သျှမ်း – ကယား နယ်စပ်တလျောက်ရှိ နာတာရှည် ရောဂါ ခံစားနေသည့် စစ်ရှောင်များသည် ဆေးကုသရန် ဆေးဝါးလုံလောက်မှုမရှိသဖြင့် အသက်ဆုံးရှုံးသွားရသည့်အထိရှိကြောင်း စုံစမ်းသိရသည်။

တိုက်ပွဲကြောင့် ၂ နှစ်ကျော်ကြာ သျှမ်း – ကယား နယ်စပ် ဒေသတလျောက် တောတောင်အတွင်းသို့ ထွက်ပြေးတိမ်းရှောင် နေရသည့် စစ်ရှောင်များသည် ဆေးရုံ၊ ဆေးခန်း လက်လှမ်းမမှီကြသဖြင့် ဆေးဝါးကုသခွင့် မရှိကြကာ နှလုံးရောဂါ၊ သွေးတိုး နှင့် ဆီးချို စသည့် နာတာရှည်ရောဂါ ခံစားရသည့် စစ်ရှောင်များ ကျန်းမာရေး ကျဆင်းလာသည်။

အဆိုပါ နာတာရှည်ရောဂါ ခံစားနေသူ စစ်ရှောင်စခန်းတစ်ခုတွင် ၁၀ ဦးမှာ ၂ ဦး ခန့်ရှိနေပြီး ကုသရန်အတွက် ဆေးဝါးလုံလောက်မှုမရှိကြောင်း Mobye Rescue Team မှ ဆရာမတစ်ဦးက သျှမ်းသံတော်ဆင့်ကို ပြောသည်။

“ နှလုံးရောဂါ၊ သွေးတိုး နဲ့ ဆီးချိုရောဂါ ခံစားနေတဲ့ သူတွေအတွက် တစ်လတစ်ကြိမ် ဆေးကုသပေးတယ်။ အဲ့လို နာဝာာရှည် ရောဂါတွေတော့ ၁၀ ယောက်မှာ ၂ ယောက်လောက်တော့ ရှိတယ်။ တချို့နေရာတွေတော့ တစ်လတစ်ကြိမ်တောင် ဆေးဝါးမကုသနိုင်ဘူး။ တောတောင်ထဲက စစ်ရှောင်ဆို ပိုဆိုးတယ်။ ဆေးဝါးလည်း မလုံလောက်၊ သူတို့ဆီကိုလည်း ပုံမှန်မသွားရဘူး “ ဟု ၎င်းက ပြောသည်။

အလားတူ ဆီဆိုင်မြို့နယ် သျှမ်း – ကယား နယ်စပ်ဒေသတလျောက်ရှိ စစ်ရှောင်ရှောင်များသည်လည်း နှလုံးရောဂါ၊ သွေးတိုးနှင့် ဆီးချိုရောဂါ စသည့်နာတာရှည်ရောဂါတို့ကို ကုသရန် ဆေးဝါးအခက်ခဲရှိနေကြောင်း စစ်ရှောင်ကူညီသူတစ်ဦးက ပြောသည်။

“ နာတာရှည် ရောဂါသည်တွေတော့ အနီးစပ်ဆုံး ဆေးခန်းတွေကိုပဲ အားကိုးရတယ်။ ဒီဖက်မှာ အခမဲ့ စနစ်နဲ့ မကုသ ပေးတော့ ကုန်ကျမှုရှိတယ်။ နယ်လှည့်ပြီး ဆေးဝါးကုသပေးတဲ့ အဖွဲ့စည်းရှိရင်တော့ ကုန်ကျမှု နည်းတာပေါ့။ လက်နက်ကြီး ထုခံရတဲ့ရွာဆို တချို့စစ်ရှောင်လာရင်း မကျန်းမမာ နှလုံးရောဂါနဲ့ ဆုံးပါးသွားတဲ့ သူလည်းရှိတယ်။ ဆေးရုံ၊ ဆေးခန်း မသွားနိုင်တော့ ရွာမှာရမ်းကုနဲ့ပဲ ကုသရတယ် “ ဟု ၎င်းက ပြောသည်။

ဆေးဝါးမလုံလောက်မှုကြောင့် ပြီးခဲ့သည့် ၂၀၂၂ ခုနှစ်အတွင်း ဆီဆိုင်မြို့နယ် အတွင်းရှိ စစ်ရှောင်များထဲမှ နာတာရှည်ရောဂါခံစားရသူ စစ်ရှောင် ၁၀ ဦးခန့် ဆေးဝါးလုံလောက်မှု မရှိသဖြင့် အသက်သေဆုံးခဲ့ရကြောင်း သိရသည်။

ထို့အပြင် စစ်တပ် အာဏာသိမ်းပြီးနောက်ပိုင်း ၃ နှစ် ကာလအတွင်း သျှမ်း – ကယား (ကရင်နီ) နယ်စပ်ဒေသတွင် ဆေးကုသရန် ခက်ခဲမှုကြောင့် စစ်ရှောင်ဦးရေ ၁၃၄ ဦး သေဆုံးပြီး၊ တိုက်ပွဲကြား သတ်ဖြတ်ခံရသူ ၃၁၃ ဦး ရှိကြောင်း တိုးတက်သော ကရင်နီပြည်သူ့အင်အားစု PKPF မှ ဧပြီလ ၁ ရက်တွင် ထုတ်ပြန်ထားသည်။