သျှမ်းပြည် တောင်ကြီးခရိုင် ညောင်ရွှေမြို့နယ်ရှိ ညောင်ရွှေ အကျဥ်းထောင် (တောင်လေးလုံး) အကျဥ်းထောင်မှ လွတ်ငြိမ်းခွင့်ရသည့် အကျဥ်းသားများ အနက် နိုင်/ကျဥ်းများ နှင့် အမျိုးသမီးများ မပါခဲ့ကြောင်း သတင်း သိရသည်။
ဧပြီလ ၁၇ ရက်နေ့ နှစ်ဆန်းတစ်ရက်နေ့ နိုင်ငံတော် လွတ်ငြိမ်းချမ်းသာခွင့်ရသည့် အကျဥ်းထောင်အသီးသီးမှ အကျဥ်းသားများ အနက် နိုင်ငံရေး အကျဥ်းသားများ နှင့် အမျိုးသမီး အကျဥ်းသားများ မပါဝင်ခဲ့ကြောင်း နိုင်/ကျဥ်းများကို ကူညီပေးနေသည့် ရှေ့နေတစ်ဦးက သျှမ်းသံတော်ဆင့်ကို ပြောသည်။
“မနေ့က ညနေအထိ လူတွေကို လွတ်ပေးနတာတော့ သိရတယ်၊ ဒါပေမဲ့ အမျိုးသားတွေချည်းပဲ၊ အမျိုးသမီးက မပါလာခဲ့ဘူး၊ နောက်ပြီးတော့ အခုလွတ်လာတဲ့ အထဲမှာ နိုင်/ကျဥ်းတွေက မပါလာခဲ့ဘူး၊ နိုင်/ကျဥ်းမဟုတ်တဲ့ နှစ်ရှည်ကျတဲ့ သူတွေနဲ့ ရွှေ့ပြောင်းလာတဲ့ သူတွေပဲ လွတ်ပေးတယ်” ဟု အထက်ပါ ရှေ့နေက ပြောသည်။
တောင်လေးလုံး အကျဥ်းထောင်မှ နှစ်ဆန်းတစ်ရက်နေ့ လွတ်ငြိမ်းချမ်းသာခွင့် ရပြီး ပြန်လည် လွတ်မြောက် သူများသည် အမျိုးသားများသာဖြစ်ကြောင်း နှင့် လက်ရှိတွင် စုစုပေါင်း အရေအတွက်ကို မသိရသေးကြောင်းလည်း ၎င်းက ဆိုသည်။
လက်ရှိတွင် သျှမ်းပြည်မှ ညောင်ရွှေ အကျဥ်းထောင်၊ လားရှိုးအကျဥ်းထောင်၊ ကျိုင်းတုံအကျဥ်းထောင် နှင့် တခြား မြို့နယ်အသီးသီးရှိ အကျဥ်းထောင်များမှ အကျဥ်းသားများ လွတ်ငြိမ်းခွင့်ရသော်လည်း နိုင်ငံရေး အကျဥ်းသား အနည်းငယ်သာ ပါခဲ့ကြောင်းလည်း သိရသည်။
“ပြန်လွှတ်လာတဲ့ တော်တော်များများက ခိုးဆိုးလုယက်တွေပဲ ဖြစ်ကြတယ်ထင်တယ်၊ ရပ်ကွက်အတွင်း ရပ်ရွာအတွင်း လာပြီးတော့ နှောင့်ယှက်ပေးမှာပဲ စိုးရိမ်ရတယ် “ ဟုလည်း တောင်ကြီးမြို့နယ်မှ ဒေသခံ တစ်ဦးက သျှမ်းသံတော်ဆင့်ကို ပြောသည်။
အာဏာသိမ်း စစ်ကောင်စီ တပ်ဖွဲ့မှ လွတ်ငြိမ်းခွင့်ပေးလိုက်သည့် အကျဥ်းသားများသည် စုစုပေါင်း ၃,၁၁၃ ဦးရှိ နေပြီး၊ ကချင်ပြည်မှ ၁၂၅ ဦး၊ ကယားပြည်မှ ၁၁ ဦး၊ ကရင်ပြည်မှ ၈၃ ဦး၊ စစ်ကိုင်းတိုင်းဒေသကြီးမှ ၁၇၇ ဦး၊ တနင်္သာရီတိုင်းဒေသကြီးမှ ၁၄၅ ဦး၊ ပဲခူးတိုင်းဒေသကြီးမှ ၉၃ ဦး၊ မကွေးတိုင်း ဒေသကြီးမှ ၃၉၈ ဦး၊ ရခိုင် ပြည်မှ ၁၇၃ ဦး ၊ ရန်ကုန်တိုင်း ဒေသကြီးမှ ၁,၂၇၇ ဦး၊ ဧရာဝတီတိုင်းမှ ၈၂ ဦး နှင့် သျှမ်းပြည်က ၁၅၂ ဦး တို့အား လွတ်ငြိမ်းချမ်းသာခွင့် ပေးခဲ့ကြောင်း သိရသည်။
အဆိုပါ လွတ်ငြိမ်းချမ်းသာခွင့်ရသူများအနက် နိုင်ငံခြားသား (၉၈) ဦးနှင့် သီရိလင်္ကာ နိုင်ငံသား ၅ ဦးတို့ ပါဝင် ကြောင်းလည်း စစ်ကောင်စီက ဖော်ပြထားသည်။
