ကိုရင်လေးကို ရိုက်ခဲ့သည့် ဆရာတော် ခံဝန်လက်မှတ်ထိုးခိုင်း

သျှမ်းပြည် လားရှိုးမြို့နယ် တာပုံကျေးရွာ ဘုန်းကြီးကျောင်းတွင် စာချဆရာတော်က ကိုရင်လေးအပေါ် ရိုက်နှက်ခဲ့သည်ကို အပြစ်ပေး အရေးယူမှု မရှိဘဲ ခံဝန်လက်မှတ်သာ ထိုးခိုင်းကြောင်း စုံစမ်းသိရှိရသည်။

ပြီးခဲ့သည့် ဧပြီ ၁၄ ရက်တွင် တာပုံဘုန်းကြီးကျောင်းတွင် ကျောင်းထိုင်ဆရာတော် ၊ စာချဆရာတော် ၊ ကိုရင်လေး မိဘ နှင့် ရပ်မိရပ်ဖတို့က ကိုရင်လေး ရိုက်နှက်ခံရသည့် ကိစ္စနှင့် ပတ်သက်ပြီး ဆွေးနွေးခဲ့ကြောင်း သိရသည်။

ထိုသို့ ဆွေးနွေးခဲ့ရာတွင် ကိုရင်လေးကို ညှိမဲအောင်ရိုက်ခဲ့သည့် စာချဆရာတော်ကို နောက်ခါ မပြုလုပ်ရန်အတွက် ဆုံးမ ဩဝါဒ ပေးခဲ့ပြီး ခံဝန်လက်မှတ် ထိုးခိုင်းကြောင်း တာပုံကျောင်းဆရာတော်တစ်ပါးက သျှမ်းသံတော်ဆင့်ကို မိန့်သည်။

“အရေးယူတာ ၊ အပြစ်ပေးတာတော့ မရှိပါဘူး။ နောက်တစ်ခါကျရင် ထပ်မလုပ်ဖို့ မရိုက်ဖို့ပဲ ပြောခဲ့တာ။ ပြီးရင်တော့ နောက်မလုပ်ဖို့ ကတိဝန်ခံ လက်မှတ်ထိုးကြတာပေါ့။ ဒါကို ကိုရင်လေး မိဘတို့ကလည်း သဘောတူတယ်” ဟု တာပုံကျောင်း ဆရာတော်တစ်ပါးက ပြောသည်။

အဆိုပါ စာချဆရာတော်က ကိုရင်လေးကို ရိုက်နှက်ခဲ့ရခြင်းသည် အမှန်ဖြစ်ပြီး ရိုက်နှက်ခဲ့သည်မှာ အလုပ်လုပ်ရန် နောက်ကျသည့်အတွက်ကြောင့် ရိုက်နှက်ခဲ့သည်ဟု သိရသည်။

“ ရိုက်ခဲ့တာတော့ အမှန်ရိုက်ခဲ့တာ။ ကိုရင်လေးတွေ အလုပ်လာလုပ်ဖို့ နောက်ကျပြီး ရောက်လာလို့ ရိုက်လိုက်တာတဲ့။ ရိုက်တဲ့သူကလည်း ဒေါသတွေပါပြီး ရိုက်တော့ အဲ့လိုဖြစ်သွားတာပေါ့။ စိတ်တိုလို့ ရိုက်လိုက်တာပေါ့။ ကိုရင်လေးတွေကို ခေါ်တာ ၂ ခါ ခေါ်ရလို့ စိတ်တိုပြီးတော့ ရိုက်တာပေါ့” ဟု အထက်ပါ ဆရာတော်က မိန့်သည်။

လားရှိုးမြို့နယ် တာပုံဘုန်းကြီးကျောင်းသည် ကိုရင်များကို အပြစ်ပေးရာတွင် ပုံမှန်အားဖြင့် ကြမ်းတိုက် ၊ အိမ်သာဆေး၊ စာကျက်၊ ဘုရားဝတ်ပြုသာ အဓိက ပြုလုပ်ပြီး ၃ ကြိမ်မြောက်တွင် ရိုက်ပြီး ဆုံးမလေ့ရှိကြောင်း သိရသည်။

သို့သော် ရိုက်နှက်ရာတွင်လည်း ဒေါသမပါဘဲ ရိုက်နှက်ခြင်းဖြင့် ရိုက်နှက်ရကြောင်း ဆရာတော်က ထပ်မံ မိန့်ကြားသည်။

“ အပြစ်ပေးတာတော့ အမျိုးမျိုးရှိတယ်။ ပထမပိုင်းကတော့ စာကျက်ခိုင်းတာ။ ဘုရားဝတ်ပြုတာ။ ကြမ်းတိုက်၊ အိမ်သာဆေးတာတွေလုပ်ခိုင်းတာပေါ့။ နောက်ဆုံးပြောမရရင် ရိုက်တာလည်းရှိတယ်။ ရိုက်ရင်တော့ ၂ ချက် ၃ ချက်ပေါ့။ ရိုက်ရင်လည်း ဒေါသမပါဘဲ ရိုက်ရတာ။ ဂရုဏာ သနားစိတ်နဲ့ ရိုက်ရတာပေါ့” ဟု တာပုံကျောင်းထိုင်ဆရာတော်က မိန့်သည်။

ပြီးခဲ့သည့် ဧပြီ ၇ ရက်နေ့တွင် ကိုရင်လေးတို့ ကစားရာမှ စပြီး ကိုရင်ထိန်း စာချဆရာတော်က ကိုရင်လေးတွေကို ရိုက်နှက်ခဲ့သည်။

၂၀၁၉ ကလေးသူငယ်များဆိုင်ရာ ဥပဒေအရ ပုဒ်မ ၁၀၃ (က)(၄)တွင် ကလေးသူငယ်ကို အဓမ္မအလုပ်ခိုင်း စေလျှင်၊ အဓမ္မဝန်ဆောင်မှုပေးစေလျှင် ထောင်ဒဏ် ၈ လမှ ၅ နှစ်ထိ နှင့် ဒဏ်ငွေ ကျပ် ၈ သိန်းမှ ၁၆ သိန်း ထိ ကျခံနိုင်ကြောင်း သိရသည်။

ပြီးခဲ့သည့် ၂၀၂၁ ခုနှစ်တွင်လည်း ကျေးသီးမြို့နယ် မိုင်းကောင်ကျေးရွာထဲတွင် ကိုရင်လေးတစ်ပါး ညအချိန် နို့ခိုးသောက်ရာမှ အသက်ဆုံးရှုံးသည်အထိ ရိုက်နှက်ခဲ့သည့် ဖြစ်စဥ်လည်း ရှိခဲ့ဖူးသည်။