သျှမ်းပြည် လားရှိုးခရိုင် တာပုံကျေးရွာအုပ်စု တာပုံကျေးရွာ ဘုန်းကြီးကျောင်းတွင် ကိုရင်လေးများ ဂေါ်လီကစားသည်ဟုဆိုပြီး ဦးဇင်းမှ ရိုက်နှက်ခဲ့ကြောင်း စုံစမ်း သိရှိရသည်။

ဖြစ်စဉ်မှာ ပြီးခဲ့သည့် ဧပြီ ၈ ရက်နေ့တွင် ကိုရင်လေးများသည် ဂေါ်လီကစားသည်ဟုဆိုပြီး ကိုရင်ထိန်း ဦးဇင်းက ရိုက်နှက်ခဲ့ကြောင်း၊ ထိုထဲတွင် အသက် ၁၂ နှစ်အရွယ် ကိုရင်လေး တစ်ပါးကို ပိုရိုက်ခဲ့ပြီး မနက်တစ်ကြိမ်ရိုက်ခဲ့သည့်အပြင် ညအိပ်ယာဝင်ခါနီးတွင် အကြောင်းပြချက်မရှိ ထပ်မံရိုက်နှက်ခဲ့ကြောင်း ရိုက်နှက်ခံရသည့် ကိုရင်လေး၏ မိသားစုဝင် တစ်ဦးက သျှမ်းသံတော်ဆင့်ကို ပြန်ပြောပြသည်။

“ ရိုက်တာက ဂေါ်လီ ကစားလို့ ရိုက်ခံရတာတဲ့။ ကိုရင်လေးတွေက နေ့လည်ချိန် ကစားကြတာ။ အဲ့ဒါကို တစ်ခါရိုက်တယ်။ ပြီးတော့ ညအိပ်ယာ ဝင်ခါနီးတစ်ချိန်လည်း ထပ်လာရိုက်တယ်တဲ့။ ရိုက်ခံရတဲ့ ကိုရင်တွေ ကများတယ်။ ဘယ်နှစ်ပါးရှိလဲ သေချာတော့မသိဘူး။ ကျမတို့ အပါးကတော့ ပိုပြီးရိုက်ခံရတာတဲ့” ဟု ၎င်းက ပြောသည်။

ရိုက်နှက်ခံရသည့် ကိုရင်လေးသည် သက်တော် ၁၂ နှစ် အရွယ်ရှိပြီး၊ ရိုက်ခံရသည့် ဒဏ်ရာမှာ ပေါင်တစ်ဝိုက်တွင် ညိုမဲနေကြောင်း သိရသည်။

အဆိုပါ ရိုက်နှက်ခံထားရမှု နှင့် ပတ်သက်၍ ဧပြီ ၁၁ ရက်နေ့တွင် ကျောင်းထိုင်ဆရာတော် နှင့် သွားရောက်ညှိနှိုင်းဆွေးနွေးရန် ပြုလုပ်ခဲ့သော်လည်း ဆရာတော်က နာမကျန်း ဖြစ်နေသည့်အတွက်ကြောင့် မတွေ့ဆုံခဲ့ရပေ။

“ ကျောင်းထိုင် ဆရာတော် နဲ့ မနေ့ကတော့ သွားပြီးဆွေးနွေမယ်လို့တော့ ပြောတယ်။ ဒါမဲ့ ကျောင်းထိုင် ဆရာတော်က နေမကောင်းတော့ မတွေ့လိုက်ရဘူး။ အခုတော့ ကိုရင်လေးကို ကျောင်းပြောင်းထားလိုက်ပြီ” ဟု အထက်ပါ မိသားစုဝင်က ပြောသည်။

အလားတူ သျှမ်းသံတော်ဆင့် သတင်းဌာန အနေဖြင့်လည်း တာပုံကျောင်းထိုင်ဆရာတော်ကို ဆက်သွယ်ရန် မရရှိသေးပေ။

သို့သော် ကျောင်းထိုင်ဆရာတော် နှင့် ရပ်ရွာ အုပ်ချုပ်ရေးမှူး လူကြီးတို့က ကိုရင်လေးအပေါ်ရိုက်နှက်ခဲ့သည့် ကိစ္စနှင့် ပတ်သက်ပြီး ဆွေနွေးနေကြောင်း ဒေသခံများထံ သတင်းရရှိသည်။

အဆိုပါ ကိုရင်လေး ရိုက်နှက်ခဲ့ရသည့် ကိစ္စနှင့် ပတ်သက်၍ သျှမ်းသံတော်ဆင့် သတင်းဌာနမှ အသေးစိတ် ဆက်လက်ဖော်ပြသွားပါမည်။

မည်သို့ပင် ဆိုစေကာမှု အသက် ၁၈ နှစ် မပြည့်သေးသည့် ကိုရင်လေးကို ညိုမဲအောင် ရိုက်နှက်ခြင်း၊ သေဆုံးထိ ရိုက်နှက်ခြင်းက မပြုလုပ်သင့်ကြောင်း သျှမ်းပြည်အတွင်း နာမည်ကြီးသည့် သံဃာတော်တစ်ပါးက သျှမ်းသံတော်ဆင့်ကို ၂၀၂၁ ခုနှစ်က မိန့်ကြားခဲ့ဖူးသည်။

၂၀၁၉ ကလေးသူငယ်များဆိုင်ရာ ဥပဒေအရ ပုဒ်မ ၁၀၃(က)(၄)တွင် ကလေးသူငယ်ကို အဓမ္မအလုပ်ခိုင်း စေလျှင်၊ အဓမ္မဝန်ဆောင်မှုပေးစေလျှင် ထောင်ဒဏ် ၈ လမှ ၅ နှစ်ထိ နှင့် ဒဏ်ငွေ ကျပ် ၈ သိန်းမှ ၁၆ သိန်း ထိ ကျခံနိုင်ကြောင်း သိရသည်။

ပြီးခဲ့သည့် ၂၀၂၁ ခုနှစ်တွင်လည်း ကျေးသီးမြို့နယ် မိုင်းကောင်ကျေးရွာထဲတွင် ကိုရင်လေးတစ်ပါး ညအချိန် နို့ခိုးသောက်ရာမှ အသက်ဆုံးရှုံးတဲ့အထိ ရိုက်နှက်ခဲ့သည့် ဖြစ်စဥ်လည်း ရှိခဲ့ဖူးသည်။