Thursday, April 18, 2024

မိုးဗြဲမြို့တွင်းရှိ စစ်ဘေးရှောင်များ ရေကျောက်ဖြစ်ပွားနေ

Must read

သျှမ်းပြည် တောင်ကြီးခရိုင် မိုးဗြဲမြို့ တောထဲရှိ စစ်ဘေးရှောင်များ ရေကျောက်ဖြစ်ပွားနေကြောင်း စုံစမ်းသိရှိရသည်။

စစ်ရှောင်စခန်းမှ ပြည်သူများ ကျန်းမာရေး စစ်ဆေးပေးစဥ်

ယခု နွေရာသီကာလတွင် စစ်ဘေးရှောင်စခန်းများတွင် ရေအခက်ခဲရှိနေပြီး ကလေးတစ်ချို့ နှင့် လူကြီးတစ်ချို့သည် ရေကျောက်ရောဂါကို ခံစားနေရကြောင်း သိရသည်။

“ ရေကျောက်ရောဂါတွေ ဖြစ်နေကြတာ။ ရေမသန့်တာနဲ့၊ နေအရမ်းပူတာတွေကြောင့်လည်း ဖြစ်ရင်ဖြစ်မယ် ထင်တယ်။ ကျနော်ကတော့ စစ်ဘေးရှောင်စခန်းမှာ ကလေးတွေနဲ့လည်း နေတယ်။ ပြီးတော့ သူတို့ လိုအပ်တာတွေကို သယ်ယူပို့ဆောင်ပေးတာပေါ့။ အခုတော့ နားထားတယ်။ ရေကျောက်ရောဂါဖြစ်နေတာ။ စစ်ဘေးရှောင်စခန်းထဲမှာ ရေကျောက်ရောဂါဖြစ်နေတာရှိတယ်” ဟု မိုးဗြဲမြို့အတွင်း စစ်ဘေးရှောင်များကို ကူညီပေးနေသည့် အမျိုးသားက ပြောသည်။

လက်ရှိ စစ်ဘေးရှောင်စခန်းများထဲတွင် ကလေးငယ် အများစုက ရေကျောက်ရောဂါကို ခံစားနေရပြီး လူကြီး အနည်းစုသာရှိကြောင်း သိရသည်။

ရေကျောက်ရောဂါသည် ကလေး၊ ကိုယ်ဝန်ဆောင်မိခင် ၊ သက်ကြီးရွယ်အိုတို့ အဖြစ်များတတ်ပြီး၊ အဆိုပါ ရေကျောက်ရောဂါကို ဖြစ်ပွားနိုင်သည့်အကြောင်းရင်းသည် တစ်ခါမှ မပေါက်ဖူးသူများ ၊ ကလေးထိန်း နှင့် မူကြိုကျောင်းတွင် အလုပ်လုပ်သူ နှင့် ကလေးအများ နှင့် နေထိုင်ကြသူများက အဖြစ်များတတ်သည်။

စစ်ရှောင်စခန်းမှ ပြည်သူများ ကျန်းမာရေး စစ်ဆေးပေးစဥ်

မိုးဗြဲမြို့ စစ်ဘေးရှောင်ထဲရှိ ရေကျောက်ရောဂါဖြစ်ပွားသူ များလာပြီး တစ်ချို့က တိုင်းရင်းဆေးဆရာ နှင့် ကုသနေကြပြီး တစ်ချို့တွင် ဆေးခန်းပြ ကုသနေလျက်ရှိကြောင်း သိရသည်။

“ ကျနော် မနေ့က တိုင်းရင်းဆရာနားပဲ သွားကုတာ။ စစ်ဘေးရှောင်တွေ တစ်ချို့လည်း တိုင်းရင်းဆရာနဲ့ ကုတာတွေရှိတယ်။ တစ်ချို့လည်း ဆေးခန်းပြကုသတာလည်း ရှိပါတယ်။ ဘယ်လိုကုကြလဲတော့ ကျနော်လည်း မသိဘူး။ မနေ့က တိုင်းရင်းဆရာကတော့ သူ့နားမှာ အခုတလော ရေကျောက်ဖြစ်သူ လာကုတာ များတယ်တဲ့” ဟု အထက်ပါ စစ်ဘေးရှောင်ကို ကူညီပေးနေသူက ပြောသည်။

အလားတူ လက်ရှိ Mobye Rescue Team ဆေးခန်းတွင်လည်း ယခုနောက်ပိုင်း ရေကျောက်ရောဂါလာရောက် ကုသသူများရှိလာကြောင်း Mobye Rescue Team တာဝန်ရှိသူတစ်ဦးက ပြောသည်။

“ကျမတို့နားမှာလည်း ဆေးလာကုတာတော့ရှိပါတယ်။ မိုးဗြဲမှာတော့ ၂ ယောက်လောက်ရှိနေပြီ။ တစ်ချို့ကတော့ တောထဲတွေမှာ သွားကုပေးနေတာတော့ ရှိပါတယ်။ ဘယ်လောက်များနေလဲတော့ ကျမလည်း အတိကျမသိရဘူး” ဟု ၎င်းက ပြောသည်။

ထိုအပြင် ယခု နွေရာသီကာလသည် တောထဲရှိ စစ်ဘေးရှောင်စခန်းများသည် ရေရှားပါးမှု နှင့် ကြုံတွေ့နေရပြီး တကိုယ်ရေသန့်ရှင်းရေးအတွက် အားနည်းနေကြသည်။

ရေရှားပါးသည့် စစ်ဘေးရှောင် စခန်းများသည် ၃ မိုင်အကွာရှိ ရေမြောင်းတစ်ခုတွင် ရေသွားခတ်ရကြောင်း သိရသည်။

“ တစ်ချို့နေရာကတော့ အလှူရှင်ရောက်တယ်။ တစ်ချို့နေရာကတော့ အလှူရှင်တွေ မရောက်ဘူး။ အလှူရှင်တွေ မရောက်တဲ့နေရာမှာတော့ မြောင်းတစ်ခုမှာ သွားပြီးတော့ ခက်ရတယ်။ အဝေးဆုံး သွားရတာဆိုရင်တော့ ၃ မိုင်လောက်တော့ ဝေးတယ်။ ရေသွားခတ်ပြီ သုံးရတာပေါ့” ဟု စစ်ဘေးရှောင်ကို ကူညီပေးနေသည့်သူက ပြောသည်။

မိုးဗြဲမြို့အတွင်းတွင် စစ်ဘေးရှောင် စခန်း (၃၀) ဝန်းကျင်ရှိပြီး၊ စစ်ဘေးရှောင်များသည် စားဝတ်နေရေး နှင့် ရေအခက်ခဲမှုကြောင့် အကူညီလိုအပ်နေကြောင်း စစ်ဘေးရှာင်ကူညီသူများထံမှ သိရှိရသည်။

Leave a Comments

- Advertisement -spot_img

Latest article