သျှမ်းပြည် ညောင်ရွှေမြို့ မိုင်းလီ (၅) ရပ်ကွက်အတွင်း နေထိုင်သည့် လင်မယား (၂) ဦးကို ဖောက်ခွဲရေး ပစ္စည်းများ၊ လက်နက်ခဲယမ်းများနှင့်အတူ ဖမ်းဆီးမိရကြောင်း စစ်ကောင်စီ ထုတ်ပြန်ချက်အရ သတင်းသိရှိရသည်။

ပြီးခဲ့သည့် (ဧပြီလ ၅ ရက်) မနက်ပိုင်းအချိန်က ညောင်ရွှေမြို့ မိုင်းလီ (၅) ရပ်ကွက်အတွင်း နေထိုင်သည့် လေးလွင်မျိုး (ခ) ကိုမျိုးနှင့်အတူ ၎င်း၏ဇနီးဖြစ်သူ ခိုင်ဇာဝင်းဆိုသူကို ဖောက်ခွဲရေးပစ္စည်းများ၊ လက်နက်ခဲယမ်းများနှင့်အတူ ဖမ်းမီးရမိခဲ့ကြောင်း၊ ၎င်းလင်မယား (၂) ဦးကိုလည်း အင်းလေးရေပေါ်သင်္ကြန်မှ ဖောက်ခွဲရေး စီစဉ်သူဖြစ်သည်ဟု စစ်ကောင်စီက စွပ်စွဲကာ ထုတ်ပြန်ချက်တွင် ရေးသားဖော်ပြထားသည်။

“ ဉပဒေလမ်းအကြောင်းအရ တရားဝင် ဖမ်းတာလည်းမဟုတ်ဘူး။ သက်သေအထောက်အထားနဲ့ အတိအကျ ဖမ်းတာလည်းမဟုတ်ဘူး။ သံသယရှိတဲ့သူမှန်သမျှ အကုန်ဖမ်းဆီးတယ်။ ညှင်းပန်နှိပ်စက်တယ်။ ငွေညှစ်တယ်။ တချို့တွေဆို သတ်ပစ်လိုက်တယ်။ ဒီလိုမျိုးလုပ်ရက်က လူမဆန်တဲ့လုပ်ရပ် ပုံမှန်လူတစ်ယောက်က လွယ်လွယ်နဲ့ မကျူးလွန်ရဲတဲ့ ပြစ်မှုတွေဖြစ်တယ်။ စိတ္တဇဆန်ဆန် ပြစ်မှုကျူးလွန်ခြင်းတစ်မျိုးလည်း ဖြစ်တယ် “ ဟု ၎င်းနှင့်နီးစပ်သူ အမျိုးသမီးတစ်ဦးက ပြောသည်။

လက်ရှိ ဖမ်းဆီးခံထားရသည့် လင်မယား (၂) ဦးကို စစ်ကောင်စီတပ်ဖွဲ့မှ မည်သည့် ဉပဒေဖြင့် တရားစွဲဆိုထားသည်ကို အသေးစိတ် မသိရှိရသေးပေ။

ထို့အပြင် စစ်တပ်က အာဏာသိမ်းပြီးနောက်ပိုင်း မြန်မာနိုင်ငံမှာ စစ်ကောင်စီတပ်ဖွဲ့မှ အပြစ်မဲ့ ပြည်သူများကို သတ်ဖြတ်ခြင်း၊ နှိပ်စက်ခြင်း လုပ်ဆောင်နေသည့်အပေါ်မှာ နိုင်ငံတကာမှ အဖွဲ့အစည်းများက ထိရောက်စွာ အရေးယူဆောင်ရွက်ခြင်းမရှိသောကြောင့် မြန်မာပြည်သူလူထုများဟာ စစ်တပ်၏ဒဏ်ကို ဆင်းရဲစွာဒုက္ခခံစားနေရကြောင်း ၎င်းက ဆက်ပြောသည်။

“ နိုင်ငံတကာအဖွဲ့အစည်းကနေ နိုင်ငံတကာ စစ်ရာဇဝတ်သားဖြစ်တဲ့ ဒီအကြမ်းဖက်စစ်အုပ်စုကို အချိန်မီ ထိထိရောက်ရောက် အရေးမယူနိုင်လို့ သူတို့ရဲ့ အကြမ်းဖက်မှုဒဏ်ကို မြန်မာပြည်သူလူထုတွေ အခုချိန်ထိ အလူးအလဲ ခံစားနေရတယ် “ ဟု ၎င်းအမျိုးသမီးတစ်ဦးက ထပ်လောင်းပြောသည်။

အလားတူ စစ်ကောင်စီတပ်ဖွဲ့မှ ဖမ်းဆီးရမိသည့် ပစ္စည်းများမှာ လေသေနတ် ၁ လက်၊ လက်လုပ် ရှေ့ထွက်မိုင်း ၆ လုံး၊ လက်လုပ်မိုင်းမျိုးစုံ ၈ လုံး၊ လက်လုပ် သေနတ်ပြောင်း ၂ ခု၊ လက်လုပ် ကျည်ရိုက်တံ ၁ ခု၊ လက်လုပ်မိုင်း ပြုလုပ်ရာမှာ အသုံးပြုသည့် PVC ပိုက် ၈ ချောင်း၊ စနက်ကြိုး ၆ ချောင်း၊ ဝရိန်စက် ၁ လုံး၊ ဖောက်စက် ၁ ခု၊ ကန့် ၁၀ ကျပ်သား၊ ယမ်း ၂၅ ကျပ်သား၊ မီးသွေးမှုန့် ၁၀ ကျပ်သားတို့နှင့်အတူ ဖမ်းဆီမိခြင်းဖြစ်ကြောင်း သိရသည်။

ထို့အပြင် ဖမ်းဆီးခံရသည့် လေးလွင်မျိုး (ခ) ကိုမျိုးဆိုသူသည် ယခင်က အင်းလေး PDF တပ်ရင်း (1009) တွင် ဖောက်ခွဲရေးသင်တန်း ၁ လခန့် တက်ရောက်ခဲ့ပြီး လက်လုပ်မိုင်း ပြုလုပ်နည်း၊ ဖောက်ခွဲနည်းများကို သင်ယူခဲ့ဖူးသူဖြစ်ကြောင်းလည်း စစ်ကောင်စီ ထုတ်ပြန်ချက်တွင်ရေးသားထားသည်။