတွေ ရှိတယ်၊ ဖမ်းသွားပြီး ထပ်ရိုက်သေးတယ်လို့လည်း ကြားမိတယ်” ဟု အမည်မဖော်လိုသူ နောင်ချိုမြို့ခံ တစ်ဦးက သျှမ်းသံတော်ဆင့်ကို ပြောသည်။

ကျေးရွာအုပ်ချုပ်ရေးမှူး နှင့် အမျိုးသမီးကို မည်သည့်အကြောင်းပြချက်ဖြင့် ဖမ်းဆီးရိုက်နှက်ကြောင်း ၊ မည်သည့်နေရာတွင် ဖမ်းဆီးခေါ်ဆောင် ထားသည်ကို မသိရကြောင်း ဒေသခံများက ဆက်ပြောသည်။

လက်ရှိ အချိန်တွင် မြေပြင် တိုက်ပွဲများ ငြိမ်သက်သွားသော်လည်း နှစ်ဖက် စစ်ရေးတင်းမာမှုများ ရှိနေသေးသည့် အပြင် အာဏာသိမ်း စစ်ကောင်စီ တပ်ဖွဲ့ကလည်း ဟိုခိုကျေးရွာအတွင်း ဝင်ရောက်နေရာယူထားကြောင်း ဒေသခံများက ဆက်ဆိုသည်။

“အခု မြေပြင် တိုက်ပွဲ ပစ်ခတ်မှုတွေက ငြိမ်သွားပေမဲ့ နှစ်ဖက် စစ်ရေးတင်းမာမှုက ရှိနေတုန်းပဲ၊ လမ်းတွေကို စစ်ကောင်စီက ပိတ်ထားတုန်းပဲ၊ ဒေသခံတွေ လွတ်လွတ်လပ်လပ် သွားလို့ မရသေးဘူး၊ စစ်ရှောင်တွေလည်း အကုန် အိမ်ပြန်မရောက်ကြသေးဘူး၊ နေအိမ် အဆောက်အအုံတွေလည်း ထိခိုက်ပျက်စီးတာများတယ်” ဟု အထက်ပါ ဒေသခံက ဆက်ပြောသည်။

ပြီးခဲ့သည့် ဧပြီလ ၅ ရက်မှစပြီး ၁၀ ရက်ကျော်ကြာ နောင်ချိုမြို့နယ်အတွင်းတွင် စစ်ကောင်စီတပ်ဖွဲ့ နှင့် MDY – PDF တို့ ထိတွေ့တိုက်ပွဲအကြား ဒေသခံနေအိမ် ၂၀ လုံးထက်မနည်း ပျက်စီးဆုံးရှုံးခဲ့ရကြောင်း သိရသည်။

အဆိုပါ တိုက်ပွဲဖြစ်ပွားမှုကြောင့် ကုန်းကြီး၊ ဟိုခဲ၊ ကုန်းညောင်၊ ရေဦးကြူကော်၊ နားနွဲ့၊ တော်မွန်း၊ အင်းမဟိုခို၊ ကုလားရွာ၊ လွယ်ငင်းမှ ဒေသခံပြည်သူ စုစုပေါင်း (၁,၀၀၀) ကျော်သည် နေရပ်စွန့်ပြီး ထွက်ပြေးတိမ်းရှောင် နေရကြောင်း သိရသည်။

လက်ရှိ စစ်ရှောင်အများစုသည် နောင်ချိုမြို့နယ်ရှိ အုမ္မသီးကျောင်း၊ လမ်းခွဲကျောင်း နှင့် ဘန့်ဘွေးကျောင်းတွင် ထွက်ပြေးတိမ်းရှောင်နေရပြီး နေရပ်ပြန်ရန် စိုးရိမ်ပူပန်နေရကြောင်း သိရသည်။

နောင်ချိုမြို့နယ်အတွင်း ဖြစ်ပွားသည့် အာဏာသိမ်း စစ်ကောင်စီ တပ်ဖွဲ့ နှင့် MDY PDF ပူးပေါင်း တပ်ဖွဲ့တို့ အကြား တိုက်ပွဲကြောင့် ကလေးငယ် အပါအဝင် အရပ်သား ၅ ဦးထက် မနည်း ထိခိုက် ပျက်စီးရသည့်အပြင် နေအိမ် အဆောက်အအုံများလည်း ထိခိုက်ပျက်စီးရသည်။

ပြီးခဲ့သည့် ဖေဖော်ဝါရီလ အတွင်းတွင်လည်း နောင်ချိုမြို့နယ်မှာ စစ်ကောင်စီ နှင့် MDY-PDF တို့ အကြား ထိတွေ့တိုက်ပွဲဖြစ်ပွားခဲ့ပြီး အရပ်သား တစ်ဦးကို စစ်ကောင်စီတို့က ပစ်သတ်မှု ရှိခဲ့သည်။