ရှမ်းပြည် တိုးတက်ရေးပါတီ၊ ရှမ်းပြည် တပ်မတော် (SSPP/SSA) မှ လောင်းကစားဝိုင်များ ဖွင့်လှစ်ခြင်းသူများကို ပိုင်ဆိုင်မှု သိမ်းဆည်းမည်ဟု ထုတ်ပြန်ထားသော်လည်း လောင်းကစားဝိုင်းများသည် ယနေ့ထိ ဆက်လက်ရှိနေဆဲဟု စုံစမ်းသိရသည်။

ပြီးခဲ့သည့် မတ်လ (၂၂) ရက်တွင် SSPP/ SSA တပ်ဖွဲ့၏ စိစစ်ရေးကော်မတီမှ လောင်းကစားဝိုင်းများ ဖွင့်လှစ်ပါက ပိုင်ဆိုင်မှုများကို သိမ်းမည့်အပြင် ထိရောက်စွာ အရေးယူသွားမည်ဟု ထုတ်ပြန်ထားသည်။

အဆိုပါ ထုတ်ပြန်ချက်တွင် လောင်းကစား ဖွင့်လှစ်သူ နှင့် ပါဝင်ပတ်သက်သူများကို စစ်စဆေးတွေ့ရှိပါက ပိုင်ဆိုင်မှု ပစ္စည်းများ အားလုံး ရုတ်သိမ်းခြင်း ခံရမည့်အပြင် SSPP/SSA ၏ တရားရုံး ဥပဒေ အရ ထောင်ဒဏ် ချမှတ်ခံရမည် ဖြစ်ကြောင်းလည်း ပါရှိသည်။

သို့သော်လည်း လက်ရှိ မြေပြင်တွင် လောင်းကစားဝိုင်းများက ဆက်လက်ရှိနေဆဲ ဖြစ်ပြီး သျှမ်းပြည် မြို့နယ်အသီးသီးတွင် ပြုလုပ်သည့် ရှင်ပြုပွဲများ၌ လောင်းကစားဝိုင်းများပါရှိနေကြောင်း ဒေသခံများထံက သိရသည်။

ယခုမတ်လကစ လဲချားမြို့နယ်ထဲတွင် ရှင်လောင်းပွဲ ကျင်းပပြုလုပ်ခဲ့သည့် ကျောင်းတိုင်းတွင် လောင်းကစားဝိုင်းများ ပါရှိကြောင်း ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

“ ရှင်လောင်းပွဲတွေလုပ်တဲ့ ကျောင်းတိုင်းမှာတော့ လောင်းကစားဝိုင်းတွေပါတယ်။ အကြီးတော့မဟုတ်ဘူး။ ကုန်းကင်း အသေးလေးတွေပဲဖွင့်ထားကြတာ။ ကျောင်းဝန်းထဲမှာ ဖွင့်ထားတာတော့မဟုတ်ဘူး။ ပွဲဈေးတန်းထဲမှာပဲ ဖွင့်ထားတာ” ဟု လဲချားမြို့ ဒေသခံ အမျိုးသမီးတစ်ဦးက ပြောသည်။

ထို့အပြင် ကျောက်မဲခရိုင်ဘက်ရှိ သီပေါမြိုန့ယ်၊ ကျောက်မဲမြိုန့ယ် တို့မှာလည်း လောင်းကစားဝိုင်းများ အဆက်မပြတ် ဖွင့်လှစ်နေပြီး လောင်းကစားဒိုင်များက ဒေသအတွင်း အာဏာပိုင်များ နှင့် ပူးပေါင်းကာ ဖွင့်လှစ်နေကြောင်း ဒေသခံများက ပြောသည်။

တချို့ ကျေးလက်ဒေသများတွင်ဖွင့်လှစ်သည့် လောင်းကစားဝိုင်းသည် လက်နက်ကိုင်တပ်ဖွဲ့နှင့် ဆက်စပ်မှု ရှိကြောင်း လည်း သိရသည်။

“မြေပြင်မှာဖွင့်နေတဲ့လောင်းကစားတွေက စစ်တပ်နဲ့ပတ်သက်သလို တိုင်းရင်းသားလက်နက်ကိုင်တပ်တွေလည်း ပါဝင်နေတာရှိတယ်။ တချို့နယ်မြေက လက်နက်ကိုင်တွေထိန်းချုပ်တဲ့နေရာလေ” ဟု သီပေါမြို့ဒေသခံ တစ်ဦးက ပြောသည်။

စစ်တပ်က အာဏာသိမ်းပြီးနောက်ပိုင်း သျှမ်းပြည် အတွင်း ပြုလုပ်သည့် ပွဲတိုင်းတွင် လောင်းကစားဝိုင်းများကို ထည့်သွင်းလာနေကြောင်း သိရသည်။

ထို့အပြင် ဒေသအတွင်း လောင်းကစားဝိုင်း တချို့၌ SSPP/SSA မှ တာဝန်ရှိသူ တချို့လည်း ပါဝင်ကြောင်း စုံစမ်းဖော်ထုတ်မိသည့်အတွက် လက်ရှိတွင် အပစ်ပေး အရေးယူမှုများ ရှိနေကြောင်း အဆိုပါ ထုတ်ပြန်ချက်တွေ ဖော်ပြထားသည်။

ယင်းကဲ့သို့ SSPP /SSA ၏ စိစစ်ရေကော်မတီ ထုတ်ပြန်ချက်နှင့် ပတ်သက်ပြီး ထိုက်သင့်သည့် ပြစ်ဒဏ် အလျှောက် ကျူးလွန်သူများကို ဌာနချုပ်မှ အပစ်ပေး အရေးယူနေလျက်ရှိကြောင်း SSPP/SSA မှ ဗိုလ်ကြီး သီဟရာဇာက သျှမ်းသံတော်ဆင့်ကို ပြောသည်။

“တချို့ မြေပြင် တာဝန်ရှိသူတွေက အကြောင်းအမျိုးမျိုးကြောင့် လောင်းကစားဝိုင်းနဲ့ ပတ်သက်ရတယ်၊ အဲ့ဒါကို ကျနော်တို့ အကြိမ်ကြိမ် သတိပေး တားမြစ်ပြီးတော့ စုံစမ်းစစ်ဆေးမှုတွေ လုပ်ခဲ့တယ်၊ ဒါပေမဲ့ မရပ်တန့်ခဲ့တော့ လက်ရှိမှာတော့ ထိုက်သင့်တဲ့ အပြစ်ဒဏ် အလျှောက် ဌာနချုပ်ကနေ စီမံလုပ်ဆောင်နေတယ်” ဟု ဗိုလ်ကြီး သီဟရာဇာက သျှမ်းသံတော်ဆင့်ကို ပြောသည်။

ပြည်သူများ အနေဖြင့် လောင်းကစားဝိုင်းများကို သက်ဆိုင်ရာ တာဝန်ရှိသူများ၊ အာဏာပိုင်များက ထိထိရောက်ရောက် အရေးယူပေးစေလိုကြောင်း နှင့် လောင်းကစားဝိုင်းများကို ပိတ်သိမ်းစေလိုကြောင်း သိရသည်။